Mekene 19
Ijine Troa Tiqa La Fene Hnene La Atrehmekune i Akötresie
1, 2. Hna angazone tune ka la itre hna xupe hnei Iehova ekö?
PANE mekune jë epuni laka, hna kuca la ketre iatr ka mingöminge hnene la ketre atr ka tru talan. Angeice a mekune laka, ketre ewekë ka lolo catr—nge ka tru alameken! Ngo ame ju hi e hnenyipajidr, ke, hna traqa hnene la ketre atr ka zalu, troa köle trije me sija sija trije ej. Ame la kola öhne lai hnene la ka peidrë iatr, ke, ene pe traqa pi hi la akötre atraqatre koi angeic. Ame la aja i angeic, ke, ene la troa akalabusine la atr ka angazone la huliwa i angeic! Haawe, trotrohnine ju hi së la aja ka eje thene la ka peidr, ene la troa nyihnyawane hmaca la iatr, matre hamëne hmaca la emingömingöne ej!
2 Ijije troa aceitunë Iehova memine lai ka kuci iatr, ngöne laka, hnei Nyidrë hna xupe la ketre ewekë ka tru alameken, ene la ihnadro me amë la itre atr ngön. Thupene la hnei Nyidrëti hna xupe la trahmanyi me föe, Nyidrëti a qaja ka hape “nyipi loi” la nöjei ewekë asëjëihë ngöne la ihnadro hnei Nyidrë hna kuca. (Genese 1:31) Lue sipu nekö i Akötresie lae Adamu me Eva, nge atraqatre la ihnimi Nyidrë koi nyidro. Ketre hnei Nyidrëti fe hna mekune troa hamëne la manathithi me mele ka mingömingö koi nyidro. Nyipici laka, hnei Satana hna iaö nyidroti troa icilekeu, ngo thaa hape kö thaa ijije hmaca kö troa nyihnyawane la hna xup hnei Akötresieti, ene la ihnadro ka mingöminge hna angazon.—Genese 3:23, 24; 6:11, 12.
3. Nemene la “nyipi mel”?
3 Hnei Akötresieti hna mekune troa acile hmaca la itre ewekë hna angazone hë. Ame la aja i Nyidrë ka tru, ke, ene la tro së a hetrenyi hmaca la mele tune lo hnei Nyidrëti hna mekune kow ngöne lo qaan. Ame la mele celë ka xoxopatre nge ka nyimu ejolen, thaa nyine tro kö a aceitunëne memine lo “nyipi mele” hnei Nyidrëti hna hnëkën. Ame la “nyipi mel” hnei Akötresie hna mekune nge hna ajane hnei Nyidrëti troa hamëne koi së, ke, ene hi lo “mele ka thaa ase paluakö” ngöne la fene gaa pë ngazo.—1 Timoteo 6:12, 19.
4, 5. (a) Tune ka la aqane troa eatre elanyi la hna mejiune göne la Paradraiso? (b) Pine nemene matre nyipi ewekë tro së a mekune hnyawa la mejiune së kowe la itre drai ka troa traqa?
4 Ketre götraneqa ka tru qëmeke i Iehova la troa thele la atrehmekune i Nyidrë. (Iakobo 4:17) Ngo pane mekune hnyawa ju pe, thaa ka co kö la itre manathithi hnei epuni hna troa kapa e hnei epuni hna trongëne la atrehmekune cili me catre hni kowe la mele ka thaa ase palua kö. Hnine la Wesiula i Nyidrë, ene la Tusi Hmitrötr, hnei Iehova Akötresie hna peidrëne la ketre iatr ka mingöminge la aqane desën, nge kola amamane la pengöne la mele hnine la paradaiso e celë fen, lo hne së hna troa mele palua ngöne la itre drai ka easenyi catre hë. Ketre, tune la nöje i Iehova, thaa easë hmekuje kö a nyihue i Nyidrë matre tro Nyidrë a nyijune la huliwa së. Easë a nyihlue i Akötresie, qa ngöne laka, tru la ihnimi së koi Nyidrë. (Mareko 12:29, 30) Ketre thaa hnene kö la hne së hna catre nyihlue i Iehova laka ijiji easë hë troa mel. Ketre ahnahna qa thei Akötresie la mele ka thaa ase palua kö. (Roma 6:23) Eje hi laka, tro së a öhnyi loi qa ngöne la hna mekune kowe la mele cili, pine laka kola amekunë së hnene la mejiune la paradraiso la pengöne la Akötresie—ene laka ka ihnimi Nyidrë nge nyidrëti la ate “nyi june koi angete thele catë Nyidrë.” (Heberu 11:6) Eje hi lai mejiune ka mamacile ngöne la itre mekune me itre hni së, nge ka aijijë së troa xomihnine la itre akötre asë hnine la fene i Satana.—Ieremia 23:20.
