Levitiko

27 Öni Iehova hmaca jë hi koi Mose: 2 “Hape jë kowe la angetre Isaraela: ‘Maine tro la ketre atr a sisinyi troa hamëne la ewekë ka ketre pengöne koi Iehova, ene la thupene la ketre atr, 3 tro la thupene la trahmanyi ka 20 uti hë 60 lao macatre, a 50 sekel* sileva, thenge la tulu ne sekel* ne la götrane gaa hmitrötr. 4 Ngo maine föe, ke troa hamëne la 30 sekel. 5 Ame la thupene hna athip kowe la nekö trahmany, ka 5 uti hë 20 lao macatre, ke 20 sekel. Nge 10 sekel kowe la nekö jajiny. 6 Nge ame la thupen hna athip kowe la nekö trahmanyi ka ca treu uti hë 5 lao macatre, ke 5 sekel sileva, nge köni sekel sileva kowe la nekö jajiny.

7 “‘Ngo maine ka 60 lao macatre ne la trahmanyi a tro draië, ke tro ha hamëne la 15 sekel, nge maine föe, ke tro ha hamëne la 10 sekel. 8 Ngo maine ka pë ewekë la atre sisiny troa nyithupene la mani hna athip, qa i angeic troa cile qëmekene la atre huuj, nge tro la atre huuj a athipe la thupe i angeic. Tro la atre huuj a athipi thupen, thenge la hna atreine hamën hnene la ka sisiny.

9 “‘Nge maine ame la ewekë hna sisinyi, ke ketre öni nyine huuj thatraqai Iehova, ame asë hi la hna troa hamëne koi Iehova, ke troa hmitrötr. 10 Tha ijiji angeice kö troa nyihnan maine saze la ketre öni ka loi hnene la öni ka ngazo, maine la öni ka ngazo hnene la ka loi. Nge maine tro angeic a saze la ketre öni hnene la ketre, ke tro lue ej asë a hmitrötr. 11 Nge maine tro la öni a pui ngazo, nge tha ijije kö troa huujën koi Iehova, tro angeic a amë la öni qëmekene la atre huuj. 12 Nge tro hë la atre huuj a athipe la thupen ej, ngacama ka loi maine ka ngazo la öni. Nge tro hi a kapa la thupen hna athip hnene la atre huuj. 13 Nge maine tro la atr a itön ej hmaca, qa i angeic troa nyixan hnene la hna 5 ne la mani hna athip.

14 “‘Nge maine tro la ketre atr a masuan* la uma i angeic thatraqai Iehova, kösë ketre ewekë ka hmitrötr, tro hë la atre huuj a athipe la thupen ej, ngacama ka ngazo maine ka loi la uma. Tro ha athipe la thupen ej, thenge la hna qaja hnene la atre huuj. 15 Nge maine tro la atre ka ahmitrötrëne la uma i angeic, a itön eje hmaca, qa i angeic troa nyixan hnene la hna 5 ne la mani hna athip, nge tro hë ej a ewekë i angeic.

16 “‘Nge maine tro la ketre trahmanyi a masuan thatraqai Iehova, la ketre götrane la zi i angeic, ke ame la mani hna athip thenge la feja ka ijij nyine traan, tre 50 lao sekele sileva koi ca omera* ne feja ne bali. 17 Nge maine tro angeic a ahmitrötrëne la zi i angeic, qaane la macatre ne Iubeli, tro kö a eje la thupene hna athip. 18 Nge maine tro angeic a ahmitrötrën* la zi i angeic thupene la Iubeli, qa ne la atre huuj troa acone la thupen, thenge la munëne la itre macatre, uti hë la ketre macatre ne Iubeli. 19 Nge maine tro la atr ka ahmitrötrëne* la zi i angeic a itöne hmaca, qa i angeic troa nyixan hnene la hna 5 ne la thupene hna athip, nge tro ha zi i angeice la hlapa. 20 Nge maine tha angeice kö a itöne hmaca lai hlapa, nge ase hë salemën ej kowe la ketre atr, tha ijije kö troa itöne hmaca lai hlapa. 21 Nge ngöne la Iubeli, tro la atre itön a nue la hlapa, nge tro ej a ewekë ka hmitrötr thatraqai Iehova, tune la ketre hlapa hna amë* thatraqane la itre huliwa ka hmitrötr. Tro la hlapa cili a ewekë ne la itre atre huuj.

22 “‘Nge maine tro la ketre atr a masuan thatraqai Iehova la ketre hlapa hnei angeic hna itön, ngo tha götranene kö la lapa i angeic, 23 tro hë la atre huuj a e la thupen hna athip ne lai hlapa, uti hë la macatre ne Iubeli. Nge ngöne ju kö la drai cili, tro la atr a nyithupen ej. Celë hi ewekë ka hmitrötr thatraqai Iehova. 24 Ngöne la macatre ne Iubeli, troa bëeke hmaca la hlapa kowe lo atre pane salemën, ene lo atrekë zin ekö.

25 “‘Nge ame la thupen hna athip asë, ke thenge la tulu ne sekel ngöne la götrane gaa hmitrötr. Nge ame la 20 gera,* ke ca sekel.

26 “‘Ngo tha tro pi kö a masuan la pane neköne la itre öni, ke öni lai hna pane hnahon thatraqai Iehova. Itre kau ju hë maine itre mamoe, itre ewekë i Iehova lai. 27 Nge maine ka pui ngazo la öni, nge kola itön ej thenge la thupen hna athip, ke troa nyixan hnene la hna 5 ne la thupen hna athip. Nge maine pëkö ka itöne lai öni, ke tro ha salemën ej thenge la thupen hna athip.

28 “‘Maine tro la ketre atr a masuan* la itre ewekë i angeic koi Iehova epine palua,* ene la ketre atr, maine ketre öni, maine ketre hlapa i angeic, tha tro kö angeic a salemën maine itöne hmaca. Ngo tro hë itre ej a nyipi hmitrötr, ke itre ewekë i Iehova lai. 29 Ketre, tha tro kö a itöne hmaca la atre hna amekötine troa humuth, loi pe, troa humuthi angeic.

30 “‘Ame la hna 10 ne la itre ewekë hna acian hnene la ihnadro, lo hna menuën ngöne la itre hlapa, me hune la itre sinöe, ke thatraqai Iehova. Itre ewekë lai ka hmitrötre koi Iehova. 31 Maine ketre atr a ajane troa itöne hmaca la ketre hnep ne la hna 10 ne la itre ewekë i angeic, ke tro hë angeic a nyixan hnene la hna 5. 32 Ame la itre hna 10 ne la itre öni ka tru maine ka co, ene la itre öni hna engën hnene la tö ne la atre thupë mamoe, ke tro hë la hna 10 ne öni, a ewekë ka hmitrötr thatraqai Iehova. 33 Tha tro kö angeic a thele troa wange ka hape, ka loi maine ka ngazo la öni me saze la öni. Nge maine angeic a thele troa saze la öni, ame la öni hnapan, memine la öni ka troa nyihnan ej, ke tro hë lue ej a hmitrötr, nge tha tro kö a itöne hmaca.’”

34 Celë hi itre wathebo hnei Iehova hna ahnithe koi Mose thatraqane la angetre Isaraela, hune la wetr e Sinai.