Iobu
24 “Hnauëne laka, tha hnene kö la Ka Tru Trenge Men hna sa la drai?
Nge hnauëne laka, tha öhne kö la drai cili* hnene la itre ka atre nyidrë?
2 Hetre itre xan ka ahuëne la itre ifego;
Nge angatr a atrekënö la hnënge öni thatraqai angatre kö.
3 Angatr a thapa la boliko ne la nekön hna mecitrij hnei kem
Nge angatr a xome la kau ne la sine föe nyine hatren ne ti gufa.
4 Angatr a ukune la itre ka pë ewekë troa jea qa ngöne la gojeny;
Nge kola zae angatr hnene la itre ka kucakuca e celë fen.
5 Ame la itre ka pë ewekë, angatr a thele xen tune la itre boliko wael ne hnapapa;
Angatr a thele xen ngöne la hnapapa thatraqane la itre nekö i angatr.
6 Angatr a menuëne la ifekë hlapan*
Me hleme la munëne vin ne la itre atre ka ngazo.
7 Pëkö iheetre i angatr, nge angatr a meköle xöe;
Pëkö isitre i angatr ngöne la ijine hnötr.
8 Cabi hë angatr hnene la mani qa ngöne la itre wetr;
Nge pine laka, pëkö hnë zae i angatr, angatr a lapa fene la itre git.
9 Hna thepe thine la nekönatr hna mecitrij hnei kem;
Nge kola xome la itre iheetr ne la atre ka pë ewekë nyine hatrene ti gufa,
10 Celë hi matre angatr a pë iheetr me tro xöe,
Me mecijiin, ngo angatre pe a thu la itre uke qitr.
11 Nge nyipine la itre ngöne uma ne la hnënge vin, angatr a meci hnei hedredrei;*
Nge angatr a wejeweje wene vin,* ngo angatre pe a meci hnei pi ij.
12 Kola awe ngöne la traon hnene la itre ka treqene troa mec;
Nge kola sipo ixatua hnene la itre ka eatr,
13 Nge ame itre xan, angatr a thipetrije la lai;
Tha wangatrehmekune kö angatre la itre gojeny,
nge tha xötrethengene kö angatre la itre hmene gojeny.
14 Kola ihlë e hmahmakanyi hnene la atre ihumuth;
Nge angeic a humuthe la itre ka kucakuca me itre ka pë ewekë,
Nge ame e jidr, angeic a atrekënö.
15 Ame la luemeke ne la atre nyixetë, angeic a treqene troa lö la jö,
Me hape: ‘Pëkö ka troa öhnyi ni!’
Nge angeic a juetrëne la iqëmeke i angeic.
16 Ngöne la melöhlem, angatr a lö juetrë ngöne la itre uma;
Nge ame e lai, angatr a umë ngöne la itre hnalapa i angatr.
Tha öhne kö angatre la lai.
17 Ke ame koi angatr, ceitune hi la hmakany memine la jidr;
Nge atre hnyawa hi angatre la itre ewekë hna xouen ngöne la gaa melöhlem.
18 Ngo hna canga huli angatr hnene la itre tim.
Nge tro ha hnëjine la edrö i angatr ngöne la nöj.
Nge tha tro hmaca kö angatr a bëeke kowe la hnënge vine i angatr.
19 Nge tune la kola patre la timi ne kiona hnene la ecatrene la hedredrei,
Kola xome la itre atre ka ngazo hnene la Hua!*
20 Nge tro ha thëthëhmi angatr hnene la itre thine* i angatr, nge tro hë angatr a hnyapa kowe la itre wanak.
Tha tro hmaca kö a meku angatr.
Nge tro ha hutra la ewekë ka tha meköti kö tune la ketre sinöe.
21 Angatr a folosane la föe ka tha hnaho,*
Me qanangazone la sine föe.
22 Tro hë Akötresieti* a huliwane la mene i nyidrë matre apatrene la itre atre ka catr;
Ngacama angatr a pi draië, ngo thatre kö angatr laka, tro jë kö angatr a mel.
23 Eje hi, Akötresieti* a nue angatr troa kuci mekun me mele tingeting,
Ngo luemeke i nyidrë a goeëne la nöjei huliwa i angatr.
24 Angatr a draië koi hnepe ijin me patr.
Kola thaipië angatr, nge angatr a mec tune la nöjei atr asë;
Hna thupatriji angatr me xawa angatr tune la uke qitr.
25 Haawe, drei la ka troa qaja ka hape, ka thoi ni
Maine elë hune la hnenge hna qaja?”