Mekene 17
Thele Jë La Lapa Xetietë Thene La Nöje i Akötresie
1, 2. Nemene la pengöne la mele ne la itre atr ngöne la fene hna aceitunëne memine la itre ewekë ka traqa kowe la itre atr thupene la ketre wene ka tru?
PANE mekune ju epun, ngazo hë la nöje hnei epuni hna mele ngön, thupene la hna lepe eje hnene la ketre wene ka tru. Ase hë fe la uma i epun, nge luzi asë hë la itre ewekë i epun. Si mana ha la xen. Pë hmaca kö nyine trengeneun. Nge hanawang, traqa xane pi hi la ketre ixatua. Tru hnei xeni me iheetre hna hamën. Hna xupe la ca uma ka hnyipixe thatraqai epun. Eje hi laka, tro epuni a olene catrëne kowe lai atr ka hamë epuni lai itre ewekë ka ijije kowe la mele i epun.
2 Ceitune hi lai memine la ewekë ka traqa koi së enehila. Tune la wene, hnene la icilekeu i Adamu me Eva hna angazone la mele ne la atr. Ame hna luzi pi lo paradraiso, ene lo hlapa hna hnëkëne thatraqane la itre atr. Qaane ju hi lai, thatreine kö la itre musi ne fene troa thapa me petrëne la itre atr qa ngöne la itre isi, me ihumuth, memine la itre huliwa ka qali. Tha ithuane kö hnei hmi la itre atr hnene la xeni ne ua, celë hi matre mecijine catre la ka alanyim. Ngöne la götrane la ua, Iehova Akötresie a hamëne enehila la xen, me ihetr, memine la hnë troa zae. Nemene la aqane kuca i Nyidrë?
“HLUE KA NYIPICI ME KA INAMACAN”
3. Hnei Iehova hna hamëne tune ka la hna ajane hnene la itre atr, nge nemene la itre tulu ka amamane lai?
3 Eje hi laka, hna hamëne pala hi kowe la itre nöje ka cile kowe la itre jole ka tru, la itre ixatua ka ijije jëne la ketre organizasio, ketre tui Iehova, Nyidrëti a hamëne jëne la ketre organizasio, la itre ewekë ne la ua hna ajane hnene la nöje i Nyidrë. Hanawange la nyine ceitun, Ngöne la 1500 lao macatre, ke, angetre Isaraela la “ekalesia i Iehova.” Alanyimu thei angatr, itre hnei Akötresie hna upe troa inine la Trenge Wathebo i Nyidrë. (1 Aqane lapa ite Joxu 28:8; 2 Aqane lapa itre Joxu 17:7-9) Ngöne la hneijine i Iesu, ke, hnei Iehova hna acile la organizasio thatraqane la itre keresiano. Hna acile la itre ekalesia, nge itre eje a huliwa fene la musi ne la koleji satarale hna cilëne hnene la itre aposetolo memine la itre qatre thup. (Ite Huliwa 15:22-31) Ketre tune fe enehila, Iehova a hamëne kowe la nöjei atr, la hnei angatre hna ajane jëne la ketre hnepe lapa ka caas. Hnei drei hna qaja koi së la mekune cili?
4. Drei la ka amamane ka hape, angeice hi la “hlue ka nyipici me ka inamacane” ngöne la hnedrai së enehila, nge tune ka la aqane kapa i angatre la itre hna hnëkëne hnei Akötresie ngöne la ua?
