Hosea
7 “E thele mina ni troa aloinyi Isaraela,
Ke mama pi hi la tria i Eferaima,
Memine la iakötrë i Samaria.
Ke angatr pala hi a iaö;
Itre atrekënö a ënö, nge itre ka thepe ewekë a atrekënö trootro.
2 Goi tha mekune fe angatr laka, tha tro kö ni a thëthëhmine la itre ngazo i angatr.
Nge kola ha kanothi angatr hnene la itre thiina i angatr;
Itre ej asë hi la, qëmekeng.
3 Angatr a amadrinë joxu hnene la aqane iakötrë i angatr,
Me itre nekö i joxu hnene la aqane iaö i angatr.
4 Itre ka nyixetë asë hi angatr,
Ceitui angatr memine la fur ka mel ne la ka sa falawa,
Tha tro hmaca kö a huen, e kola lepe la falawa uti hë la ej a cipa.
5 Ngöne la ijine la joxu së, hna wezipo la itre nekö i joxu:
Hnei angatr hna iji waina matre tru la elëhni i angatr.
Hnei joxu hna li im kowe la itre ka ihnyimasai.
6 Ke angatr a easenyi fë la hni ka mel kösë ifur.*
E jidri ka pexej, kola meköl hnene la ka sa falawa;
E hmakany, kola mel la ifur kösë eë ka palulu.
7 Ceitui angatr asë memine la ketre fur ka mel,
Angatr a dreuthetrije la itre ka musinë* angatr.
Kei asë hë la nöjei joxu i angatr;
Pëkö ala cas ka sipo ixatua koi ni.
8 Eferaima a ce mel memine la itre xaa nöj.
Ceitui Eferaima memine la ketre gato ka raon hna tha ujëne kö.
9 Ae hë la trengecatre i angeic hnene la itre trenyiwa, ngo tha öhne kö angeic.
Nge qia ha la penehe i angeic, ngo tha wangatrehmekune kö angeic.
10 Hnene la pi tru i Isaraela hna qejeqeje angeic,
Ngo tha bëeke kö angatr koi Iehova Akötresi angatr,
Ngacama hna traqa la itre ewekë cili, ngo tha hnei angatre kö hna thele nyidrë.
11 Ceitui Eferaima memine la piny ka thatre koilo, nge ka pë wangatrehmekun.*
Hnei angatr hna sipo ixatua koi Aigupito, me thele ixatua thei Asuria.
12 Ngöne la nöjei jë i angatr, tro ni a hule la ifileng.
Tro ni a autingi angatr tune la itre waco ne hnengödrai.
Tro ni a të koi angatr, thenge la hna amekötine hë.*
13 Epi troa lepi angatr hnei akötr pine angatr kötr ananyi ni!
Epi troa apatrenyi angatr, ke ngazo la aqane ujë i angatr koi ni!
Maine ju, tro ni a itö angatre hmaca, ngo hnei angatr hna silitrengathoi ni.
14 Tha hnei angatre kö hna hë ni hnene la hni i angatr ka pexej,
Ngo angatre pe a treij hune la itre ili i angatr.
Hnei angatr hna xöjexöje* la ngönetrei i angatr göi qitr* me waina ka hnyipixe;
Angatre a cile koi ni.
15 Hnenge hna ini angatr me aegöcatrene la lue ime i angatr,
Ngo hnei angatre pala hi hna icilekeu me eni, me ce thë la ngazo.
16 Hnei angatr hna saze, ngo tha göne kö troa kuca la loi;*
Thatreine kö troa mejiune koi angatr tune la pehna ka nunu.
Tro ha humuthe la itre nekö i joxu hnei taua, pine la thineme i angatr ka icilekeu.
Qa ngöne lai, tro ha hnyimasai angatr e Aigupito.”