Meken 34

Iesu a Iëne La Itre Aposetolo

KOLO ha troa weje la caa macatre nge sin, thupene lo hnei Ioane bapataiso hna amamai Iesu, ka hape, arenio i Akötresie, nge hnei Iesu hë hna nyiqaane cainöje kowe la nöjei atr. Ngöne lo ijine cili, hetrenyi hë la itre pane atr ka drei nyidrë, ene, Anederea, me Simona Peteru, me Iona, nge ma Iakobo fe (trejine me Ioane), me Filipo me Nathaniela (lo hna hëne fe Batolomaio). Qaane ju hi lai, nyimutre la itre xaa atr ka ce tro me angatr, me xötrethenge Keriso.

Ijine tro hë Iesu a iëne la itre aposetolo. Angatre a troa ce huliwa me nyidrë, me kapa la ketre ini ka sisitria catre kö. Ngo qëmekene troa ië angatr, Iesu a pane elë hune la wetr, me thithi ngöne la jidri ka pexej, me sipo Akötresie troa hamëne la inamacane i Nyidrë, memine la manathith. Nge hmakanyi hë, nyidrë a hëne jë la itretre drei nyidrë asë, me iëne la 12. Ngo hnene laka, angatre pala hi la itre inina i Iesu, haawe, kolo pala hi a hë angatre ka hape, itretre dreng.

Iesu a iëne jë la sikis, ene lo itre hna qeje ëjene hë e caha hun, angatre lo itre pane atr ka nyiqaane drei nyidrë. Nyidrëti a hë Mataio jë fe, lo hnei nyidrëti hna hëne ngöne la uma ne hotr. Hna iëne fe la faif, ene, Iuda (lo hna hëne Thadaio), Iuda Isakariota, Simona atre Kanana, Toma, me Iakobo nekö i Alefaio. Hna hëne fe la Iakobo celë, ka hape Iakobo ka co, ma hnene jë laka, angeice pe hi la ka co, maine ka co pena hune lo ketre aposetolo, Iakobo mina fe la ëjen.

Atrepengöne hnyawa Iesu la 12 lao atr cili, pine laka, qea ha la hnei angatre hna ce lapa me nyidrë. Ketre, itre sinee i Iesu la itre xane e angatr. Ame lo lue trejin, ene Iakobo me Ioane, lue neköi föe nyidro me Iesu. Nge kola mekune laka, ame Alefaio, trejine nyidrë me Iosefa keme i Iesu. Ketre, ame aposetolo Iakobo, ke trejine fe angeice me Iesu, ngöne laka, nekö i Alefaio angeic.

Thaa thëthëhmine kö Iesu la ëjene la itre aposetolo. Hapeu fe epun, atre angatre asë kö hnei epun? Mekune ju epuni laka, luetre la lue Simona, lue Iakobo, nge lue Iuda, ketre caa trejine me Simona Anederea la ëjen, nge hetre trejine me Iakobo, hna ati ëjen, Ioane. Haawe, ijiji epuni hë troa xome la ëje ne la eitre lao aposetolo. Ame pë hë la foa, ke, ene lo telona (Mataio), memine lo ka luelu (Toma), memine lo ka cile fene la ketre isinöe ngöne la Iesu a hë angeic (Nathaniela), nge Filipo enehmu i angeic.

Levine lao aposetolo ka qaa Galilaia tui Iesu. Atre Kana Nathaniela. Itretre Bethesaida Filipo me Peteru, me Anederea, ngo hna mele pë hë thupene e Kaperenauma hnei Peteru me Anederea, nge e cili fe la hna mele hnei Mataio. Ame Iakobo me Ioane, ke lue ka nyi ie nyidro, nge ka mele fe nyidro e Kaperenauma, maine easenyine la nöje cili. Kola mama laka, ame Iuda Isakariota lo ka wanaxoeë Iesu, angeice hmekuje hi la aposetolo atre Iuda. Mareko 3:13-19; Luka 6:12-16.

▪ Drei jë la itre aposetolo sinee i Iesu?

▪ Drei la itre aposetolo i Iesu, nge nemene la aqane tro së a amë hnyawa pala hi hnine la itre he së la itre ëje i angatr?

▪ Ka mele ekaa la itre aposetolo?