4 Hnei Iesu hna qaja ka hape, ngöne la ijine traqa i nyidrë troa cile ngöne la Baselaia, tro hë nyidrëti a öhne la “hlue ka nyipici me ka inamacan” kola thewe “xeni ngöne la nyipi ijin” kowe la itretre drei i Nyidrë. (Mataio 24:45-47) Ame la Iesu a Joxu e hnengödrai ngöne lo macatre 1914, drei la ka amamane ka hape angeice hi la “hlue?” Eje hi laka, thaa celë kö lo itre keme ne hmi, ka hane qaja ka hape itre keresiano fe angatr. Ngöne lo pane isi ka tru e celë fen, ke, angatre pe kö a ithuane la itre atrene la hmi hnei poropagade, ene la itre mekune nyine qeje eloine la politik, matre isigöline la nöjei angatr. Ngo ame ngöne la ketre götrane ke, hetrenyi la ketre xeni ka loi hna hamëne ngöne la nyipi ijin ka ijij, jëne la ketre hnepe lapa, ene la itre nyipi keresiano hna iëne hnene la uati hmitrötre i Akötresie, itre xaa atrene lo hnei Iesu hna hëne ka hape “hnënge mamoe ka xalaith.” (Luka 12:32) Tha hnene kö la itre keresiano cili hna nyi xölene la itre musi ne fen, ngo angatre a cainöjëne la Baselaia i Akötresie. Celë hi matre ngöne la itre macatre, ke, hna xötrethenge la “hlue” hna iëne troa kuca la nyipi hmi hnene la itre milio lao atr, ene lo hna hëne ka hape, “itre xaa mamoe” ka thele la meköt. (Ioane 10:16) Jëne la ‘hlue ka nyipici’ memine la koleji sataral ne la hnedrai së, Akötresieti a eatrongëne hnyawa la lapa ka ca hae i Nyidrë, matre troa thawa ngöne la götrane la ua, la xen, me ihetr, me hnapo kowe la ange ka ajane troa öhnyi loine itre ej.
“XENI NGÖNE LA IJINE KA IJIJ”
5. Nemene la pengöne la mele ne la atr ngöne la ua enehila e celë fen, ngo nemene la nyine tro Iehova a kuca ngöne la götrane cili?
5 Hnei Iesu hna qaja ka hape: “Tha tro kö a mele la ate hnei areto hmekuje hi ngo hnene la nöjei tenge ewekë ka xulu qa ngöne la ine ula i Akötesie.” (Mataio 4:4) Ame la engazone ke, alanyimu catre kö la itre atr ka xome ahmalohmaloeëne la itre trenge ewekë i Akötresie. Thenge la hnei Iehova hna ahnithe jëne Amosa perofeta ka hape, hetrenyi la “ketre jin, tha jinë pë xeni me tim, ngo jinë wesi ula i Iehova.” (Amosa 8:11) Goi mecijine fe ngöne la ua la itre atr ka hmi. Ngo eje hi laka, ame la aja i Iehova ke, ene laka “tro la nöjei ate asëjëihë a mele me wangate hmekune la nyipici.” (1 Timoteo 2:3, 4) Qa ngöne lai, kola mana la xeni ne la ua hna hamëne hnei Nyidrë. Ngo troa öhne eka la xeni cili?
6. Tune ka la aqane ithuane Iehova ekö la nöje i Nyidrë ngöne la ua?
6 Ngöne la mele ne la atr ke, hnei Iehova hna hamëne la xeni ne la ua kowe la nöje i Nyidrë, a hnepe lapa ka ca hae. (Isaia 65:13) Ketre ceitun, Hnene la itretre huje ne Isaraela hna icasikeune la itre trahmany, itre föe me itre nekönatr, matre troa ce ini angatre la Trenge Wathebo i Akötresie. (Deuteronomi 31:9, 12) Fene la musi ne la koleji sataral, ke, hnene la itre keresiano ne la hneijine i Iesu hna caasi hnine la itre ekalesia, nge angatre a hnëkëne la itre icasikeu matre troa ini me ixatua kowe la nöjei atr. (Roma 16:5; Filemona 1, 2) Itre Temoë i Iehova a xötrethenge la tulu cili. Angatre a hë epuni fe troa hane sine la itre icasikeu i angatr.
7. Nemene la itretrengekeu ka eje ngöne la troa sine pala hi la itre icasikeu memine la atrehmekune me lapaun?
7 Ijije hë enehila troa tru la hnei epuni hna atre, qa ngöne laka epuni a catre troa isa inine la Tusi Hmitrötr. Eje hi laka, hnene la ketre temoë hna xatua epun. (Ite Huliwa 8:30-35) Ngo ame la lapaun, ke, ijije troa aceitunëne eje memine la ketre feja ka troa fitre nge meci ju hi e thaa hna thupëne kö ej, nge thaa hna hamëne kö la itre nyine akökötrene ej. Qa ngöne lai, nyipi ewekë fe tro epuni a kapa la xeni ne la ua, ka ijije koi epun. (1 Timoteo 4:6) Kola kapa pala hi jëne la itre icasikeu ne la itre keresiano, la ketre porogarame ne ini nyine troa ithuai epuni ngöne la ua, me xatua epuni troa cia hlöeë pala hi ngöne la lapaun, matre kökötre lolo pala hi ngöne la atrehmekune i Akötresie.—Kolose 1:9, 10.
