Ezekiela

30 Hnei Iehova hmaca hna ithanata koi ni, me hape: 2 “Nekö i atr, perofetane jë ka hape: ‘Hane hi la hna qaja hnei Iehova Joxu Ka Sisitria:

“Sue jë ka hape: ‘Ekölöhini! Ijine hë!’

 3 Ke easenyi hë la drai, eje hi, easenyi hë la drai i Iehova.

Ketre drai ka tru hnei iaw, ketre ijin hna sa troa amekötin la itre nöj.

 6 Nge hane hi la hna qaja hnei Iehova:

“‘Qane e Migedola uti hë Seveni, tro ha humuthi angatr hnei taua ngöne la nöj,’ öni Iehova Joxu Ka Sisitria. 7 ‘Pëkö xaa nöj ka troa hnapapa tune la nöje i angatr, nge pëkö ketre traon hna troa thëtrij tune la itre traone i angatr. 8 Nge tro hë angatr e cili a atre laka, Iehova ni, la eni a troa manith e Aigupito me waja fica la itre sine xöle i angeic. 9 Ngöne la drai cili, tro ni a upe la itre he troa axouenyi Aithiope, lo nöj ka mekun ka hape, angeice hi nge pë ju hë. Tro angeic a meci hnei xou ngöne la drai ka troa traqa koi Aigupito, ke tro kö lai a traqa.’

10 “Hane hi la hna qaja hnei Iehova Joxu Ka Sisitria: ‘Tro ni a apatrene la itre trongene isi* atraqatre i Aigupito, jëne Nebukaneza* joxu ne Babulona. 11 Tro ha upi angeic me itre soc i angeic, ene lo nöj ka iaxösisi catre kö hune la itre xaa nöj, troa lepi Aigupito. Tro angatr a uthe la taua i angatr matre lepi Aigupito, me atiqane la nöj hnei itre hna humuth. 12 Tro ni a aqaqacilën la itre jë i tim ne la hneopegejë Nil, me salemën la nöj kowe la itre atr ka ngazo. Tro ni a lep apatrene la nöj me itre alien ej, jëne la itre trenyiwa. Eni Iehova la ka qaja lai.’

13 “Hane hi la hna qaja hnei Iehova Joxu Ka Sisitria: ‘Tro fe ni a thëtrij la itre idrola ka sis,* me apatrene la itre haze ka pë pengön qa Nofi.* Tha tro hmaca kö a hetre nekö i joxu* e Aigupito, nge tro ni a aciane la xou e Aigupito. 14 Tro ni a apatrenyi Patherusi, me manithi Zoana,* me eatrën la hna amekötin koi No.* 15 Tro ni a nenge la elëhning hui Sina, lo ihag atraqatre ne Aigupito, me apatrene la itre atr ne No. 16 Tro ni a manithi Aigupito. Nge tro hë Sina a meci hnei xou, tro ha thepe No, jëne la itre götran hna thön, nge tro ha lepi Nofi e lai petre kö! 17 Tro ha humuthe hnei taua la itre nekö trahmanyi ne Aven* me Pibeseth, me kötre fë la itre atrene la itre traon. 18 Nge tro ha miti la drai e Tapanesi, la eni a troa hutra la itre nyine isilekeun e Aigupito. Tro ha apatrene la ecatrene la mene i angeic, tro la itre iaw a hakuthi angeic, nge tro ha kötre fë la itre atrene la itre traone i angeic. 19 Tro ni a eatrën la hna amekötin göi Aigupito, nge tro hë angatr a atre e cili laka, Iehova ni.’”

20 Ame ngöne la hna 11 ne macatre, ngöne la drai 7 ne la pane treu, hnei Iehova hna ithanata koi ni, me hape: 21 “Nekö i atr, ase hë ni hutra la ime i Farao joxu ne Aigupito. Tha tro kö a pelethe la ime i angeic matre meu pi; nge goi tha tro fe a badën ej matre hetre trengecatre i angeice jë troa xomi taua.”

22 “Haawe, hane hi la hna qaja hnei Iehova Joxu Ka Sisitria: ‘Tro ni a lepi Farao joxu ne Aigupito; eje hi, tro ni a hutra la lue ime i angeic, lo ka catr me ka xeci, nge tro hë ni a amalane la taua qa ngöne la iwanakoime i angeic. 23 Thupene lai, tro ni a aisaijene la angetre Aigupito ngöne la itre nöj, me amë trongë angatr e cailo fen. 24 Tro ni a acatren la lue ime* ne la joxu ne Babulona, me amë la tauang ngöne la ime i nyidrë. Tro ni a hutra la lue ime i Farao, nge tro angeic a awe tune la ketre atr ka troa mec qëmekei nyidrë.* 25 Tro ni a acatrene la lue ime ne la joxu ne Babulona, ngo tro pë hë a genyi la lue ime i Farao. Nge tro ha mama e cili laka, Iehova ni, la eni a troa amë la tauang ngöne la ime ne la joxu ne Babulona, matre lepi Aigupito. 26 Eje hi, tro ni a aisaijene la angetre Aigupito ngöne la itre nöj, me amë trongë angatr e cailo fen. Nge tro ha atre e cili laka, Iehova ni.’”