Ezekiela
5 “Ngo ame kö eö nekö i atr, xome jë la ca taua ka idrei nge icinyi jë memin. Cine jë la he i ö me ienaje i ö. Nge xomi tulu jë nyine tuluthe la ehacene la itre penehe i ö me itre pene i ö, nge thawa könine jë. 2 Tro eö a dreuthetrij la ca sin, hnine la traon e fenesi hë la itre drai ne cile xötreith ej. Thupene lai, tro eö a xom la ketre sin me lepelepe hnei taua xötreithe la traon.* Nge ame pë hë la hnaakönine sin, ke tro eö a hna draiën matre troa ufe enyin; tro pë hë ni a uthe la taua me weje huzun ej.
3 “Tro fe eö a xom la itre xaa pen me atuth hnine la iheetre* i ö. 4 Nge xome hmaca pi la itre xan, nge kuiëne pi ngöne la eë matre dreuthetrij. Tro la eë cili a mele trootro ngöne la nöje Isaraela asë.
5 “Hane hi la hna qaja hnei Iehova Joxu Ka Sisitria: ‘Kolo Ierusalema la. Hnenge hna ami angeic nyipine la itre nöj ka cile kanothi angeic. 6 Ngazo pe, hnei angeic hna cile kowe la itre wathebo* me itre hnenge hna amekötin. Celë hi matre, loi ju kö la aqane ujë ne la itre nöje xötreith hui angeic. Ke eje hi, hnei angeic hna thipetrij la itre wathebong, me tha metrötrën la itre hnenge hna amekötin.’
7 “Qa ngöne lai, hane hi la hna qaja hnei Iehova Joxu Ka Sisitria: ‘Ngazo catre kö la hnei epun hna kuca hune la itre nöj xötreithi epun, ke tha hnei epuni kö hna metrötrën la itre hnenge hna amekötin, me trongëne la itre wathebong. Ngo hnei epuni pe hna trongën la itre wathebo ne la itre nöj ezin. 8 Celë hi matre, hane hi la hna qaja hnei Iehova Joxu Ka Sisitria: “Traone fe, tro ni a cile koi ö, nge eni kö la ka troa të koi ö qëmeken la itre nöj. 9 Ame la hnenge hna troa kuca koi ö, ke tha hane fe kö ni kuca tun koi itre xan ekö, nge tha tro hmaca kö ni a kuca tun, pine la nöjei thiina i ö ka sis.
10 “‘“Nge tro hë la itre kem ka lapa thei ö a öni la itre nekö i angatr trahmany, nge tro la itre nekö trahmany a öni la itre keme i angatr. Tro ni a axulune koi ö la hnëjin, me aijene la itre ka lapa pe thei ö ngöne la nöjei götran.*”’
11 “‘Qa ngöne lai, maine nyipici laka, ka mele ni,’ öni Iehova Joxu Ka Sisitria, ‘tro ni a nuetriji* ö pine eö adrone la hnë hmi koi ni hnene la itre idrola i ö ka sis, me itre huliwa ka sis. Tha tro kö la alamekeng a utipi ö, nge ketre tha tro kö ni a meku eö. 12 Tro la ca sin ne la itre atre i ö a mec hnene la itre mec ka ixötrekeu, maine hnei jiin. Nge tro pena la ketre sin a kei xötreithi ö hnei taua. Nge tro ni a aijene la hnaakönine sin ngöne la nöjei götran,* me uthe la taua matre weje huzu angatr. 13 E cili, tro ha upu la elëhning me lapa kötre la trengehning, nge tro ha uqa la hning. Nge e ase hë ni nue la elëhning koi angatr, tro hë angatr a atre laka, eni Iehova la ka ithanata, ke eni hmekuje hi* la nyine troa nyihluen.
14 “‘Tro ni a kuca matre itra etë pe hi ö; tro hë la itre nöj ezin me itre ka cili thenge a sisi ö. 15 Nge e ase hë ni ameköti ö hnene la elëhning me trengehning, tro la itre nöje xötreith a sisi ö me methinë eö, me xouene la ewekë ka traqa koi ö, me xome la tulu i ö nyine hmekë angatr. Eni Iehova la ka qaja lai.
16 “‘Tro ni a upe koi epun la itre ane pehna hna mecin ne la jiin, matre apatrenyi epun. Tro itre ej a humuthi epun. Tro ni a canga apëne la itre kemej* i epun, matre ngazo catre pi la jiin ka lepi epun. 17 Tro ni a upe la jiin me itre öni ka ihej kowe la itre atre i ö, matre pë pi nekö i ö. Tro hnyawa a lepi ö hnene la itre mec ka ixötrekeu me itre isi, nge tro ni a upe la taua troa lepi ö. Eni Iehova la ka qaja lai.’”