8. Pine nemene matre kola ithuecatre koi së troa sine la itre icasikeu ne la itre Temoë i Iehova?
8 Hetre ketre kepine ka sisitria matre kola icasikeu. Hnei Paulo hna cinyihane ka hape: “Tro sha imekunekeune mate troa aciane la ihnimi me ite huliwa ka loi; tha tro kö a trije la icasikeu shë.” (Heberu 10:24, 25) Ame la qene heleni ne la hna ewekë hna hape “troa aciane” ke, kolo fe a hape “troa xöl, maine troa idrei.” Kola qaja hnene la ketre edomë i Tusi Hmitrötre ka hape: “Idrei la fao hnei fao, ketre maca meke hë la ate hnene la enehmu i angeic.” (Ite Edomë 27:17) Nyipi ewekë tro pala hi së asë a ‘idrei.’ Atreine hi tro la itre jole ne la fene ka xulu ngöne la nöjei drai a ananazijëne la lapaune së. Ngo maine tro së a sine lapane la itre icasikeu ne la itre keresiano, easë a troa ithuecatrekeu. (Roma 1:11, 12) Itre atrene la ekalesia a xötrethenge la eamo hna hamëne hnei Paulo, lo hna hape “eamo jë nyipunie, me akeukawane ipitön,” nge itre ewekë lai ka troa xöle la lapaune së. (1 Thesalonika 5:11) Ketre, maine hne së hna traqa lapa troa hane sine la itre icasikeu ne la itre keresiano, ke, nyine tro lai a amamane ka hape, easë a hnimi Akötresie, nge kolo fe a hamë ijine koi së troa atrunyi Nyidrë.—Salamo 35:18.
“XETRËNE JU LA IHNIM”
9. Nemene la tulu hnei Iehova hna hamëne göi troa amamane la ihnim?
9 Hnei Paulo hna cinyihane ka hape: “Xetrëne ju la ihnim, celë hi otene ka nyipi loi.” (Kolose 3:14) Hnei Iehova hna hamëne gufane la ihetre celë koi së. Hna jëne nemen? Jëne la ihnimi hna atreine amamane hnene la itre keresiano, pine laka, kolo hi lo ketre wene la uati hmitrötre i Iehova. (Galatia 5:22, 23) Hnei Iehova hna amamane la ihnim i Nyidrë ka sisitria ngöne laka, hna upe la pane nekö i Nyidrë ka caasi matre aijijë së hmaca troa mele ka thaa ase palua kö. (Ioane 3:16) Hna hamëne la aqane ihnimi ka tru cili, nyine tulu koi së matre tro fe së a hane melëne thenge la thiina cili. Hna cinyihane hnei Ioane aposetolo ka hape: “E hnei Akötresieti hna hnimi shë tune lai, qa shë pena troa ihnimikeu.”—1 Ioane 4:11.
10. Nemene la thangane ka loi hne së hna troa kapa qa thene “la ange trejin”?
10 Ketre ijine ka sisitria koi epuni la troa sine la itre icasikeu hnine la uma ne Baselaia, ketre götrane hnë tro epuni amamane la ihnimi epun. Tro epuni a iöhnyi memine la nöjei pengöne atr. Tha jole kö koi epuni troa canga tro imajemikeu memine la itre xan, pine laka lolo la thiina i angatr. Ngo eje hi laka, ame fe la itre ka nyi hlue i Iehova, ke, isapengöne catre la itre thiina i angatr. Ma hnei epuni jë hë ekö hna tro ananyine la itre atr ka thaa ihmeku kö la itre hna ajane me epun, maine thaa ka casi kö la thiina me epun. Loi e tro la itre keresiano a “hnime ju la ange trejin.” (1 Peteru 2:17) Celë hi matre, loi e tro epuni a thele troa atre la itre atr ka traqa kowe la uma ne Baselaia—ngacama thaa ce macatre i epuni kö, thaa ceitune kö la thiina, maine isa pengöne raasi kö, maine thaa ceitu kö ngöne la hna ini. Tro hë epuni a öhne laka, kola isa kökötre hnene la itre atr ngöne la itre thiina nyine troa huliwan.
11. Pine nemene matre thaa tro kö së a thixötre hnene laka, isapengöne la itre thiina hne së hna öhne hnine la nöje i Iehova?
