Hnaaluene Tus i Aqane Lapa Itre Joxu

11 Ame hë la Reoboama a traqa e Ierusalema, hnei nyidrëti hna canga acasine la nöjei trahmanyi ne la tribu ne Iudra me Beniamina. Ala 180 000 lao sooc ka atreine isi, matre troa isi me Isaraela, me thapa hmaca la baselaia koi Reoboama. 2 Ame hnei Iehova hna qaja koi Semaia, atre ne la nyipi Akötresie me hape: 3 “Qaja jë koi Reoboama joxu ne Iudra, lo nekö i Solomona, me kowe la angetre Isaraela asë ka mel e Iudra me Beniamina ka hape: 4 ‘Hane hi la hna qaja hnei Iehova: “The tro kö epuni a isi memine la itre trejin me epun, ngo tro pe epuni a bëeke koi isa hnalapan, ke eni la ka axulune la jole cili.”’” Ame hnei angatr hna drenge la hna qaja hnei Iehova, me isa bëeke koi hnalapan, matre tha isi ju kö angatr me Ieroboama.

5 Nge hnei Reoboama hna lapa e Ierusalema, me xupe la itre traon hna eköhagen ngöne la nöje Iudra. 6 Matre hnei nyidrë hna eköhagenyi* Bethelema, me Etama, me Tekoa, 7 me Bethe-zur, me Soko, me Adulama, 8 me Gatha, me Maresa, me Zif, 9 me Adoraima, me Lakisa, me Azeka, 10 me Zorea, me Aialona, me Heberona, itre traon hna eköhagen ngöne la nöje Iudra me Beniamina. 11 Ketre, hnei nyidrë hna acatrene hmaca la itre götran hna eköhagen, me acili tan, me hamë xeni koi angatr, me oel, me waina. 12 Nge hnei nyidrëti hna thue petr ka tru, me itre jo kowe la itre traon. Nyidrëti a acatrene catrëne jë la itre traone i nyidrë, nge Iudra me Beniamina la lue nöj ka lapa fene la mus i nyidrë.

13 Nge ame la itre atre huuj me angetre Levi ne Isaraela asë, hnei angatr hna isa traqa qa ngöne la itre nöje i angatr, matre sajuë Reoboama. 14 Nge hnei angetre Levi, hna trotrije la itre hnepadro, me itre zi angatr, nge angatr a tro ju a tro Iudra, me Ierusalema. Hna traqa lai, ke hnei Ieroboama me itre nekö i nyidrë, hna ami angatr qa ngöne la hnëqa i angatr, ene la troa atre huuj koi Iehova. 15 Hnei Ieroboama hna acil la itre sipu atre huuje i nyidrë, troa huliwa ngöne la itre hnë hmi gaa hmitrötr, me acile la itre atre huuj thatraqane la hmi ne la itre haze,* kösë nani trahmany, me itre neköi kau gool hnei nyidrëti hna kuca. 16 Ngo ame la itre atrene la nöjei tribu ne Isaraela ka thele catrë Iehova Akötresi Isaraela, hnei angatr hna xötrethenge la itre atre huuj, me angetre Levi a tro Ierusalema, matre huujëne la itre huuj koi Iehova, Akötresi ne la itre qaaqaa i angatr. 17 Nge ngöne la köni macatre, hnei angatr hna acatren catrëne la baselaia ne Iudra, me sajuë Reoboama nekö i Solomona. Ke ngöne la köni macatre, angatr a xötrethenge* la tulu i Dravita me Solomona.

18 Thupene lai, hnei Reoboama a faipoipo me Maalatha nekö i Ieremoth nekö i Dravita, me Abihaila nekö i Eliaba nekö i Iese. 19 E thupen, hnei eahlo hna hnahone la itre nekö trahmany: Ieuso, me Semaria, me Zaham. 20 Thupei eahlo, nyidrëti a xomi Maaka, lo api Abasaloma, nge hnei Maaka hna hnahone itre nekö trahmany: Abia, me Atai, me Ziza, me Selomith. 21 Hnimi Maaka catre kö hnei Reoboama, hune la itre föi nyidrëti asë, me itre xa föi nyidrë. Ke eje hi, traqa koi 18 lao föi nyidrë, nge 60 la etrune la itre xa föi nyidrë, ka hnahone la 28 lao nekö trahmany, me 60 lao nekö jajiny. 22 Ame hnei Reoboama hna acili Abia, nekö i Maaka, troa tan me atre elemeken nyipine la itre trejin me angeic. Ke aja i Reoboama troa acili joxu Abia. 23 Nge inamacan la aqane ujë i Reoboama, ke hnei nyidrë hna upe* la itre xa nekö i nyidrë kowe la nöjei götran ne Iudra me Beniamina, me ngöne la itre traon hna eköhagen, me hamë xen atrunyi koi angatr, me nyimu föe.