Atre Cainöj
1 Itre trengewekë ne la atre acasin,* lo nekö i Dravita, joxu ne Ierusalema.
2 “Pëkö ca eloin!”* önine la atre acasin,
“Pëkö ca eloin! Ka gufa asë hi!”
3 Nemene la thangan kowe la atr
Qa ngöne la hna catre huliwa hune la ihnadro?
4 Kola tro la ketre xötr atr, nge kola traqa la ketre xötr,
Ngo ka cile hut epine palua la ihnadro.
5 Kola fetra la jö nge kola lö la jö;
Ej a canga bëek kowe la hnen ej hna troa mejë hmaca.
6 Kola hnahna la eny a tro kolojë, me ujë a tro kolopi;
Eje pala hi a nyinyape kano; ej a tro me bëeke hmaca.
7 Itre tim asë a neni* kowe la hnagejë, ngo goi tha tiqa fe la hnagejë.
Itre tim a bëeke kowe la hna fetra, matre neni hmaca.
8 Ka iakucakucanyi la nöjei ewekë asë;
Thatreine kö troa e asë.
Tha meji kö la alamek troa goeën;
Tha tiqa kö la hnangenyë troa dreng.
9 Ame la ka eje hë, ke tro hmaca kö a ej,
Nge ame la hna kuca ha, ke tro hmaca kö a kuca;
Pëkö ewekë ka hnyipixe fene la jö.
10 Hetre ewekë kö hne së hna troa qaja ka hape: “Goeëne la, ka hnyipixe kö”?
Ka hekö hë la ewekë cili;
Ka hekö catre hë hune la hneijine së.
11 Pëkö ka mekune hmaca lo itre atr hnapan;
Pëkö ka troa mekune hmaca la itre atr ka troa mel elany;
Goi tro fe a thëthëhmine la itre atre cili hnene la itre ka troa mel e thupen.
12 Ame ni, atre acasin, hnenge hna joxu ne Isaraela e Ierusalema. 13 Hnenge hna axeciën e kuhu hning troa inin me waipengöne la nöjei ewekë hna kuca fene la hnengödrai, cememine la inamacan. Ene la huliwa ka pë alien hnei Akötresie hna nue kowe la itre nekö i atr, nge ka xome la traeme i angatr.
14 Hnenge hna öhne la nöjei huliwa hna kuca fene la jö,
Nge goeën! Ka gufa asë hi, kösë kola nyinyape thenge la eny.
15 Thatreine kö troa wenë la ka qali,
Nge thatreine kö troa e la ka patr.
16 Ame hnenge hna qaja e kuhu hning ka hape: “Hnenge hna kapa la inamacan ka tru, matre inamacane kö ni hune la itre ka tro pa hung e Ierusalema. Nge tru catre la atrehmekun me inamacan hna kapa hnene la hning.” 17 Hnenge hna mekun e kuhu hning troa atrepengöne la inamacan, me atrepengöne la aqane ujë ka hmo,* memine la troa huliwa menu. Ketre aqane tro fe hi lai a nyinyape thenge la eny.
18 Ke e atraqatr la inamacan, tro fe a tru la hleuhleu,
Matre ame la atr ka akökötrene la atrehmekun, angeice fe a akökötrene la akötr.