5 Tro së enehila a catre mekune hnyawa la mejiune hna eköthe hune la Tusi Hmitrötr, ene la mele ka thaa ase palua kö ngöne la ihnadro ka tro hmaca a paradraiso ngöne la itre drai ka troa xulu. Troa tune ka la aqane troa mele ngöne la ijine kola troa tiqa la fene hnene la atrehmekune i Akötresie?
THUPEI AMAGEDON—PARADRAISO
6. Nemene la Amagedo, nge nemene la aqane qeje pengöne eje hnene la itre atr?
6 Tune lo hne së hna wange hë, easenyi catre hë tro Iehova Akötresieti a apaatrene la fene ka ngazo celë. Kola easenyi trootro la fene kowe lo hnei Tusi Hmitrötre hna qaja ka hape “Amagedon,” maine Amagedo. Hnaewekë la hna trotrohnine menune hnene la itre atr matre angatre a mekune la ketre isi nikeler, kolo aqane troa apaatrene la fene hnengödrai jëne la hna isi bobe hnene la itre nöje ka tru, ngo ame pe thaa celë kö lai la Amagedo. Ngöne Hna Amamane 16:14-16, kola qaja ka hape, ame la Amagedon ke, celë hi “ishi ngöne la drai atraqate i Akötresie kapucatinasë.” Ketre isi hna troa sine hnene la “nöjei joxu e celë fen asë,” maine itre nöj. Tro la Hupuna i Iehova Akötresie, ene lo Joxu hna iën, a tane la isi e Amagedon. Ka mama cile hnyawa la pune la isi cili. Tro ha lepe apaatrene la itre atr asë ka icilekeu memine la Baselaia i Akötresie nge ka hane ce enexöle memine la fene ka ngazo lo hna musinëne hnei Satana. Tro hmekuje pe hi a mele qa ngöne la isi cili la angetre huliwa nyipici koi Iehova.—Hna Amamane 7:9, 14; 19:11-21.
7. Eka la göhne i Satana elanyi me itre demoni angeice ngöne lo itre macatre ka caa thauzane ne musi Keriso, nge nemene la manathithi hna troa kapa hnene la itre atr fene la musi cili?
7 Pane mekune ju laka mele ju fe kö nyipunie qa ngöne la isi cili. Nemene la pengöne la mele hune la ihnadro ngöne la fene ka hnyipixe hna thingehnaeane hnei Akötresie? (2 Peteru 3:13) Thaa tro kö së a luelue, pine laka celë hi hna qaja lai koi së hnei Tusi Hmitrötr, nge ketre nyine madrine la hnene eje hna ithuemacanyine koi së. Hne së hna inine laka, fene la musi Iesu Keriso, caa thauzane lao macatre, ke, thaa tro hmaca kö Satana me itre demoni i angeice a iangazo, pine laka hna umë angatre hnine la hnaop, kola hape thatreine hmaca kö angatre troa kuca la ketre ewekë kowe la ketre atr. Thaa tro hmaca kö la itre ua ka ngazo cili a zae hutröne la itre gomegome me thele jëne me uku së troa kuca itre thiina ka ngazo qëmeke i Akötresie. Mele hë së!—Hna Amamane 20:1-3.
