Ieremia

44 Hane hi la hnei Akötresie hna upi Ieremia troa qaja kowe la angetre Iudra ka lapa e Aigupito, me itre ka lapa e Migedola, me Tapanesi, me Nofi,* me ngöne la nöj e Patherusi: 2 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Öhn asë hi epuni la itre akötr hnenge hna axulun koi Ierusalema, me kowe la itre traon e Iudra. Tra etë pe hi enehila nge pëhë atre lapan. 3 Hna traqa lai, pine la itre ewekë ka ngazo hnei epuni hna kuca matre akötrë ni: qai epuni hna huuj me nyihluene la itre xaa haze, lo hnei epun me itre qaaqaa i epun hna thatre. 4 Tha mano kö ni up, me upe hmaca* la itre hlueng perofeta troa qaja koi epun ka hape: “Eni a sipo, the kuca kö la ewekë cili ka sis hnenge hna methinën.” 5 Ngo tha drenge kö epun me hnangenyën, nge tha nuetrije kö epun la ngazo i epun. Hnei epuni pala hi hna tro fë huuj kowe la itre xaa haze. 6 Ame hnenge hna nenge la elëhning me trengehning, nge hna dreuthetrije la itre traon e Iudra me itre gojenyi e Ierusalema. Matre hane pë hë la pengön la itre traone cili: itre tra etë me hnapapa.’

7 “Nge enehila, hane hi la hna qaja hnei Iehova Akötresie ne la itre trongene isi e hnengödrai, Akötresi Isaraela: ‘Hnauëne la epuni a hëne la akötr ka tru koi epun? Ke tro ha meci asë la itre trahmany, me föe, me nekönatr, me medreng qa Iudra, nge pëkö ka troa mel. 8 Hnauëne la epuni a akötrë ni hnene la itre huliwa i epun, la epuni a tro fë huuj kowe la itre xaa haze ne Aigupito, lo nöj hnei epuni hna tro kow? Tro hë epuni a patr, nge tro la itre atr ne la nöjei nöj asë e cailo fen a qeje epun ngöne la kola ieji me iqaqa. 9 Hapeu, thëthëhmine hë epun la itre ngazo hna kuca hnene lo itre keme i epun, me itre joxu ne Iudra, me itre föi angatr, me itre ngazo i epuni fe, me itre föi epun, lo hna kuca e Iudra me ngöne la itre gojenyi e Ierusalema? 10 Uti hë enehila, tha hnei epuni kö hna ipië,* me xou, me trongëne la wathebo me itre hna amekötin hnenge hna hamën koi epun me itre qaaqaa i epun.’

11 “Qa ngöne lai, hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Xecie hë koi ni troa axulune koi epun la akötr, matre apatrene la nöje Iudra asë. 12 Tro ni a humuth e Aigupito, la angetre Iudra ka catre fë mekun troa tro cili. Tro angatr a mec hnene la isi* me mecijiin. Qane ju hi la ka co uti hë la ka tru, tro angatr a mec hnene la isi* me jiin. Tro hë angatr a hnëjin me hmahma. Nge tro la itre atr a qeje angatr ngöne la kola ieji, me sesëkötre ngazo pine la ewekë ka traqa koi angatr. 13 Tro ni a lep la itre ka lapa e Aigupito, tune lo aqane lepe ni la itre ka lapa e Ierusalema, hnei isi,* me jiin, me meci ka ixötrekeu.* 14 Nge ame thene lo angetre Iudra ka mele pe nge ka kötr a tro Aigupito, pëkö ala casi ka troa kötre bëek a tro Iudra. Tro angatre lai a pi bëeke hmaca, ngo itre xane hi la ka troa bëek.’”

15 Ame hnene lo itre trahmanyi ka atre laka, hnene la itre föe i angatr hna tro fë huuj kowe la itre xaa haze, memine la nöjei föe ka icilenyi nge ka ala nyim, memine fe lo itre ka lapa e Aigupito e Patherusi, hna qaja koi Ieremia ka hape: 16 “Tha tro kö huni a kuca la hnei ö hna qaja ngöne la ëje i Iehova. 17 Ngo tro pe huni a kuca la hne huni hna qaja: tro huni a tro fë huuj kowe la Isola Ne Hnengödrai* me fii la itre huuj hnei waina. Celë hi lo hne huni hna kuca, eahun me itre qaaqaa hun, me itre joxu hun, me itre nekö i joxu hun ngöne la itre traon e Iudra, me itre gojenyi e Ierusalema. Ngöne lo ijine cili, tru catre hnei falawa hun, pëkö ka pë the hun, nge pëkö akötr ka lepi hun. 18 Ngo ame ju hi la eahuni a cil troa tro fë huuj kowe la Isola Ne Hnengödrai* me waina nyine fii huuj, ke pë pi hi ca ewekë hun, nge hna lepi hun hnei isi* me jiin.”

