Nyima i Solomona
7 “Nekö jajinyi ka lolo thiina,
Mingöminge catre la lue ca i ö hnine la lue butre i ö!
Ceitune hi la elolone la inaea i ö me ketre nyine amingömingön,
Hna kuca hnene la atr ka atreine huliwan la lue ime i angeic.
2 Ceitune hi la pit i ö me ikap ka raon.
Nge hna nyialiene pala hi hnei waina hna ithuenyikön.
Ceitune hi la hni i ö me uke qitr,
Nyipine la itre lili.
3 Ceitune hi la lue thi i ö me lue neköi drube,
Lue fini hna hnahon hnene la gazel.
4 Ceitune hi la nyinawa i ö me ita ne thup hna kuca hnei jia ne elefa.
Ceitune hi la luemeke i ö me itre basë ne Hesebona,
Ezine la qëhnelö ne Bathe-Rabim.
Ceitune hi la hnafij i ö me ita ne thup ne Lebanona,
Ka qëmek koi Damaseko.
5 Ka mingöminge la he i ö tune la wetre Karemela,
Nge ceitune hi la itre penehe* i ö me drela ka madra mit.
Joxu a haine* la penehe i ö ka elelewa.
6 Ekölöhini ö jajinyi hniminang, ka mingöminge catre kö eö me lolo
Hune la nöjei ewekë asë!
7 Ceitune hi la eqea i ö memine la pama,
Nge ceitune hi la lue thi i ö me itre wene pama.
8 Öning: ‘Tro ni a eli ipama
Matre troa huje la itre wen.’
Epi tro la lue thi i ö a tune la itre fini rezë,
Epi troa pupui lolo la hnamano i ö tune la itre wene pom,
9 Nge epi tro la që* i ö a tune la waina ka sisitria catr.”
“Epi tro ej a ucic ngöne la nyinawa ne la hniminang,
Tune la waina ka neni hmidra hune la ukeineqë ne la itre ka meköl.
10 Eni hë la edrö ne la hniminang,
Nge eni hi la aja i angeic.
11 Hniminange fe, trohemi,
Ce tro jë so ngöne la itre hlapa;
Tro nyiso a lapa nyipine la itre feja ka pui loi.*
12 Tro nyiso a canga ilë me tro kowe la hna traa vin
Matre wang ka hape, xöle jë kö la itre vin,
Thithë jë kö la itre iengen,
Nge enge jë kö la itre igrenad.
Tro hë ni e cili a amamai ö la trenge ihniming.
13 Kola punepune catre la ketre pengöne feja;
Hetrenyi la nöjei pengöne wene sinöe ka hnyapa ngöne la qëhnelö i nyiso.
Hniminange fe, hnenge hna amë acon koi ö,
La itre wene sinöe hna hnyipi huj me itre ka he cili hë.