8, 9. Ngöne la fene ka hnyipixe, nemene la ewekë ka troa traqa kowe la itre hace ka xulu qa ngöne la itre mec memine laka kola qatre trootro?
8 Troa traqa la ijine troa paatre la nöjei pengöne mec. (Isaia 33:24) Tro ha mejë la ka peje ca, tro hë angeice a tro me nyenyape me fiafia fë la lue ca i angeice ka lolo me meci ngön. Thupene la hna lapa fë hnangenyë ka simi ngöne la itre macatre ka nyimutre, haawe tro fe hë la itre ka simi hnangenyë a hane drenge la itre nine ka lolo ka ho loi xötreithi angatr. Nge tro fe hë la ti meke a sesëkötre me hane öhne la nöjei pengöne han ka eje e celë fene hnengödrai, memine la nöjei ewekë ka nyimutre hna xup. (Isaia 35:5, 6) Tro fe hë angatre a öhne la qëmeke ne la itre atr hnei angeice hna hnim! Nge tro lai a pane hajihaji la lue meke i angatr, ke, hna ahnuthe lue eje hnei trenge tihmidra ne madrin.
9 Öhne hë epuni lai! Pë hmaca kö troa ami lue thulu, me troa fë ibeki me huja tö, ketre thaa tro hmaca kö a thele drösinö me hnë kuci inyö me tro pital! Thaa tro hmaca kö a xomacone la madrine hnene la itre meci hnene la itre atr hna lapa fë e kuhu hni angatr, maine ka tro pena amenune la itre mekuna i angatr. Pë hmaca kö nekönatre hna troa tithe hnene la itre meci ka solesol. Pë hmaca kö troa akötrëne hnene la itre meci ne qatr, ke tro hmaca angatre a thöth. (Iobu 33:25) Thaa tro hmaca kö a hane tithi së hnei mec, ngo tro hmaca ha traqa trootro koi së la egöcatr. Ngöne la nöjei hmakany, thupene la hna meköle hnyawa e jidr, ke, easë pala hi a ce mejë memine la trenge catre ka hnyipixe, nge egöcatre së me hetre aja së troa nyiqaane la ketre drai ka hnyipixe me troa kuca la ketre huliwa ka troa thue madrine së.
10. Nemene la huliwa hna troa amekötine kowe la itre ka troa mele pe thupe i Amagedo?
10 Tru hnei huliwa ka iamadrinë hna troa kuca hnene la itre atr ka troa mele thupene e Amagedo. Tro angatre lai a huliwane la ihnadro matre paradraiso pi ej. Tro hë a apaatrene trije asë fe lo nöjei ewekë ka ngazo ka lapa pe qa ngöne lo fene ka paatre hë. Tro ha cia hlöeë la itre park me itre hna gatran ngöne la itre götrane gaa hnapapa. Tro asë hi la itre atr a hetre uma ka catr, nge ka lolo e troa mele hnin. (Isaia 65:21) Kola tro la itre drai, nge troa isili la nöjei götrane ka cia hlöeë matre paradraiso hë la fene hnengödrai asë nge traqa hmaca ha la emingömingöne ej, tune lo hlapa hnapane e Edena lo hna hnëkëne hnene la Atre Ixup. Drei la madrine ka tru elanyi kowe la angetre troa hane sine la kola nyihnyawa la ihnadro ngöne la fene ka hnyipixe!