11 Tha tro kö la itre thiina ka isa pengöne kö hnine la ekalesia, a athixötrë epun. Tro sa xome la ketre ceitun; nyimutre la itre loto ka nyinyape ezi epun. Thaa ceitune asë kö la aqane nyenyapene itre ej, nge ketre thaa ceitune kö la pengöne itre ej, ngöne laka, ka hnyipixe itre xan nge ka hekö hë la itre xan. Alanyimu la itre ka nyinyapëne hë la itre gojenyi gaa nany, ngo tui epun, itre xane petre hi a nyiqaane troa xötrëne la gojeny. Maine nyipici laka, isa pengöne la itre loto tune lo aqane ithahnatane hë hne së, ngo itre ka nyinyape asë hi itre eje ngöne la gojeny. Kola aceitunëne hnyawa lai memine la itre atrene la ekalesia. Tha ceitune kö la aqane isa kökötre së ngöne la easë a eënyine la itre thiina ne keresiano. Ketre, tune mina fe laka, isapengöne kö la trenge catre ne la ngönetrei së, ketre mina, thaa ceitune kö la itre aliene la itre hni së. Nyimutre hë la itre macatre ne nyihlue i Iehova hnene la ka alanyim; ame itre xane ke, angatre petre hi a xötrei nyiqaan. Ngo eje hi laka, kolo asë hi a xötrëne la gojenyi ne tro kowe la mele ka thaa ase palua kö, “nge kola nyipi ce hni ngöne la mekune ka cas.” (1 Korinito 1:10) Qa ngöne lai, loi e troa thele thene la itre atrene la ekalesia, la itre thiina ka sisitria ngo thaa ene kö la itre engazo i angatr. Maine aqane ujë i epuni fe lai, ke, tro ha akeukawane la hni i epun, nge tro fe ha mama koi epuni laka, Akötresieti e nyipine la itre atr cili. Nge ijije troa hetre göhnë i epuni fe e cili.—1 Korinito 14:25.
12, 13. (a) Maine tro la ketre atrene la ekalesia a aelëhni epun, nemene la nyine tro epuni a kuca? (b) Pine nemene matre nyipi ewekë troa apaatrene trije la itihni?
12 Atre hyawa hi së laka, ka ngazo asë hi la itre atr, nge ngöne la itre xaa ijine e hnine la ekalesia, tro la ketre atr a qaja maine kuca la ketre ewekë ka troa athixötrë epun. (Roma 3:23) Celë hi matre, cinyihane ju hnei Iakobo atre drenge ka hape: “Ke menu hë shë asë ngöne la ite ewekë ka nyimute.” (Iakobo 3:2) Nemene la aqane tro epuni a ujë, ngöne la kola aelehni epuni hnene la ketre atr? Kola qaja hnene la ketre edromë i Tusi Hmitrötre ka hape: “Ame la inamacane ne la ate, te, ate ahmitëne la elëhni angeic, nge nyine alolo angeice troa tha mekune la hna shashaith.” (Ite Edomë 19:11) Ame la troa meku loi, ke, ene la troa atreine waipengöne la ketre ewekë, me jui la aqane trotrohnine la itre ewekë ka sisitria ka ukune la ketre atr troa ithahnata, maine troa ujë thenge la hna inin. Alanyimu the së la itre atr ka amamane la meku loi, ngöne la easë a isa qeje menune la itre ngazo së. Hapeu matre hane fe së huliwane la meku loi së, troa trotrohnine me jele thaa nyipi ewekëne la itre hnepe ewekë ka troa iathixötrë qa ngöne la aqane ujë ne la itre xan?—Mataio 7:1-5; Kolose 3:13.
13 The thëthëhmine kö së laka, maine easë a ajane tro Iehova a köletrije la itre ngazo së ke, loi e tro fe së a atreine köletrije la ngazo hna kuca koi së hnei itre xan. (Mataio 6:9, 12, 14, 15) Maine easë a melëne la nyipici, ke, tro hë së a hnime la itre xan. (1 Ioane 1:6, 7; 3:14-16; 4:20, 21) Qa ngöne lai, maine epuni a icilekeu memine la ketre atrene la ekalesia pine la ketre jol, ke, loi e tro së a catre xomihnine la itre ngazo hna kuca koi së. Maine hnei epuni hna xetrëne la ihnim, ke, tro hë epuni a thele troa apatrene la jol, nge thaa tro hmaca kö epuni a luelue troa qeje menu, e hnei epuni hna aelëhnine la ketre atr.—Mataio 5:23, 24; 18:15-17.
