Daniela

11 “Ngo ame kö ni, hnenge hna mekun troa xatuan me aegöcatrenyi* Dariu qa Madai, ngöne la pane macatre ne mus i nyidrë. 2 Ame la hnenge hna troa amamane koi ö enehila, ke ka nyipici:

“Goeën! Troa mejë la köni joxu thatraqai Peresi, nge tro hmaca kö a tru la itre trengamo hna troa kapa hnene la hna 4 ne joxu, hune lo itre xan. Nge ame hë la angeic a catr, jëne la itre mo i angeic, troa angeic a ukune la nöjei atr* troa cile kowe la baselaia ne Geres.

3 “Nge tro ha mejë la ketre joxu ka catr, nge tro angeic musinëne la itre götrane gaa tru catr, me kuca la hnei angeic hna ajan. 4 Ngo e mejë hë angeic, tro ha thë me aisane la baselaia i angeic ngöne la 4 lao cane la fen.* Ngo tha tro kö a hamën kowe la itre matra i angeic, nge tha tro hmaca kö ej a catr tun ekö; ke tro ha fejetrije la baselaia i angeic, me hamën koi itre xan.

5 “Nge tro hë la joxu ne kolojë, ketre tane i angeic, a catr; ngo tro la ketre atr a ngaa angeic, nge tro la atre cili a musinëne la itre götrane gaa tru, nge ka tru catre hmaca kö hune la itre götrane i angeic.

6 “Thupene la itre macatre, tro angatr a isisinyikeu, nge tro la nekö ne la joxu ne Kolojë jajiny a tro kowe la joxu ne Kolopi, matre troa ce axeciëne la ketre mekun. Ngo tha tro kö a cile hut la trengecatrene la ime i angeic; tha tro kö la joxu a cile catr, nyidrë memine la ime i nyidrë; nge tro pë hë a nue angeic, me itre ka traqa sai angeic, me keme i angeic, memine la atre aegöcatrenyi angeic ngöne la itre ijine cili. 7 Nge tro la ketre ziin ka fetra qa ngöne la itre iwaane i angeic, a nyihna i angeic,* me uti kowe la trongene isi, me cil kowe la ihag atraqatr ne la joxu ne Kolopi; tro ej a lep me ngaa angatr. 8 Tro fe angeic a xometrongëne la itre haze i angatr a tro Aigupito, me itre idrola fao* i angatr, me itre ewekë i angatr ka tru thupen* hna kuca hnei sileva me gool, me itre atr hna kötre fë. Tro angeic a lapa ananyine la joxu ne Kolopi koi itre hnepe macatre hi. 9 Nge tro la joxu cili a cil kowe la baselaia ne la joxu ne Kolojë, me bëeke hmaca kowe la nöje i angeic.

10 “Nge tro pë hë la itre nekö i angeice trahmany, a hnëkë troa isi me acasine la ketre trongene isi atraqatr. Tro angeic a aca tro theng apatren, tune la tim ka kaca. Ngo tro hmaca kö angeic a bëek, me isi uti hnyawa ha la angeic a traqa kowe la ihage i angeic.

11 “Nge tro la joxu ne Kolojë a elëhni, me tro troa isi memine la joxu ne Kolopi; nge tro la joxu cili a acasine la ka ala nyim, ngo tro pë hë a nue angatr kowe la musi ne lai ketre joxu. 12 Eje hi, tro ha hule trongëne la ka ala nyimu. Nge tro hë angeic* a pi tru catr, me akeine la itre milio;* ngo tha tro kö angeic a huliwan apexejen la trengecatre i angeic.

13 “Nge tro la joxu ne Kolopi a bëeke hmaca, me acasine la itre atr ka ala nyimu catre kö hune lo hnapan; thupene la ketre hnepe ijin, me itre macatre, tro angeice hmaca a traqa memine la ketre trongene isi ka tru ka hnëkë hnyawa. 14 Ngöne la ijine cili, ala nyimu la itre ka troa cil kowe la joxu ne Kolojë.

“Nge tro la itre trahmany ka isi lapa* ngöne la nöje i ö, a kapa la hna qaja me tupath troa eatrën la ketre hna meköle goeën; ngo tha tro kö angatr a eatrën.