11. Nemene la aqane troa imelekeu hnene la itre atr elanyi memine la itre öni, nge tune ka fe göi ihnadro?
11 Pine laka, Akötresieti la ka amekötine la huliwa cili, haawe thaa tro hmaca kö a angazone la ihnadro. Troa mele tingetinge la itre atr memine la itre öni. Thaa tro kö la itre öni a meci hnene la thiina ka menu ne la atr, ngo tro pe angeice a kuca lo hnëqa i angeice kowe la fen, ene la troa thupëne itre ej. Pane goeëne jë epuni elanyi la itre luko me itre mamoe, itre liona me itre neköi kau, tro angatre a ce xen—pë hë hna xouene hnene lo itre öni hna hiaan! Ketre thaa tro hmaca kö la itre nekönatre a xouene la itre öni ka ses; nge thaa tro kö a angazone la elolone la fene ka hnyipixe hnene la itre atr ka pë ihnimin nge ka pi iöni hatrë. (Isaia 11:6-8) Drei jë kö elanyi la fene ka hnyipixe nge gaa tingetinge!
TROA SAZE LA FEN
12. Nemene la aqane eatrëne la hna perofetane hnei Isaia ngöne Isaia 11:9 enehila, nge nemene la aqane troa eatre lai elanyi ngöne la Paradraiso?
12 Kola qaja hnei Isaia 11:9 la kepine matre thaa tro hmaca kö a angazone la fen hnengödrai asë. Önii nyidrë, “Troa tiqa la fene hnengödrai hnene la ate hmekunyi Iehova tune la hnagejë a hetrëne la trepen’ej.” Ewekë la ka eatre kowe la itre atr ngo thaa koi itre öni fe kö, pine laka thatreine kö angatre troa trotrohnine me trongëne la “atrehmekune i Iehova,” nge thaa hna xupi angatre fë kö la inamacan, ngo angatre pe a tro thenge la aqane amekötine hë koi angatre hnene la ka ixup. Ngo ame la atrehmekune la Atre Xupi së, ke, eje a ujëne la itre atr. Hnene laka hnei epuni hë hna xötrethenge la atrehmekune i Akötresie ngöne la mele i epun, nyimutre hë la itre thiina hnei epuni hna saze. Itre milio hë lao atr enehila ka melëne hë la aqane mele celë. Ngo, ketre hna perofetane lai ka eatre kowe la itre atr ka nyihlue i Iehova. Ketre, kolo fe a thingehnaeane la ijine tro la itre atr asë a trije la itre thiina ne öni maine iakötrë, matre tro pena ha angatre a itre atr ka loi epine palua.
13. Nemene la porogarame ne ini hna troa hamëne elanyi ngöne la fene ka hnyipixe?
13 Drei kö la elolone elanyi la fen, e lapane asë jë eje hnene la atrehmekune i Akötresie! Tro ha hetrenyi la ketre porogarame ne ini ka tru fene la hna nyijoxu i Iesu Keriso memine la itre ka ce joxu me nyidrë, ene lo 144 000. Troa kapa la itre “itus” ka hnyipixe nyine jëne ini. Hna cinyihane e hnine la itre itusi cili la itre hna amekötine hnei Akötresie, a itre xaa ini thatraqane la itre atr ka troa mele ngöne la ijine cili. (Hna Amamane 20:12) Thaa tro hmaca kö la itre atr a inine troa isi ngo tro pe a thele la tingeting. Tro ha paatre palua la itre jiane isi. (Salamo 46:9) Tro ha inine la itre atrene la fene ka hnyipixe troa hnime la itre xaa atr me metrötrë angatre me wangatrunyi angatr.
14. Tune ka la aqane troa ketre pengöne elanyi la fen, ngöne la kola troa caasi pe hi la fami?
14 Tro la nöjei atr asë elanyi a ketre fami ka caas. Pë hmaca kö hage ka troa nyi ifegone la caasi memine la ce mele trejin. (Salamo 133:1-3) Thaa tro hmaca kö a lokane la itre uma, pine laka, kola xouene wanga atrekënö jë la itre aliene ej. Eje hë la tingetinge ngöne la hni ne la nöjei atr, me ngöne la nöjei hnalapa, me ngöne fe la nöjei gotrane la fen.—Mika 4:4.