14. Nemene la itre thiina nyine tro së a hetrën?
14 Loi e tro fe a hetrenyi la itre xaa thiina sine trongene la ihnim, ngöne la ihetre ne ua. Hnei Paulo hna cinyihane ka hape: “Qangöne lai xetrëne ju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany.” Ame la itre thiina ka easenyine la ihnimi ke, itre eje fe e hnine la “atr ka hnyipixe” ka ihmeku memine la aja i Akötresie. (Kolose 3:10, 12) Hapeu, tro kö epuni a hane catre xeetrëne la itre thiina cili? Sisitria catre e tro epuni a sipu xeetrëne la ihnimi trejin, celë hi ka troa nyihatrenyi epuni kösë ketre atre drei Iesu, pine laka hnei nyidrë hna qaja ka hape: “Celë hi matre tro nöjei ate asëjëihë a wangatrehmekune laka itete dei ni nyipunie, e tro nyipunie a ihnimikeu.”—Ioane 13:35.
KETRE NYIPI HNA ZAE
15. Pine nemene matre kola aceitunëne la ekalesia memine la ketre hunapo?
15 Hna kuca la ekalesia matre hunapo i epun, nge atreine tro epuni a lapa tingeting, ke hetre ka thupë epun. Tro epuni a öhne hnine eje la itre atre hni nyipici; angatre a thele troa kuca la loi thenge la aja i Akötresie. Alanyimu thei angatre la itre ka nuetrije hë lo itre hna majemine memine la itre aqane ujë ka ngazo, nge ma epuni jë fe a ajane troa hane apaatrene itre ej. (Tito 3:3) Atreine tro angatre a xatua epun, ke, hna qaja koi së ka hape “thue ithöeëne jë la itre enefe i nyipunie.” (Galatia 6:2) Ketre, isa qanyi së kö la troa xötrethenge la gojenyi ne tro kowe la mele ka thaa ase palua kö. (Galatia 6:5; Filipo 2:12) ketre, hnei Iehova hna hnëkëne la ekalesia i keresiano, kösë ketre ixatua koi së me nyine troa sajuë së ngöne la itre jol. Ngacama troa catrehnine la itre jole hnei epuni hna troa qëmeke kow, ngo ame pe ijije tro epuni a cile kowe itre ej—jëne la ihnimi ne la ekalesia, hetre ithucatre koi epuni ngöne la itre ijine akötr me itre ijine kola thöeë epun.—Wange ju la Luka 10:29-37; Ite Huliwa 20:35.
16. Nemene la ixatua hna troa hamëne hnene la itre qatre thupe ne la ekalesia?
16 Ngöne la itre trejine ka troa hamë ixatua koi epun, ke, hetrenyi thei angatre la “itre atr hna nyi ahnahnan”—ene la itre qatre thupe hnine la ekalesia, angatre hi la itre ka thupëne la hnënge mamoe, thenge la aja i Akötresie memine la hni ka ajan. (Efeso 4:8 [NW], 11, 12; Ite Huliwa 20:28; 1 Peteru 5:2, 3) Qa ngöne lai, hnei Isaia hna thingehnaeane ka hape: “Nge tro la ate a tune la nyine zaene la eny, me hnapo ene la wene, tune la ite di ngöne la ga qaqacile, tune la ga xapo ne la giti atraqate ngöne la [hnepadro, NW] ka kucakuca.”—Isaia 32:2.
17. (a) Nemene la ixatua ka sisitria hnei Iesu hna ajane troa hamën? (b) Nemene la ewekë hna hnëkëne hnei Akötresie lo hna thingehnaeane hë kowe la nöje i Nyidrë?
17 Ngöne lo ijine Iesu e celë fen, ke, ngazo pi hë la aqane thupëne la itre mamoe hnene la itre hene hmi. Hace catre la hni i nyidrë hnene la aqane akötrëne la itre atr, celë hi matre hnei nyidrëti hna thele troa xatua angatre ngöne la ua. Hnei Iesu hna utipi angatr, pine laka, “kucakuca ha angat me isa ije hë, tune la nöjei mamoe ka pa ate thupën.” (Mataio 9:36) Hna melëne tune lai hnene la ka alanyim, ngöne la angatre a qëmeke kowe la itre jol, ngo thaa hna xatua angatre kö ngöne la ua, maine akeukawanyi angatre pena! Ngo hetre ixatua ngöne la ua kowe la nöje i Iehova, nge celë hi hnei Nyidrëti hna thingehnaeane ka hape: “Nge tro ni a acile hui angate la itete thupë mamoe troa thu a i angat; nge tha tro hmaca kö angatr’a xou, me iëz, me pate.”—Ieremia 23:4.
