Ioela
3 “Ke dreng! Ame ngöne la hneijine cili me ijine cili,
Ngöne la eni a troa abëekëne la angetre Iudra me Ierusalema hna akalabusin,
2 Tro fe ni a acasine la nöjei nöj
Me uti sai angatr kowe la hnathup i Iehosafata.*
E cili, tro ni a kootrë angatr
Pine la itre ewekë hnei angatr hna kuca kowe la nöjeng, me kowe la edröng, Isaraela,
Ke hnei angatr hna aisane la nöjeng nyipine la itre xaa nöj,
Me thawa la nöjeng.
3 Ke hnei angatr hna uthidrönegöti matre thawa la nöjeng;
Hnei angatre hna salemëne la nekönatr trahmany, matre nyithupene la föe ne gojeny
Me salemëne la nekönatr jajinyi matre iji waina.
4 Ame epun, angetre Turo me Sidona me itre xaa götran e Filisiti,
Hnauëne la epuni a wesitre koi ni?
Epuni kö a mekun troa të la ketre ewekë hnenge hna kuca koi epun?
Maine epuni a thel troa të koi ni,
Tro hë ni a kuca matre troa canga eatr koi epun la hnei epuni hna mekun.
5 Hnei epuni hna thapa la silevang me gool,
Me tro fë kowe la itre uma hmitrötre i epun, la itre ewekëng ka tru thupen;
6 Nge hnei epuni hna salemëne la angetre Iudra me Ierusalema kowe la angetre Geres,
Matre troa ananyi angatr qa ngöne la nöje i angatr;
7 Celë hi matre, tro ni a ahlë angatr me bëeke sai angatr kowe la götran hnei epuni hna salemë angatre kow,
Nge tro ni a kuca matre troa eatr koi epun la hnei epuni hna kuca.
8 Tro ni a nue* la itre nekö i epun trahmanyi me jajinyi kowe la angetre Iudra,
Nge tro angatr a salemë nyudren kowe la itre trahmanyi ne Seba, ketre nöj gaa nany;
Ke eni Iehova la ka qaja lai.
9 Qaja jë kowe la itre nöj ka hape:
‘Hnëkë jë troa* isi! Ukune jë la itre trahmanyi ka catr troa hane tro!
Epi tro asë hi la itre soc a easeny! Epi tro angatr a nyiqane tro!
10 Lepelepe jë la itre nyine uja dro i epun matre nyi taua, me itre hele ne xötre vin matre nyi jo.
Epi tro la ka kucakuca a qaja ka hape: “Ka catre ni.”
11 Epuni asë, itre nöje xötreith, icasikeu jë nge trohemi troa ixatua!’”
Iehova fe, epi tro nyipë a traqa fë la itre atr ka catre* i nyipë kowe la götrane ce.
12 “Epi tro la itre nöj a mejë me tro kowe la hnathup i Iehosafata;
Ke e cili, tro ni a lapa troa amekötine la nöjei nöje xötreith.
13 Hna pi la ifos, ke hmedre hë la nyine menuën.
Uti pi troa wajawaja la itre wene rezë, ke tiqa ha la hnë weje wene vin.
Kola neni gala la itre basë waina, ke tru pala ha la hnei angatr hna iakötrë.
14 Ala nyimu catr la itre ka uti kowe la hnathupe hnë xomi mekun,
Ke easenyi hë la drai i Iehova ngöne la hnathupe hnë xomi mekun.
15 Tro ha miti la jö memine la treu,
Nge tha mele catre hë la itre wëtresij.
16 Nge qaa Ziona, tro Iehova a ho tune la liona,
Qaa Ierusalema, tro ha mexem la nine i nyidrë.
Nge tro ha enienije la hnengödrai me ihnadro;
Ngo tro Iehova a hnë zae kowe la nöje i nyidrë,
Hnapo ka catr kowe la nöje Isaraela.
17 Nge tro hë epuni a atre laka, eni Iehova Akötresi epun, atre lapa e Ziona, lo wetreng ka hmitrötr.
Tro Ierusalema a ketre götran ka hmitrötr,
Nge tha tro hmaca kö a tro cili hnene la itre trenyiwa.
18 Ame ngöne la drai cili, tro ha neni la waina ka menyik hune la itre wetr,
Tro ha neni la melek hune la itre sasala,
Nge tro ha neni la tim ngöne la nöjei jë ne tim e Iudra.
Tro ha cua la qeqe ne tim qa ngöne la uma ne hmi i Iehova,
Nge tro ej a fii la hnathupe* ne la itre Akasia.
19 Ngo tro ha pë atrene la nöje Aigupito,
Nge tro ha hnapapa me pë atrene la nöje Edroma,
Ke hnei angatr hna qanangazon la nöje Iudra,
Ngöne la nöje Iudra, hnei angatr hna anenine la madra ne la itre atr ka pë engazon.
20 Ngo tro pala hi a hetre atr ka lapa e Iudra,
Me e Ierusalema ngöne la nöjei xötr atr epin.
21 Ame lo madra* i angatr hnenge ekö hna tha jelemekötin, ke tro hë ni a jelemekötin;
Nge tro hë ni, Iehova, a lapa e Ziona.”