Isaia
30 “Ekölöhini la itre nekönatr ka pi hun,” öni Iehova,
Angatr a kuca la sipu mekuna i angatr ngo tha qaathenge kö,
Angatr a isisinyikeu* ngo tha thenge kö la uang,
Me nyixane la itre ngazo i angatr.
2 Angatr a uti a tro Aigupito, me thele ixatua thei Farao,
Me zae fene la iahnue i Aigupito
Nge tha hna pane hnyingë ni kö!
3 Ngo tro la ixatua* i Farao a ahmahmanyi epun,
Nge tro la hnë zae i epun fene la iahnue i Aigupito a thaipië epun.
4 Ke traqa ha la itre tan e Zoana,*
Nge traqa ha la itre qene qaja e Hanes.
5 Tro hë angatr a hmahma
Pine la nöj ka pëkö ca eloin koi angatr,
Ka thatreine ixatua nge ka pë hnënyöngön,
Lo nöj ka axulune la hmahma me ithaipië.”
6 Trengewekë kowe la itre öni ne kolojë:
Ame ngöne la nöj ka akötr me awe,
Lo nöj ne la liona, ene la liona ka ho,
Memine la vaipa me un ka ihej, nge ka saqe enij,*
Angatr a tro fë la itre mo i angatr hune la itre boliko
Me itre treme* i angatr hune la gaa tutup ne la itre kamela.
Ngo tha tro hmaca kö lai a nyipiewekë kowe la nöj.
7 Ke ka gufa la ixatua i Aigupito.
Celë hi matre hnenge hna ati ëje i nyën: “Rahaba, pëkö ca hna kuca.”
8 “Tro jë nge cinyianyine ju qëmekei angatr ngöne la ketre etë,
Nge cinyianyine ju ngöne la ketre itus,
Matre nyine anyipicine ka cile hut
Kowe la itre drai elany.
9 Ke nöje ka catre që angatr, me itre nekön ka thoi,
Itre nekön ka xele ma dreng la wathebo* i Iehova.
10 Angatr a qaja kowe la itre ka meköle goeën* ka hape: ‘The goeëne kö,’
Me kowe la itre ka qeje pu ka hape: ‘The qaja kö la itre hna meköle goeën ka nyipici.
Qaja jë pe la itre trengewekë hna pi dreng;* nge goeëne jë la itre pu ka iaö.
11 Jea pi qa ngöne la gojeny; iananyi pi qa ngöne la hmene gojeny.
Loi ju hë hna qaja koi huni la Atre Ka Hmitrötr e Isaraela.’”
12 Matre hane hi la hna qaja hnene la Atre Ka Hmitrötr e Isaraela ka hape:
“Pine laka, epuni a thipetrije la trengewekëng
Me mejiun kowe la iaö me thoi
Me qale kow,
13 Tro hë la ngazo celë a tune la ngöne uma ka kaqa,
Me tune la ketre hag atraqatr ka ez* nge ka troa kei.
Tro hë ej a aca tro kei.
14 Tro ej a kaqa tune la trengen ka tru ne la atre xupi inege,
Me nyilanyila, matre pë fe ca neköi wanan ej
Nyine xomi eë qa ngöne la hnaeë
Me nyine jöe tim qa ngöne la husapa.”*
15 Ke hane hi la hna qaja hnei Iehova Joxu Ka Sisitria, lo Atre Ka Hmitrötr e Isaraela ka hape:
“Tro ha amele epun, e tro epuni a bëeke koi ni, me lapa treqene hnyawa;*
Ame la trengecatre i epun, ke ene la troa lapa thaup me mejiun.”
Ngo xele kö epun.
16 Öni epuni pe: “Waea! Tro huni a kötr hune la itre hos!”
Tro epuni a kötr.
Nge öni epun: “Tro huni a tithe la itre hos ka nyinyiape catr!”
Ngo ame la itre ka troa weji epun, ke nyimenyime catre kö angatr.
17 Tro la ala 1 000 a hmengöhmengön qëmekene la elëhni ne la ala cas;
Tro epuni a kötrene la elëhni ne la ala 5
Tro pë hë la munën thei epun a tune la ketre ima* hune la wetr,
Tune la ketre hatren hune la sasala.
18 Ngo Iehova a itreqe* hnyawa matre amamane la utipine i nyidrë,
Nge tro nyidrëti a mejë matre utipi epun.
