Ieremia
48 Hane hi la hna qaja göi Moaba hnei Iehova joxu ne la itre trongene isi e hnengödrai, Akötresi Isaraela:
“Ekölöhini Nebo, ke ase hë lep apatren ej!
Hna thaipiën me thepe Kiriathaima.
Hna thaipiën me thëtrij la hnë zae* ka catr.
2 Pëhë ka atrunyi Moaba.
Hna thele jëne troa akeinyi angeic e Hesebona:
‘Trohemi nge apatrene jë së la nöje ce.’
Ketre tui ö Mademena, lapa thaupu ju,
Ke kola weji ö hnei taua.
3 Kola isuenyi qa Horonaim,
Kolo mejen ne iapatreny me thëtrij.
4 Kei hë Moaba.
Kola isuenyi la itre nekö i angeic.
5 Ngöne la gaa elëelë e Luhith, itre atr a elë me treije trootro.
Nge ame ngöne la gaa utiut e Horonaim, itre atr a ho hnei akötr pine la ewekë ka traqa.
6 Maine epuni a pi mel, kötre jë!
Loi e tro epuni a tune la göti ngöne la hnapapa
7 Pine eö mejiun kowe la itre huliwa me itre mo i ö,
Tro fe a thepe eö.
Tro ha kötre sai Kemosa kowe la ketre nöj,
Memine la itre atre huuj me itre nekö i joxu i angeic.
8 Tro la atre apatren a traqa kow asë hi la itre traon,
Nge pëkö ala cas ka troa mel.
Pëhë ka mel ngöne la hnathup,
Nge tro ha lep apatrene la nöj gaa papa, tune lo hnei Iehova hna qaja.
9 Amë ju la ketre hatren ngöne la gojenyi thatraqai Moaba,
Ke e tro angeic a kei, tro la itre atren a kötr.
Tro hë la itre atr a xou la angatr a öhn la itre traone i angeic,
Pë hmaca kö ka troa lapa e cili.
10 Epi troa hnëjine la atre wangacone la huliwa hnei Iehova hna ahnith koi angeic!
Epi troa hnëjine la atre sawa la taua i angeic troa aneni madra!
11 Angetre Moaba a mele tingeting qane lo angatr a co,
Tune la waina hna pane nue troa uti la wanan.
Tha hna nei angatre kö kowe la ketre trengen,
Nge tha hna hane kö xomi angatr kowe la ketre nöj.
Celë hi matre casi pala hi la ehaitre i angatr,
Nge tha saze kö la aqane punepun i angatr.
12 “‘Qa ngöne lai,’ öni Iehova, ‘drenge ju! Tro ha traqa la drai ne tro ni a upe la itre trahmany troa nengetriji angatr. Tro ha qeneipië angatr, nge tro ha pë alien la trengene i angatr. Tro ha thëtrij la itre trengene i angatr ka tru. 13 Tro la angetre Moaba a hmahma pi Kemosa, tune la angetre Isaraela a hmahma pi Bethela, lo hnei angatr hna mejiune kow.
14 Epuni a qaja fë nemen ka hape: “Itre soc ka catre hun, ka hnëkë troa isi”?’
15 “Ase hë lep apatrenyi Moaba,
Hna thapa la itre traone i angeic,
Nge hna humuth asë la itre nekö trahmany ka catr thei angeic,’
Önine la Joxu hna hën ka hape, Iehova joxu ne la itre trongene isi e hnengödrai.
16 Easenyi hë troa traqa la akötr koi Moaba,
Saqe catre hë la ijin tro angatr a kei.
17 Tro asë hi la itre ka lapa xötreithi angatr a treije pi angatr,
Ene lo itre ka atre la ëje i angatr.
Hape jë koi angatr: ‘Hö! Xecie hë la sinöe ka catr, lo sine tö ka mingöming!’
18 Uti pi qa ngöne la elolo i ö,
Jajinyi ne Dibona, lapa fë ju la trenge pi ije i ö,*
Ke tro pena a lepi ö hnene la atre apatrenyi Moaba,
Nge tro angeic a thëtrije la itre hna eköhagen i ö.
19 Cile ju ezin la gojeny nge goeën ju, föe ne Aroera.
Hnyinge jë kowe la trahmany me föe ka kötr ka hape: ‘Nemene la ka traqa?’
20 Ase hë thaipië Moaba, nge hna axouenyi angeic.
Treije jë nge sue jë.
Qaja jë ezin e Arenona ka hape, ase hë apatrenyi Moaba.
21 “Traqa ha la ijine iameköti kowe la nöje gaa papa: koi Holon, me Iahaza, me Mefath; 22 me Dibona, me Nebo, me Bethe-Dibelathaim; 23 me Kiriathaima, me Bethe-Gamul, me Bethe-Meon; 24 me Kerioth, me Bozera, me nöjei traon ne la nöje Moaba, gaa nanyi me gaa easeny.
25 ‘Hna thapa la trengecatre* i Moaba;
Ase hë hutra la ime i angeic,’ öni Iehova.
26 ‘Tra ime i angeice jë, ke öni angeic, ase hë angeic ngaa Iehova.
Moaba a ujëujë ngöne la hnei angeic hna hmitra,
Nge kola hnyimasai angeic hnene la nöjei atr.