MELEHMACA KA ITHUE MADRINË
15. Nemene la lue pengöne atr ka troa mele hmaca ngöne la fene hnengödrai?
15 Tro hë la itre atr a mele hmaca fene la mus i Iesu, ngöne lo caa thauzane lao macatre. Thaa tro kö a hane mele hmaca la itre atr ka ngazo lo angetre cile kowe la uati hmitrötre i Akötresie, ene la trenge catre i Nyidrë, ngöne laka thaa hnei angatre kö hna ietrane la itre huliwa hna kuca ka isazikeu memine la itre menene la trenge catre i Nyidrë, nge thaa hna xötrethenge kö la itre hna amekötine hnene ej. (Mataio 23:15, 33; Heberu 6:4-6) Eje hi laka, Akötresieti hmekuje hi la ka atrehmekune la ngazo ka tru hna kuca hnene la ketre atr, maine hna icilekeu memine la uati hmitrötre i Nyidrë. Ngo lue pengöne atr hna troa amelene hmaca—“itre atr ka meköti me nöjei ka tha meköti kö.” (Ite Huliwa 24:15) Pine laka pëkö isazikeu ngöne la ijine cili, atreine troa qaja ka hape, troa pane melehmaca e celë fene hnene la nöjei ka meköt, ene lo itre ka nyihlue i Iehova ha ngöne la nyipici.—Heberu 11:35-39.
16. (a) Drei la itre hna hape “itre ka meköt” hna troa amelene hmaca ngöne la fen? (b) Drei la angetre nyihlue i Iehova hnyawa ekö hnei epuni hna ajane troa iöhnyi memin, nge pine nemene?
16 Thaa tro hmaca kö a drenge la itre mejene isi, me itre mec, me itre ewekë ka ngazo ka traqa ngöne la itre nöj, tune la itre sa, me itre xaa ewekë ju kö, ngo tro pena ha drenge hnene la itretre nyihlue i Iehova la itre ithuemacanyi ne qeje loi nyine qajaqaja itre ka troa mele hmaca. Drei la madrine ka tru e troa atre laka, bëeke hmaca ha lo itre trahmanyi me föe ka nyihlue i Akötresieti hnyawa ekö, ene Abela, Enoka, Noa, Aberahama, Sara, Iobu, Mose, Rahaba, Rutha, Davita, Elia, me Esetera. Eje hi tro hë angatre elanyi lai a porotrikëne hnyawa la pengöne lo itre ewekë hna cinyihane hnine la Tusi Hmitrötr! maine kolo itre hnei angatre hna melën, maine troa qeje pengöne hnyawa la itre xaa hnei Tusi Hmitrötre hna qaja! Ketre aja i angatre fe elany, tune mina fe la itre atr ka meköti ka meci ngöne la hneijine së, troa hane hnyingë së la aqane nyipune hnei Iehova la fene i Satana memine la aqane ahmitrötrëne Nyidrë la atresiwa i Nyidrë memine fe la emekötine la musi ka draië i Nyidrë.
17. Nemene la ixatua hna troa hamëne hnene la itre xaa ka nyihlue i Akötresie kowe la itre ka troa mele hmaca?
17 Drei la ixatua ka sisitria elanyi kowe la itre hlue cili ngöne la melehmaca hnapin, ijine kola troa amelene la itre miliare lao “atr ka ngazo” qa ngöne la ithahluë ne la mec. Alanyimu la itre atr ka thaa hane kö atre Iehova ekö. Hnei Satana hna ‘atimekëne la itre mekunei angtr.’ (2 Korinito 4:4) Ngo tro ha paatre la itre huliwa i Diabolo. Tro ha bëeke hmaca la itre atr ka ngazo kowe la ihnadro ka mingöming me gaa tingeting. Troa kepe angatre hnene la ketre nöje ka hnëkë hnyawa matre troa ini angatre la pengö i Iehova me joxu Iesu Keriso. Pine laka itre miliare la itre atr ka mele hmaca, angatre a atre Iehova me hnimi Nyidrë, celëhi kepine matre, tro ha tiqa me lapane la fene hnengödrai hnene la atrehmekune i Akötresie; ewekë hna thaa hane kö öhne ekö.