18. Pine nemene matre loi e tro së a easenyine la ketre qatre thup, e easë a aja ixatua ngöne la götrane la ua?
18 Loi e tro epuni a Imajemikeu memine la itre qatre thupe ne la ekalesia i epun. Hetre atreine i angatre troa melëne la atrehmekune i Akötresie hnene laka, hnei angatr, hë hna trongëne la hnei Tusi Hmitrötre hna thele thei angatre matre troa itretre thupe hnine la ekalesia. (1 Timoteo 3:1-7; Tito 1:5-9) The xou kö troa easenyi angatre maine epuni a aja ixatua ngöne la ua, göi troa apaatrene la itre hna majemine maine itre aqane ujë ka icilekeu memine la itre trenge wathebo i Akötresie. Tro hë epuni a öhne laka, itretre thupe a xötrethenge la eamo i Paulo, hna hape: “Haji angete hni ka ewë, xatuane jë la ite ka kucakuca, xomihnine ahoeane ju la nöjei ate asëjëihë.”—1 Thesalonika 2:7, 8; 5:14.
TROA LAPA LOI NÖJ THENE LA NÖJE I IEHOVA
19. Nemene la itre manathithi hnei Iehova hna hamëne kowe la itre atr ka thele troa mele tingetinge hnine la organizasio i Nyidrë?
19 Ngacama ngazo la aqane mele ngöne la fene enehila, Iehova a hamë së ngöne la gotrane la ua, la xen, memine la ihetr, memine fe la hna troa zae. Eje hi laka, tro së a treqene la fene ka hnyipixe hnei Akötresieti hna thingehnaean, matre troa melëne la itre manathithi ngöne la paradraiso e celë fen. Ngo ame kowe la itre atrene la organizasio i Iehova, ke, angatre enehila a lapa loi nöje hnine la paradraiso ngöne la ua. Celë hi matre, hna qeje angatre hnei Ezekiela ngöne la nyidrë a perofetane ka hape: “Nge tro angat’a lapa xetietë, nge pëkö ate troa axounyi angat.”—Ezekiela 34:28; Salamo 4:8.
20. Nemene la aqane tro Iehova a amanathithi së elany, pine laka hne së hna hujëne la mele së thatraqane la hmi hnei Nyidrë hna kapa?
20 Drei la ole së kowe la itre ewekë ngöne la ua, hna hnëkëne hnei Iehova jëne la Wesiula memine la organizasio! Easenyine jë epuni la nöje i Akötresie. The cile kö me xou, e qeje epuni jë hnene la itre sine ce elo maine itre sinee i epuni pena, hnene laka epuni a kapa la atrehmekune i Akötresie. Ame itre xane ke, thaa ajane kö angatre tro epuni a ce hmi memine la itre Temoë i Iehova, me sine la itre icasikeu i angatre ngöne la uma ne Baselaia. Ngo tro kö Akötresieti a nyijune la hnei epuni hna hujëne la mele i epun, thatraqane la hmi hnei Nyidrëti hna ajan. (Malaki 3:10) Ketre, hnei Iesu hna qaja ka hape: “Ame la ate nue pe la uma, me ite tejin, me ite xa, me thin, me kem, me ifëkuku, me ite kuku, me ite hlapa pi ini me evangelia, tro ha angeice a kapa enehila ngöne la ijine celë ca hadede lao uma, me ite tejin me ite xa, me ite thin me ite kuku, me ite hlapa, ceme ite akötr; nge mele ka tha ase palua kö ngöne la ijine ka tro ha traqa.” (Mareko 10:29, 30) Maine eje hi laka, nyimutre la itre ewekë hnei epuni hna thipëne maine xomihnine pena, atreine tro epuni a öhne thene la nöje i Akötresie la ce madrine memine la lapa loi nöje ngöne la ua.
HAPEUE LA HNEI EPUNI HNA ININ
Drei la “hlue ka nyipici me ka inamacan”?
Nemene la hnei Iehova hna hnëkëne me kuca matre troa ithua së ngöne la ua?
Tune ka la aqane tro itre eje a xatua së hnine la ekalesia i keresiano?