Zakaria
5 Hnenge hmaca hna gala draië me öhne la ketre tusi hna ewath a kola sesë. 2 Hnene la angela hna hnyingë ni ka hape: “Nemene la hnei ö hna öhn?”
Öninge jë hi: “Eni a öhne la ketre tusi hna ewath ka sesë, nge ka 20 kubit* la eqean, me 10 kubit la eisaisan.”
3 Öni angeice jë hi: “Ame la tusi cili, ke ej a qatreng la hnëjin ka haöthe la fene hnengödrai. Eje hi, ame asë hi la itre ka atrekënö, ke tha hna ameköti angatre kö, tune lo hna cinyanyin ngöne la ketre götran. Nge ame asë hi la itre ka sisinyi thoi, ke tha hna ameköti angatre kö, tune lo hna cinyanyin ngöne la ketre götran. 4 ‘Hnenge hna upe la hnëjine cili,’ öni Iehova joxu ne la itre trongene isi e hnengödrai, ‘nge tro ej a lö hnine la uma ne la atr ka atrekënö, me hnine la uma ne la atr ka sisinyi thoi ngöne la ëjeng. Tro ej a lapa ngöne la uma cili, me lep apatren ej asë, me itre ikapa, me itre etë.’”
5 Thupene lai, hnene la angela ka ithanata me eni hna easeny me hape: “Pane gala jë draië, nge goeëne la ka mama.”
6 Öninge jë hi: “Nemene lai?”
Öni nyidrë: “Ame la ka mama, ke ketre itrengen ka ca efa.”* Öni angeice hmaca jë: “Celë hi pengöne la itre atr e cailo fen.” 7 Nge hnenge hna öhne la kola fe la ithingen ka raon nge hna kuca hnei plo. Hetre föe e kuhu hnine lai trengen. 8 Ame hnene la angela hna hape: “Iakötrë la ëjene la föe cili.” Matre hnei nyidrëti hmaca hna ukun alöne lai föe e hnine la trengen, me thinge hmaca hnene lo ithingen ka hace hna kuca hnei plo.
9 Nge hnenge hna gala draië me öhne la lue föe ka alem, me sesë draië hnine la eny. Hetre iape i nyidro kösë iape ne sigony. Hnei nyidro hna xome la itrengen, me kapa draië nyipine la ihnadro me hnengödrai. 10 Matre hnenge hna hnyingën kowe la angela ka ithanata me eni ka hape: “Nyidroti a xom a tro ië la itrengen?”
11 Öni nyidrëti jë hi: “Kowe la nöje Sinara.* E cili, tro nyidroti a xupi uma thatraqane la föe. Nge e fenesi hë, ke tro ha amë la föe; e cili hi la göhne i angeic.”