Ieremia

43 Hnei Ieremia hna thuemacane la nöjei atr la trengewekë i Iehova Akötresi angatr, me qaja asë la hnei Iehova Akötresi angatr hna upi angeic troa tro fë. Ame ju hi la angeic a ase ithanata, 2 öni Azaria nekö i Hosaia jë hi, me Iohanana nekö i Karea, memine lo itre ka pi tru koi Ieremia ka hape: “Eö a thoi! Tha hnei Iehova kö Akötresi së hna upi ö troa qaja ka hape: ‘The tro kö troa lapa e Aigupito.’ 3 Baruka pe nekö i Neria la ka upi ö troa qaja lai koi hun, matre nue hun koi angetre Kaledaia. Angeic a ajane tro angatr a humuthi hun, maine xomi huni a tro Babulona.”

4 Matre tha drengethenge Iehova ju kö hnei Iohanana nekö i Karea, me itre tane isi, me nöjei atr asë: xele kö angatr ma lapa ngöne la nöje Iudra. 5 Hnei Iohanana pe nekö i Karea me itre tane isi, hna xome la angetre Iudra ka lapa pe, lo itre hna abëekën qa ngöne la itre nöje trenyiwa, matre lapane la nöje Iudra. 6 Hnei angatr hna xome la itre trahmany, me itre föe, me itre nekönatr, me itre nekö i joxu jajiny memine la nöjei atr asë, lo hnei Nebuzaradana tane la ka thupë joxu, hna ahnithe koi Gedalia nekö i Ahikama, lo nekö i Safana. Nge hnei angatre fe hna xomi Ieremia perofeta me Baruka nekö i Neria. 7 Hnei angatr hna tro Aigupito, ke xele angatre ma drei Iehova, nge hnei angatr hna tro uti hë Tapanesi.

8 Ame hë e Tapanesi, hnei Iehova hna ithanata koi Ieremia me hape: 9 “Xome jë la itre etë ka tru. Nge qëmekene la angetre Iudra, juetrëne ju hnei sima* ngöne la verada hna xupe hnei birik, ka eje ngöne la hnë lö ne la uma i Farao e Tapanesi. 10 Thupene lai, qaja ju koi angatr ka hape: ‘Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Tro ni a hëne la hlueng Nebukaneza* joxu ne Babulona. Tro ni a acil la therone i angeic hune la itre etë cili hnenge hna kelem, nge tro angeic a acil la itate i joxu hune itre ej. 11 Tro angeic a traqa me lepi Aigupito. Ame la itre hna troa lep hnei meci ka ixötrekeu, ke tro hë angatr a mec. Nge tro ha kötre fë la itre ka troa mec ngöne la nöje trenyiwa. Nge tro la itre ka troa meci hnei taua, a mec hnei taua. 12 Tro ni a manithe la itre uma ne hmi ne la itre haze ne Aigupito, nge tro Nebukaneza a dreuthetrij itre ej, me akalabusin la itre idrola i angatr. Tune la aqane heetre nyimenyim ne la atre thupë mamoe, tro la joxu cili a nyimenyime thapa me ngaan la nöje Aigupito, me tro cememine la tingeting.* 13 Tro angeic a thë la itre ikapa* ne Bethe-Semes* e Aigupito, me dreuthetrij la itre uma ne hmi ne la itre haze ne Aigupito.”’”