15 “Nge tro la joxu ne Kolopi a traqa, me cil xötreith la ketre traon hna eköhagen me thapa. Nge tha tro kö la trongene isi* ne Kolojë a atreine cile koi angeic, ketre tune fe la itre soc ka catr; tha ijije kö la trengecatre angatr troa cile koi angeic. 16 Tro la atr ka cile koi angeic a kuci mekun, nge pëkö ka atreine troa sewe angeic. Tro angeic a cil ngöne la Nöje Ne la Emingömingön, nge tro ha aijijë angeic troa iapatreny. 17 Tro angeic a pi hune fë* troa ce traqa memine la ecatrene la baselaia i angeic, nge tro angeic memine la joxu cili a ce ithanata me axecië mekun;* nge tro angeic a huliwa inamacan. Tro ha aijijë angeice troa axulune la akötr kowe la neköne jajinyi ne la itre föe. Tha tro kö lai jajiny a cile catr, nge tha ewekë i angeice hmaca kö lai jajiny. 18 Tro angeic a xei kowe la itre nöj ka lapa ngönegejë trootro, nge nyimutre la itre nöj e cili hnei angeic hna troa thapa. Ngo tro la ketre tane isi a apëne la hmahma hnei angeic hna kuca koi xapo, uti hë la tro ej a patr. Nge tro la tane isi a ahmahmanyi angeice pena. 19 E cili, tro hë angeic* a bëeke hmaca* kowe la itre ihag ne la nöje i angeic. Tro hë angeic a kei, me mala, me patr.

20 “Nge tro pena a nyihnai angeic hnene la ketre atr ka upe la atre hle hotr ngöne la baselaia ka lolo; ame pe, tha hmitre kö matre apatrenyi angeice pi, ngo tha hnei elëhni kö me isi.

21 “Nge tro la atre hna methinën,* a nyihnai angeic. Nge tha tro kö a metrötrëne la musi angeic; tro la atre cili a traqa ngöne la ijine tingeting,* me thapa la hnanyijoxu, jëne la hna menyike thoi.* 22 Nge tro angeic a aca tro apatrene la itre trongene isi* ka kaca, nge tro ha waja fici angatre tune la aqane waja fica la Atre Köja Gojeny ne la isisinyikeu. 23 Nge pine laka, hna isisinyikeu me angeic, tro hë angeic a iaö, me mejë, me catr jëne la ketre nöje ka co. 24 Ngöne la ijine tingeting,* tro angeic a tro kowe la itre götrane gaa trenamo* ne la provës, me kuca la hna tha kuca kö hnei itre kem me itre qaaqaa i angeic. Tro angeic a thawa koi angatr la itre ewekë hna thapa, me hna atrekënö, me itre mo; tro angeic a hnëkë nyine tra thethine la itre götran hna eköhagen, ngo koi hnepe ijine hi.

25 “Nge tro angeic a acasin la trengecatr me ecatre* i angeic matre cil kowe la joxu ne Kolojë, memine la trongene isi ka tru; nge tro la joxu ne Kolojë a hnëkë troa isi memine la trongene isi atraqatr nge ka catr. Nge tha tro kö angeic* a cile catr, ke tro ha hnëkë thethi koi angeic. 26 Nge tro angeic a kei hnene la itre ka xeni la itre a i angeic ka lolo.

“Nge ame pë hë la trongene isi i angeic, ke tro ha apatren* ej; ala nyimu la hna troa humuth.

27 “Tro la hni ne la lue joxu cili a piine la ngazo, nge ngöne la laulau hnei nyidroti hna troa lapan, tro nyidroti a ithoikeu. Ngo tha tro kö a eatr, ke tha traqa pala kö la ijin hna sa kowe la pun.

28 “Nge troa bëeke fë la itre mo ka nyimutre kowe la nöje i angeic.* Nge tro la hni i angeic a cil kowe la isisinyikeu ka hmitrötr. Tro angeic a huliwa inamacan, me bëeke hmaca kowe la nöje i angeic.

29 “Ngöne la ijin hna sa, tro hmaca angeic a cile kowe la joxu ne Kolojë. Ngo e cili, tha tro hmaca kö a tun ekö, 30 ke tro la itre he ne Kitim a uti koi angeic, nge tro ha thaipië angeic.

