Ezekiela

23 Hnei Iehova hmaca hna ithanata koi ni me hape: 2 “Nekö i atr, hetrenyi la lue föe, casi hi la thine i nyidro. 3 Hnei nyidro hna nyi föe ne gojenyi e Aigupito; hnei nyidro hna nyi föe ne gojeny qane lo co petre kö nyidro. E cili, hna öje la lue thi i nyidro, me jieji la imano i nyidro hna tha ketr pala kö hnei trahmany. 4 Ahola* la ëjene la ka tru, nge Aholiba* la ka co. Lue föenge nyidro, nge hnei nyidro hna hnahon la itre nekön trahmanyi me jajiny koi ni. Ame Ahola, ke Samaria, nge Ierusalema lae Aholiba.

5 “Hnei Ahola hna nyiqaane nyi föe ne gojeny ngo föeng pala kö angeic. Hnei angeic hna meciune la itre hanyi angeic, lo angetre Asuria ka lapa easenyi angeic. 6 Angatre lo itre gavena ka heetrë ka bulu me itre atre amekötin. Ka mingöming asë hi la itre nekö trahmanyi cili, nge itre ka ti hos asë hi angatr. 7 Hnei angeic hna kuca catrën la ngazo memine la itre atr ka hlemu e Asuria, me apuingazo angeice kö hnene la itre idrola ka sis* ne la itre atr hnei angeic hna hmo fë. 8 Tha ase kö angeice nuetrij la aqane nyi föe ne gojenyi angeic e Aigupito, ke hnei angatre lo hna ce meköl me angeic lo co petre kö angeic, me öje la lue thi i angeic hna tha ketr hnei trahmany, me amejin la itre aja* i angatr ka sis me angeic. 9 Matre hnenge hna nue angeic kowe la itre hanyi angeic qa Asuria, lo hnei angeic hna meciun. 10 Ame hnei angatr hna amamane la ngönetrei i angeic ka xöe, me xolouth la itre nekö i angeic trahmanyi me jajiny, me humuthi angeic hnei taua. Hlemu hë angeic thene la itre föe, nge hnei angatr hna eatrën la pun hna amekötin koi angeic.

11 “Ame ju hi la kola goeëne lai hnei Aholiba jini i angeic, tru catre hmaca kö la trenge aja i Aholiba, nge ngazo catre kö la aqane nyi föe ne gojeny i angeic hune lo mama i angeic. 12 Hnei angeic hna meciune la angetre Asuria ka lapa easenyi angeic, lo itre gavena me itre atre amekötin, ka heetrë iheetre ka mingöming nge ka ti hos; ka mingöming asë hi la itre nekö trahmanyi cili. 13 Ame hë la angeic a puingazo, öhne ju hi ni laka, casi hi la aqane ujë i nyidro. 14 Ngo sisi hmaca ju kö la aqane nyi föe ne gojenyi angeic hune la mama i angeic. Hnei angeic hna öhne la itre idrola ka ceitu me trahmanyi ne Kaledaia hna saasa ngöne la ngöne uma, nge hna peidrëne hnei ka madra, 15 nge ka otre beletr ngöne la gö i angatr, me atu he, nge ka ceitu me itre soc; ame asë hi la itre idrola, ke ka nyihatren la itre trahmanyi ne Babulona, hna hnahon ngöne la nöje Kaledaia. 16 Ame ju hi la angeic a öhnyi angatr, hnei angeic hna nyiqaane meciu angatr, me upe la itre ka tro fë maca a tro Kaledaia. 17 Nge hnene la itre nekö trahmanyi ne Babulona hna traqa kowe la ili hna hnëkën hnei angeic göi troa ce meköl, me apuingazo angeic hnene la itre aja* i angatr ka sis. Nge thupene la hna ase apuingazo angeic hnei angatr, hnei angeic hna trotrij me sisi angatr.

18 “Pine laka, pëkö hmahma i angeic troa nyi föe ne gojeny, me amamane la ngönetrei i angeic ka xöe, hnenge hna sisin me trotriji angeic, tune lo aqane sisin me trotrije ni la mama i angeic. 19 Nge tha mano kö angeice nyi föe gojeny. Celë hi ka amekunë angeic lo angeic a nekö jajiny, me nyi föe ne gojeny e Aigupito. 20 Angeic pala hi a hmo fë la itre hanyi angeic, tune la föe ne la ketre trahmany laka, ka tru la kahmitrötre i nyidrë tune la kahmitrötre i boliko maine hos. 21 Eö pala hi a treije pine lo aqane ujë i ö ka sis e Aigupito, lo eö a nekö jajiny, nge kola jieji la imano i ö, lo lue thi i ö ka xötrei cia.

22 “Haawe, hane hi la hnei Iehova Joxu Ka Sisitria hna qaja koi ö Aholiba: ‘Tro ni a upe lo itre hanyi ö, lo itre hnei ö hna sisin me trotrij, matre tro angatr a traqa qa ngöne la nöjei götran me lepi ö: 23 ene la itre nekön trahmanyi ne Babulona, me angetre Kaledaia asë, me itre trahmanyi ne Pekoda, me Shoa, me Koa, memine la angetre Asuria asë. Ka mingöming asë hi angatr, itre gavena, me angetre amekötin, me itre soc, me itre trahmany hna iëne hnyawa,* nge ka ti hos. 24 Tro angatr a lepi ö ngöne la mejen la itre ikariota, me itre wil, me itre soc ka nyimutre, me itre petre ka tru me ka co,* me itre itrapetre ne isi. Tro hë angatr a cile xötreithi ö, nge tro ni a aijijë angatr troa ameköti ö, me tranyi ö thenge la aja i angatr. 25 Tro ni a amamane la elëhning koi ö, nge tro hë angatr a axösisi ö. Tro angatr a thupa la hnafiji ö me lue hnangenyë i ö, nge tro ha humuthe hnei taua la itre ka mele pe thei ö. Tro angatr a kötre fë la itre nekö i ö trahmanyi me jajiny, me dreuth amelen la itre ka mele pe. 26 Tro angatr a thapa la itre iheetre i ö, me atrekënö la itre nyine thaip i ö. 27 Tro hë ni a nyipune la itre huliwa i ö ka sis, memine la aqane nyi föe ne gojenyi ö, lo huliwa hnei ö hna nyiqaan e Aigupito. Nge tha tro hmaca kö eö a goeë angatr me meku Aigupito.’