Ke Iehova la Akötresie ka meköt.
Madrine la itre ka lapa treqe* nyidrë.
19 Lapa atre ju laka, ame hë la kola lapa hmaca la nöj e Ziona, e Ierusalema, tha tro hmaca kö eö a treij. Ke tro pala hi nyidrëti* a amamane la utipine i nyidrë ngöne la eö a sipo ixatua. Nge ame hë la nyidrëti a drei eö, tro nyidrëti a sa. 20 Ngo nyipici laka, tro Iehova a hamë epuni la akötr hnane la falawa, memine la iaxösisi hnane la tim, ngo tha tro hmaca kö la Atre Ini Ka Sisitria a zae, nge tro hë eö a öhne la Atre Ini Ka Sisitria hnene la sipu luemeke i ö. 21 Nge maine tro eö a jea kowe la götrane maca maine mi, tro la lue hnangenyë i ö a dreng la aqane ewekë hutrö i ö, kola hape: “Hane hi la gojeny, trongëne jë.”
22 Nge tro hë eö a adrone la sileva ne la itre idrola i ö hna tratraun, memine la gool hna peleth hune la itre idrola i ö hna ahmun. Tro hë eö a hnatrij itre ej tune la iheetr ka si madra ngöne la kola traqa la meci föe, nge tro hë eö a qaja ka hape: “Tro pi kuhu qëhnelö!”* 23 Qa ngöne lai, tro nyidrëti a hamëne la mani thatraqane la itre feja hnei eö hna traan, nge tro hë la ihnadro a hamën atrune la falawa ka lolo.* Ngöne la ijine cili, tro hë la itre öni i ö a xeni trootro ngöne la itre hlapa atraqatr. 24 Tro hë la itre kau me itre boliko ka huliwane la ihnadro, a xeni haö me itre nyipi xen hna nyidrawan hnei pel me ifos. 25 Nge ame ngöne la drai ne ihumuth atraqatr, me ijine kei la itre ihag, tro ha hetre tim me jë i tim hune la itre wetr asë, me hune la itre sasala asë ka draië. 26 Nge ame ngöne la ijine tro Iehova a atuthe la eatrene la nöje i nyidrë, me ameune la eatr hna kuca koi angatr, ke tro ha melem la treu tune la lai ne la jö. Nge tro la lai ne la jö a a 7 lao mele catr, tune la lai ne la 7 lao drai.
27 Goeëne! Iehova* a traqa qa gaa nany,
Cememine la elëhni atraqatr, me itre iaw ka hmekön.
Tiqa ha la ihneqë i nyidrë hnei wesitr,
Nge ceitune la thineme i nyidrë me eë ka catrehnin.
28 Ceitune la ua* i nyidrë memine la tim ka neni catr nge ka elë uti hë la nyinawa,
Matre troa jumejume la itre nöj ngöne la itami ne apatren;
Nge troa amë la ketre ibirit ngöne la që ne la itre nöj matre ajeanyi angatr qa ngöne la gojeny.
29 Ngo tro la nyima i epun a tune la nyima hna nyiman e hej
Ngöne la kola hnëkë* kowe la ketre feet,
Nge tro epuni a madrin tune la ketre atr
Ka tro memine la sine ihoho*
Kowe la wetre i Iehova, lo Git i Isaraela.
30 Tro Iehova a kuca matre troa drenge la nine i nyidrë
Me amamane la ime i nyidrë ka troa lep la itre ithupëjia ngöne la elëhni atraqatr,
Cememine la ukahlokine eë ka catrehnin,
Me mani ka trotro, me wene, me wene mani ka catr.
31 Ke e drenge hë la nine i Iehova, tro ha xou hnei Asuria;
Tro nyidrëti a lepi angeic.
32 Nge ame la itre jia
Hnei Iehova hna troa hna koi Asuria
Ke troa ce tro memine la itre itrapë me itre arp
Ngöne la nyidrëti a xejë la ime i nyidrë matre troa isi me angatr.
33 Ke ase hë hnëkëne la Tofet;*
Hna hnëkëne fe thatraqane la joxu.
Hnei nyidrëti hna hnëkëne la hnaköcaeë ka isaisa me ka jui,
Hna nyialiene hnei itre sinöe me eë.
Tro la hnamano i Iehova a tune la gaz
Ka troa amelen ej.