18. Nemene elanyi la aqane tro epuni a ujë ngöne la epuni a troa kapa la itre ka troa mele hmaca hnei epuni hna hnim?
18 Drei la madrine hne së hna troa kapa elanyi ngöne la ijine melehmaca! Drei la atr hna thaa akötrëne hnene la ithupëjia, ene mec? Ketre, drei la atr ka thaa hane kö hace ngöne la kola meci la ketre sinee hna hnime catrën, maine hna traqa la ketre meci ka tru, maine hnei meci ne qatr, maine hna akesida, maine hna humuthe pena? Pane mekune jë elanyi la madrine ngöne la kola iöhnyi ngöne Paradraiso! Itre keme me thin, itre neköne trahmanyi me jajiny, itre sinee, tro asë hi angatre a imadri, me hnyima me treije hnei madrin.
TRO HA PEXEJ!
19. Nemene la iamamanyikeu elanyi ngöne la ijine musi Iesu a caa thauzane macatre?
19 Ngöne la caa thauzane lao macatre, ke, troa mama la ketre iamamanyikeu ka tru. Ma celë jë hi götrane ka sisitria kowe la atr, ngöne la itre macatre ka caa thauzane ne musi Keriso. Tro Iehova a upe la hupuna i Nyidrë troa aeatrëne la itre manathithi ka xulu qa ngöne mele i nyidrë hna hujëne kowe la nöjei atr asë ka lapaune me drenge thenge Nyidrë. Jëne la aqane kuca celë, tro ha patre la nöjei ngazo nge tro ha pexeje la nöjei atr asë.—1 Ioane 2:2; Hna Amamane 21:1-4.
20. (a) Kola hapeu la troa pexej? (b) Eue la tro la itre atr ka mele thupe i Amagedo memine la itre hna amelene hmaca, a nyiqaane troa mele ka pexej?
20 Troa pexej! Nemene la aliene la hna ewekë celë? Kola hape troa bëeke hmaca kowe lo mele hnei Adamu me Eva hna melëne ekö, qëmekene tro nyidroti a icilekeu me Iehova Akötresie. Ngöne la ngönetrei, ngöne la mekun, ngöne la hni, ngöne la aqane waitulune la loi me ngazo, me ngöne la ua—ngöne la nöjei götrane hna thaa mekune kö kow—tro hë la itre atr ka pexeje a trongëne hnyawa la itre hna amekötine hnei Akötresie. Ngo hapeu, tro kö a ceitune asë la nöjei atr? Ohe! Itre hna xupe hnei Iehova—itre sinöe, itre engen, itre öni—Itre eje asë hi a ini së laka, Nyidrëti a ajane la eisapengönene la itre ewekë. Troa isa pengöne kö la itre hna atreine memine la itre thiina ne la itre atr ka pexej. Tro hë la nöjei atr a madrine la mele, nge celë hi hnei Iehova lai hna ajane kowe la atr. Hna Amamane 20:5 a qaja ka hape: “Ngo ame la ite thelene la nöjei ka meci, te, tha mele hmaca kö uti hë pexejë hë la ite macatre ka ca thauzan.” Tune la ka alanyimu atraqatr, ene lo itre thelene qa ngöne lo amagedo, tro hë la itre hna amelene hmaca a mele hnyawa elanyi e paatre pi lo ngazo, nge atr ka pexeje hë angatr.
21. (a) Nemene la ewekë ka troa traqa ngöne la pune lo itre macatre ka caa thauzane ne musi Keriso? (b) Nemene la ka troa traqa koi Satana memine la itre ka ce me angeic?