27 Tha eö kö lo ka hnyimasai Isaraela?
Hna öhnyi angeice kö thene la itre ka atrekënö,
Matre tro eö a nangenang me qaja angazo angeic?
28 Trotrije pi la itre traon, nge lapa ju hune la git angetre Moaba,
Loi e tro epuni a tune la pinyi* ka amë la trengene waco i angeic ngöne la gaa kaqa ne git.’”
29 “Drenge hë huni la aqane pi tru i Moaba. Ka pi mama angeic
Eje hi, angeic a meku angeice kö, me pi tru, me pi draië, me ka pi mama.”
30 “‘Atre hi ni laka, ka canga elëhni angeic,’ öni Iehova,
‘Ngo tha tro kö a hetre thangan la itre trengewekë i angeic ka pë alien.
Tha tro kö angeic a eatrën la hnei angeic hna qaja.
31 Celë hi matre tro ni a treije pi Moaba,
Tro ni a sue kowe la nöje Moaba asë
Nge tro ni a treije latresi pine la itre trahmanyi ne Kira-Heres.
32 Tru catre hmaca kö la aqane tro ni a treije pi ö, vin ne Sibema,
Hune la aqane treije pi Iazera ni.
Hnene la itre ziine i ö ka eng hna thupa la hnagejë.
Traqa ha itre ej kowe la hnagejë e Iazera.
Hnene la atre apatren hna canga sesë
Kowe itre wene sinöe me itre rezë i ö hna menuën.
33 Patre hë la madrin qa ngöne la hlapa sinöe
Me qa ngöne la nöje Moaba.
Hnenge hna aqaqacilën la waina ngöne la hnë weje wene vin.
Pë hmaca kö ka troa wajawaja la wene rezë me sue madrin.
Tro ha sue, ngo tha tune hmaca kö lo.’”
34 “‘Drenge hë la aqane sue qa Hesebona uti hë Eleala.
Drenge hë qa Iahaza, la angatr a ithanata catr,
Drenge hë la aqane sue qa Zoara uti hë Horonaim, nge uti hë Egelath-Selisia.
Goi tro fe a aqaqacilën la itre timi ne Nimera.
35 Tro ni a apatren qa Moaba,
La atre tro fë huuj ngöne la gaa draië
Memine la atre tro fë huuj kowe la haze i angeic,’ öni Iehova.
36 Celë hi matre, tune la sine ihoho,* tro la hning a treije* latresi pi Moaba,
Nge tune la sine ihoho, tro la hning a treije latresi pine la itre trahmanyi ne Kira-Heres.
Ke tro ha patre la itre mo i angeic.
37 Hna cin apan asë la itre he,
Nge hna cin asë la itre ienaj.
Hna sijasija asë hi la itre iwanakoim,
Nge hna sili gö angatr hnei ibëek ka tru thenyin!’”
38 “‘Hune la nöjei hune uma asë ne Moaba
Me ngöne la nöjei götrane ne la itre traone i angeic,
Itre treije pe hi la hna dreng.
Ke hnenge hna thë akaqanyi Moaba
Tune la trengen hna amë pë hë,*’ öni Iehova.
39 ‘Goeëne la aqane xou i angeic! Treije jë!
Goeëne la aqane xei hutrö Moaba hnei hmahma!
Kola hnyimasai Moaba hnene la nöjei atr asë,
Ame asë hi la itre atr xötreithi angeic, angatr a xou la angatr a öhnyi angeic.’”
40 “Ke hane hi la hna qaja hnei Iehova:
‘Dreng! Tune la aeto ka sesë me uti kowe la ihnadro,
Tro la ithupëjia a saath la lue iape i angeic hui Moaba.
41 Tro ha xome la itre traon,
Nge tro ha thapa la itre hna eköhagen i angeic.
Ngöne la drai cili, tro la itre soc ne Moaba
A hnehengazo tune la föe la angeic a hnaho.’”
42 “‘Tha tro hmaca kö Moaba a ketre nöj,
Ke öni angeic, ase hë angeic ngaa Iehova.
43 Eje qëmekei ö la xou, me hnaop, me hnö,
Atre Moaba,’ öni Iehova.
44 ‘Ame la ka kötrene la nyine xouen, tro angeic a kei ngöne la hnaop,
Nge ame la ka troa elë qa hnine la hnaop, ke tro angeic a jötre ngöne la hnö.’
‘Ke tro ni a axulun koi Moaba la macatre ne iameköti,’ öni Iehova.
45 ‘Itre ka kötr a zae fen la iahnuene Hesebona, me kucakuca.
Ke tro la eë a tro qa Hesebona
Nge tro la ukahlokin eë a mel nyipine Sihona.
Tro ej a dreuthe la göbadri i Moaba
Memine la inenatr ne la itre soc ka isi.*’
46 ‘Ekölöhini ö Moaba!
Patre hë la nöje i Kemosa.
Ke hna akalabusine la itre nekö i ö trahmany,
Nge hna kötre fë la itre nekö i ö jajiny.
47 Ngo tro ni acasine la itre hna kötre fë qa Moaba ngöne la itre drai ne la pun,’ öni Iehova.
‘Celë hi aqane nyipune la iameköti i Moaba.’”