“Tro hmaca kö angeic a traqa, me qajangazone* la isisinyikeu ka hmitrötr, me atreine huliwa hnyawa; tro angeic a bëeke hmaca, me goeëne hnyawa lo itre ka thipetrije la isisinyikeu ka hmitrötr. 31 Tro ha mejë la itre trongene isi hnei angeic* hna up; tro ha adrone la hnë hmi, memine la ihag, nge tro ha apatrene la huuj hna tro fë lapan.*

“Nge tro ha acil la ewekë ka sis ka xulu fë hnëjin.

32 “Nge ame la itre ka xele ma wang la isisinyikeu, ke tro angeic a huli angatr troa icilekeu* jëne la itre trengewekë ka menyike thoi.* Ngo tro kö a huun la nöj ka atre la Akötresi angatr, nge tro angatr a atreine huliwa hnyawa. 33 Tro la itre ka atreine waiewekë thene la nöj, a xatuane la ka ala nyimu troa trotrohnin. Tro angatr a kei hnei taua me eë, me kalabus, me atrekënö koi hnepe ijine hi. 34 Ngo ame ju hi la angatr a troa kei, ke tro ha nango xatua angatr; ala nyimu la itre ka troa qaja la itre trengewekë ka menyike thoi,* matre troa ceme angatr. 35 Nge hetre ka troa kei thene la itre ka atreine waiewekë, matre jëne angatr, tro ha tupathe la itre atr, me ahmitrötrën, me awiën uti hë la ijine la pun; ke tro kö lai a eatr ngöne la ijin hna sa.

36 “Tro la joxu a kuci mekun, me pi tru catr, me atrunyi angeice kö hune la itre xaa haze; goi tro fe angeic ewekë menu kowe la Akötresi ne la itre akötresie. Tro angeic a eatrën asë la itre mekuna i angeic, uti hë la pexeje hnyawa la elëhni; ke loi e troa eatrën la hna axeciëne hë. 37 Tha tro kö angeic a metrötrëne la Akötresie ne la itre keme i angeic; nge goi tro fe angeic a pë metrötr kowe la hna ajane hnene la itre föe, maine koi ketre haze pena. Ngo tro kö angeic a sipu atrunyi angeic hun asë. 38 Tro pe* angeic a atrune la haze ne la itre ihag atraqatr; tro angeic a atrune la haze hna thatre hnene la itre keme i angeic, me tro fë gool, me sileva, me etë ka melemel, me itre ewekë ka tru thupen.* 39 Jëne* la haze trenyiwa, tro angeic a atreine cil kowe la itre ihag atraqatr hna thupëne hnyawan.* Tro angeic a nyipi atrune la itre ka wangatrehmekunyi* angeic, me acili angatr troa mus nyipine la ka ala nyimu; tro angeic a thawa la itre hnepadro göi thupen.

40 “Ngöne la ijine la pun, tro la joxu ne Kolojë a aca tro ut troa isi me angeic, nge tro la joxu ne Kolopi a nyenyape koi angeic memine la itre ikariota, me itre ka ti hos, me itre he ka nyimutre; nge tro angeic a lö hnine la itre nöj, me kaca tran itre ej tune la tim ka catr. 41 Nge tro fe angeic a lö hnine la Nöj Ne La Emingömingön, nge nyimutre fe la itre nöje ka troa kei. Ngo hane hi la itre ka troa kötrene la ime i angeic: Edroma, me Moaba, memine la götrane ka tru ne la nöj i angetre Amona. 42 Nge tro pala kö angeic a xeji im kowe la itre nöj; goi thatreine fe Aigupito troa neëne lai. 43 Eje hi, tro angeic a musinëne la itre trengamo hna juetrën, ene la gool, me sileva, me itre ewekë ka tru thupen* e Aigupito. Tro la angetre Libena me Aithiope a weje huzu* angeic.

44 “Ngo tro la itre nuvel qa koië* me kolopi a ajolëne la hni i angeic, nge tro angeic a tro memine la elëhni atraqatr troa lep apatrene* la ka ala nyim. 45 Tro hë angeic a acil la itre itat ne joxu i angeic nyipine la hnagejë ka tru, me wetr ka hmitrötr ne la Emingömingön. Nge e cili, tro ha traqa la pune koi angeic, nge pëkö ka troa amele angeic.