21 Troa cile kowe la itupathi tixenuë hnene la itre atr ka pexej. Ngöne la pune la thauzane macatre ne joxu hnei Iesu, ke, tro ha nue Satana me itre demoni i angeice qa hnine la hnaop, ngöne la hnepe ijine ka xoxopatr, matre tro angatre a pane acaa ujëne hmaca la itre atr qa thei Iehova. Tro hë itre xane a catre fë la aja i angatre ka ngazo matre sisitria ha eje hune la ihnimi koi Iehova, ngo ngazo pe thaa tro ju kö a qea la icilekeu cili. Tro Iehova a apaatrene la itre atr ka mele koi angatre kö tui Satana me itre demoni i angeice asë. Tro ha köletrije paluane la nöjei atr asë ka kuca la ngazo!—Hna Amamane 20:7-10.
NEMENE LA NYINE TRO EPUNI A KUCA?
22. Nemene la nyine tro epuni a thele troa kuca ngöne la Paradraiso?
22 Tro ha hamëne la mele ka epine palua kowe la itre ka hnimi Iehova nge tro ha zi angatre la Paradraiso e cele fen. Thatreine kö së troa pane mekune la madrine i angatr—nge epuni fe, atreine hi tro fe epuni a hane ce thawa la madrine cili me angatr. Miuzik, nyii iatr, itre hna atrein—tro la itre hna kuca hnene la itre atr ka pexeje a waja huje la itre hna kuca ka mingöminge hnene la itre maseta ka tru ne la fene celë! Ke tro ha pexeje la itre atr, nge thaa hna e hmaca kö la itre ijine tro angatre a kuca la itre ewekë hnei angatre hna ajan. Pane mekune ju la hnei epuni hna atreine troa kuca ngöne la epuni ha ketre atr ka pexej. Mekune ju fe la hnei epuni memine la itre xane hna troa atre ngöne la itre hnei Iehova hna xupe asë—Qaane la itre miliare lao fini waetresij ngöne la hnengödrai asë, uti hë la ketre ewekë hna thaa öhne kö hnei lue meke i atr. Ame asë hi la hna troa kuca hnene la itre atr, ke, nyine troa amadrinëne la hni ne la Tretretro së e hnengödrai atre ihnim, ene Iehova.—Salamo 150:1-6.
23. Pine nemene matre thaa tro hmaca kö a hace la mele hnine la Paradraiso?
23 Pë hmaca kö atr ka mele menu a thatre kö la nyine kuca. Nge kola troa tro pala hi la itre drai, ketre kolo fe a hetre nyipi ajane troa mel. Epuni a trotrohnine laka, pë kö pune la atrehmekune i Akötresie. (Roma 11:33) Ngöne la ijine kola mele palua elany, ke, tro pala hi a hetre nyine troa inin, nge nyimutre la itre ewekë ka hnyipixe hna troa atre. (Ate Cainöj 3:11) Nge maine tro epuni a thele pala hi troa atre Iehova, ke, tro hë epuni a mel—a thaa koi itre macatre ka xalaithe kö ngo epine palua pe!—Salamo 22:26.
24, 25. Pine nemene matre nyipi ewekë tro epuni enehila a mele thenge la atrehmekune i Akötresie?
24 Hapeu, tro kö epuni a catre me nue la mele i epuni kowe la itre drai ka mingöminge cili hna troa melëne ngöne la Paradaiso? Eje hi, mekune i epuni hi lai! Haawe, Iehova a liime koi epuni matre troa hamëne la kii thatraqane la itre manathithi cili ka troa xulu—Atrehmekune i Akötresieti hi lai kii. Hapeu, tro kö epuni a xome eje matre fe la gojenyi epun?
25 Maine epuni a hnimi Iehova, ke, tro hë epuni a hetre ajane troa kuca la aja i Nyidrë. (1 Ioane 5:3) Drei la itre manathithi hnei epuni hna troa melëne elany, e hnei epuni hna ujë tune lai! Nge maine tro epuni a trongëne la atrehmekune i Akötresie, ke, tro eje a amadrinë epun, ngacama epuni a mele hnine la fene ka ngazo. Ketre, troa atraqatre la itre ahnahna elany, pine laka celë hi atrehmekune ka troa thueje i epuni kowe la mele ka thaa ase palua kö! Enehila hi la ijine tro epuni a huliwa. