Hosea
8 “Ufi trutru jë!
Kola traqa la ithupëjia tune la aeto matre lepe la uma i Iehova,
Ke hnei angatr hna trije la isisinyikeung, me ena la wathebong.
2 Angatr a sue koi ni ka hape: ‘Akötresi huni fe, atre nyipëti hi hne hun, angetre Isaraela!’
3 Hnei Isaraela hna thipetrije la loi.
Epi tro la ithupëjia a weje huzu angeic.
4 Hnei angatr hna acil la itre joxu, ngo tha pane hnyingë ni pe.
Hnei angatr hna acile la itre nekö i joxu, ngo tha ajange pe.
Hnei angatr hna kuca la itre idrola memine la sileva me gool i angatr,
Matre hnei angatre kö hna thel troa apatrenyi angatr.
5 Samaria fe, ase hë thipetrije la neköi kau i ö.
Palulu hë la elëhning koi angatr.
Uti hë eu la tro angatr a thatreine nuetrije* la itre ngazo i angatr?
6 Ke qaa Isaraela la neköi kau cili.
Hna xup ej hnene la ketre atr, ngo tha haze kö lai;
Tro ha thë akaqane la neköi kau ne Samaria.
7 Pine laka, angatr a traa eny,
Tro hë angatr a menuëne la wene.
Pëkö ca ngöne qitr ka hamë wen ka macaj;
Ame la ka cia, ke tha ka hamë farine kö.
Nge maine tro ju hë a hetreny, ke tro pë hë la itre trenyiwa a xen.
8 Tro ha ulumi Isaraela.
Nge qaan enehila, tro hë angatr a lapa nyipine la itre nöj,
Kösë ketre itrengen hna xelen.
9 Ke hnei angatr hna elë a tro Asuria, tune la boliko wael ka tro cas.
Hnei Eferaima hna nyithupene la itre hanyi angeic.
10 Ngacama angeic a nyithupen la itre atrene la itre xaa nöj,
Ngo tro hë ni a acasi angatr enehila;
Tro hë angatr a nyiqaan akötr pine la ehnef hna athip hnei joxu me itre nekö i joxu.
11 Pine laka, nyimutre la itre ita ne huuj hnei Eferaima hna xup, matre ngazo hë angeic.
Hnene la itre ita ne huuje cili hna uku angeic troa kuca la ngazo.
12 Hnenge hna cinyanyine koi angeic la wathebong,* me itre alien ej,
Ngo ame koi angeic, wathebo trenyiwa lai.
13 Angatr a tro fë huuje koi ni me öni la mitren,
Ngo tha madrine kö Iehova.
Tro hë nyidrëti enehila a mekune hmaca la itre tria i angatr me ameköti angatr, pine la itre ngazo i angatr.
Ngo hnei angatre hmaca kö hna thele ixatua* thei Aigupito.
14 Hnei Isaraela hna thëthëhmin la Atre xupi angeic, nge hnei angeic hna xupe la itre uma hmitrötr,
Hnei Iudra hna xupe hmaca la itre xaa traon hna eköhagen.
Ngo tro ni a upe la eë kowe la itre traone i angeic,
Nge tro ha manithe trij la itre ita ne thup ne la itre traone cili.”