19 Önine hmaca jë hi la itre föe: “Ame ekö, ka majemine hun tro fë huuj me waina nyine fii huuj kowe la Isola Ne Hnengödrai.* Ngo hapeu, tha itre föi eahuni kö lo ka nue hun troa sa gato nyine huujën koi eahlo? Nge tha angatre fe kö lo ka nue hun troa tro fë waina nyine fii huuj?”

20 Ame hnei Ieremia hna sa kowe la ka ala nyim, kowe la itre trahmanyi me föi angatr, me itre ka ithanata me angeic, ka hape: 21 “Mekune pala hi Iehova lo itre huuj hnei epuni hna tro fë ngöne la itre traon e Iudra me ngöne la itre gojenyi e Ierusalema, epun me itre qaaqaa i epun, me itre joxu i epun, me itre nekö i joxu i epun, memine la nöjei atren la nöj. Tha thëthëhmine kö nyidrë! 22 Eje hi, thatreine hë Iehova xomihnine la itre huliwa i epuni ka ngazo, memine la itre ewekë ka sis hnei epuni hna kuca. Matre hane pë hë la pengön la nöje i epun: ketre götran hna apatren me ka pë atren, nge hna xouen, nge hna qaja hnene la itre atr ngöne la kola ieji. 23 Maine kola traqa la akötr koi epun enehila, ke hnei epun hna tro fë la itre huuje cili, me kuca la ngazo qëmekei Iehova: tha hnei epuni kö hna drengethenge Iehova, me trongëne la wathebo i nyidrë, me itre trepene meköt, me itre hna amexeje hnei nyidrë.”

24 Nge öni Ieremia jë hi kowe la ka ala nyim, me kowe la itre föe: “Drenge ju la hna qaja hnei Iehova, epuni asë angetre Iudra ka lapa e Aigupito! 25 Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Ame la hnei epun, me itre föi epun hna qaja hnene la që i epun, ke hnei epuni hna eatrëne hnene la lue ime i epun. Öni epuni lo: “Ase hë huni mekun troa eatrën la hne huni hna sisiny, ke hne huni hna sisinyi troa tro fë huuj kowe la Isola ne hnengödrai,* me fii la itre huuj hnei waina.” Ame epun itre föe, tro kö epuni a eatrëne la hnei epuni hna sisiny. Atre hnyawa hi ni laka, tro kö epuni a eatrën itre ej.’

26 “Celë hi matre, drenge hnyawa ju la hna qaja hnei Iehova, epuni asë, angetre Iudra ka lapa e Aigupito: ‘“Eni a sisinyi ngöne la ëjeng ka tru,” öni Iehova, “laka tha tro hmaca kö a qaja la ëjeng hnene la ketre atre Iudra ka lapa e Aigupito me sisinyi ka hape: ‘Maine nyipici laka, ka mele Iehova Joxu Ka Sisitria!’ 27 Ke enehila, eni a goeë angatr matre axulune koi angatr la akötr, ngo tha ewekë ka loi kö. Tro asë hi la itre trahmanyi ne Iudra ka mel e Aigupito a mec ngöne la isi* me jiin, uti hnyawa la tro angatr a meci asë. 28 Ala xalaithe pe hi thei angatr, la ka troa kötre mel qa ngöne la isi* me bëeke qa Aigupito a tro Iudra. E cili, tro hë la angetre Iudra ka lapa e Aigupito a atre laka, trengewekë i drei la ka nyipici: eni maine angatr!”’”

29 “‘Nge hane hi la hatrene ka troa amamane koi epun laka, tro ni a ameköti epuni e celë,’ öni Iehova, ‘matre tro epuni a atre laka, tro kö a eatr la trengewekëng göne la akötre ka troa lepi epun: 30 Hane hi la hna qaja hnei Iehova: “Tro ni a nue Farao-Hofera joxu ne Aigupito kowe la itre ithupëjia me angeic, me itre ka thele troa humuthi angeic, tune lo hnenge hna nue Zedekia joxu ne Iudra koi Nebukaneza* joxu ne Babulona, lo ithupëjia ka thele troa humuthi angeic.”’”