Pane Tus Samuela
16 Öni Iehova jë hi koi Samuela: “Tro eö a treije pi Saulo uti hë eu, nge ase hë ni triji angeic, nge tha tro hmaca kö angeic a joxu ne Isaraela? Xome jë pe la ketre jiane kau, nge nyialiene pi hnei oel, nge tro jë hë. Tro jë koi Iese atre Bethelema, ke ase hë ni iëne la ketre nekö i angeic troa joxu.” 2 Ngo öni Samuela ka hape: “E tro hë ni koilo, tro hë Saulo a atre, nge tro nyidrë a humuthi ni.” Matre öni Iehova: “Xome jë la ketre neköi kau föe, nge tro eö a hape: ‘Eni a traqa troa huuje koi Iehova.’ 3 Nge tro fe eö a hë Iese troa sine la huuj, nge tro hë ni a qaja koi eö la nyine kuca. Nge ame la hnenge hna troa amamai eö, angeice hi la nyine tro eö a iëne koi ni.”
4 Samuela a kuca jë la hnei Iehova hna qaja. Ngo ame la nyidrëti a traqa e Bethelema, nge kola öhnyi nyidrë hnei itre qatr ne la traon, angatr a hmengöhmengön hnei xou, matre öni angatr: “Trongene tingetinge la tronge i nyipë?” 5 Sa jë hi Samuela ka hape: “Trongene tingeting, eni hi la, ke tro ni a tro fë huuj koi Iehova. Matre ahmitrötrë nyipunieti jë, nge jë fe troa sine la huuj.” Thupene lai, Samuela a ahmitrötrë Iese jë, me itre nekö i angeic. Nge Samuela a hë angatr jë kowe la hna huuj. 6 Matre ame hë la angatr a traqa, hnei Samuela hna öhnyi Eliaba, matre öni Samuela pena kö ka hape: “Ma angeice hi la hna iën hnei Iehova.” 7 Ngo öni Iehova jë hi koi Samuela: “The amenu eö kö hnene la iqëmek me hmae i angeic, ke tha angeice kö la hnenge hna iën. Tha ceitu kö la aqane waiewekë i atr me Akötresie. Ke ame la atr, angeic a goeëne la ka mama, ngo ame kö Iehova, nyidrëti a goeëne la ka ej e kuhu hni.” 8 Ame hnei Iese hna hë Aminadaba, me mama sai angeic koi Samuela. Ngo öni Samuela: “Tha angeice kö la hna iën hnei Iehova.” 9 Thupene lai, Iese a mama sai Sama jë. Ngo öni Samuela: “Ketre tha angeice kö la hna iën hnei Iehova.” 10 Haawe, 7 lao nekö i Iese trahmany hna amamane koi Samuela, ngo öni Samuela: “Pëkö ala cas e angatr hna iën hnei Iehova.”
11 Qa ngöne lai, Samuela a hnyinge jë koi Iese me hape: “Itre nekö i eö asë hë la?” Sa jë hi Iese ka hape: “Waea, casi pala kö, kolo wene puhnen. Nyën a thupë mamoe.” Öni Samuela jë hi: “Nga upi ketre jë troa hë nyën, ke tha tro kö sa xen, e patre pala kö nyën.” 12 Iese a upi ketre jë troa thei Dravita, me amamai nyën koi Samuela. Nge nekö trahmanyi Dravita, nge ka lolo la ialameke i nyën, nge mingöminge catre nyën. Ame hnei Iehova hna upi Samuela me hape: “Mejë jë, nge ië nyëne jë, ke nyëne hi lai.” 13 Samuela a xome pi lo jian, me nei oel hui Dravita nyipine la itre mama i nyën. Matre qaane la drai cili, hna huliwa catre la ua i Iehova thei Dravita. Nge e thupen, hnei Samuela hmaca hna bëek a tro Rama.
14 Tha huliwa hmaca kö la ua i Iehova thei Saulo, nge Iehova fe a nue la itre mekune ka ngazo i Saulo troa sipu axouenyi nyidrë. 15 Matre ngöne la ketre drai, önine la itre hlue i Saulo ka hape: “Tha öhne kö nyipë laka, Akötresie a nue troa axouenyi nyipë hnene la itre mekun ka ngazo i nyipë. 16 Matre joxu, eahuni hi la, nge maine tro nyipëti a upi hun, tro huni a thele la ketre atr ka atreine hnyawa elo arp. Nge e traqa hmaca jë Akötresie nue troa axouenyi nyipë hnene la itre mekun ka ngazo, tro la atre cili a elo arp, nge tro ha xapo la hni nyipë.” 17 Haawe, öni Saulo jë hi koi itre hlu: “Nga thele jë la ketre trahmany ka atreine elo arp, nge traqa sai angeice pi.”
18 Sa jë hi la ketre hlu ka hape: “Ka loi, ke atre hi ni la ketre nekö i Iese, atre Bethelema, nge ka atreine elo arp. Ketre nekö trahmanyi ka atreine isi, nge ka catr, nge ka atreine ithanata. Nekö trahmanyi fe ka mingöming, nge ce Iehova me angeic.” 19 Ame hnei Saulo hna upe la itre ka tro fë maca troa qaja koi Iese ka hape: “Upe pi koi ni la nekö i eö, Dravita, lo ka thupë öni.” 20 Matre Iese a hnëkëne jë la ketre boliko, me thue ehnefëne hnei falawa, me ca trenge waina, me ca neköi nani, matre tro Dravita nekö i angeic, a nyi ahnahna koi Saulo. Nge Iese a upi Dravita jë koi Saulo. 21 Ame hnei Dravita hna lö hnine la hnalapa i Saulo, me huliwa koi nyidrë. Nge Saulo a hnimi Dravita, matre hna upi Dravita troa ajö jia ne isi i Saulo. 22 Nge ngöne la ketre drai, hnei Saulo hna iupi fë maca koi Iese. Öni nyidrë: “Nue Dravita pi troa huliwa koi ni, ke hnimi angeice catre ni.” 23 Matre ame ju hi la kola nue hnei Akötresie troa lapane la he i Saulo hnei itre mekune ka iaxoueny, Dravita a xome jë la arpe i nyën, me elon. Nge kola ha xapo la hni i Saulo, me patre la itre mekune ka angazone la he i nyidrë.