28 “Ke hane hi la hna qaja hnei Iehova Joxu Ka Sisitria: ‘Easenyi hë tro ni a nue eö kowe la itre hnei ö hna methinën, lo hnei ö hna sisin me trotrij. 29 Tro angatr a methinë eö me thapa la nöjei ewekë hnei ö hna huliwa meci kow, nge tro angatr a acile xöeë eö, me nue eö troa pë iut. Tro ha mama la aqane ngazo ne la itre huliwa i ö ka sis, memine la itre thiina i ö ka sis, memine la aqane nyi föe ne gojenyi ö. 30 Tro ha ujë tune koi ö, pine eö huzune la itre nöj tune la ketre föe ne gojeny, ke pui ngazo hë eö hnene la itre idrola i angatr ka sis. 31 Ceitune hi la aqane ujë i ö memine la mama i ö; celë hi matre, tro ni a hamë eö la vere i angeic.’

32 “Hane hi la hna qaja hnei Iehova Joxu Ka Sisitria:

“Ke ase hë ni qaja,” öni Iehova Joxu Ka Sisitria.’

35 “Matre hane hi la hna qaja hnei Iehova Joxu Ka Sisitria: ‘Pine eö thëthëhmi ni me trotriji* ni, tro hë eö a xeni pune la aqane ujë i ö ka sis, me itre aqane nyi föe ne gojenyi ö.’”

36 Thupene lai, öni Iehova koi ni: “Nekö i atr, tro kö eö a qaja la pun koi Ahola me Aholiba, me wesitrë nyidro pine la aqane ujë i nyidro ka sis? 37 Hnei nyidro hna nyixetë* me aneni madra. Kösë tha ijije kö la nyidroti a nyixetë memine la itre idrola ka sis, matre hnei nyidroti fe hna hane dreuthe* la itre nekö i nyidro trahmany, lo hnei nyidro hna hamë ni, matre tro pena a thue ane la itre idrola. 38 Nge hane mina fe la hnei nyidroti hna kuca: hnei nyidroti hna apuingazon la hnë hmi koi ni ngöne la drai cili, me adrone la itre sabathing. 39 Thupene ju hi la nyidroti a ase huujën la itre nekö i nyidro trahmany kowe la itre idrola ka sis, hnei nyidro hna lö ngöne la uma ne hming, matre adron ej. Celë hi huliwa i nyidro ngöne la umang. 40 Goi upe fe nyidro la ketre atre tro fë maca troa theng la itre trahmanyi qa gaa nany. Angatr pala hi e cahu gojeny, nge hnei ö Aholiba hna si, me tha paudrane la luemeke i ö, me amingömingöi ö hnei itre nyine thaip. 41 Hnei ö hna lapa hune la ketre göhnë ka mingöming, qëmekene la laulau hna hnëkën. Nge hnei ö hna atë hune la laulau cili, la nyine dreu ka pui loi koi ni me oeleng. 42 Qa cili hi la mejene la itre trahmany ka mele menu, nge hetrenyi thei angatr la itre ka iji gorok hna traqa fë qa ngöne la hnapapa. Hnei angatr hna hnö otrene wanakoime kowe la itre föe, me petrë angatr hnei korona ka mingöming.

43 “Ame hnenge hna qaja göne la föe hna angazon menun qa ngöne la hna nyixetë: ‘Ngazo pe, tro pala kö angeic a nyi föe ne gojeny.’ 44 Matre hnei angatr pala hi hna tro kowe la hnalapa i angeic, tune la kola tro koi föe ne gojeny. Celë hi aqane ujë i angatre koi Ahola me Aholiba, lue föe ka kuca la itre huliwa ka sis. 45 Ngo tro kö la itre trahmany ka meköt, a ameköti angeic* pine la aqane nyixetë me ihumuth i angeic. Ke eje hi, lue föe ka nyixetë nyidro, nge ka si madra la lue ime i nyidro.

46 “Ke hane hi la hna qaja hnei Iehova Joxu Ka Sisitria: ‘Tro ha upe la ketre trongene isi troa lepi nyidro. Tro ej a kuca matre tro nyidroti a ketre ewekë hna xouen me nyine atrekënön. 47 Tro la trongene isi cili a tranyi nyidro hnei etë, me humuthi nyidro hnei taua. Tro angatr a humuth la itre nekö i nyidro trahmanyi me jajiny, me dreuthetrije la itre uma i nyidro. 48 Tro ni a apatrene la itre thiina ka sis qa ngöne la nöj. Nge tro asë hi la itre föe a xomi ini qa ngön, nge tha tro kö angatr a xom la itre thiina i epon ka sis. 49 Tro angatr a kuca matre, tro epon a xeni pune la thiina i epon ka sis, me itre ngazo hnei epon hna kuca memine la itre idrola i epon ka sis. Nge tro hë epon a atre laka, Iehova ni Joxu Ka Sisitria.’”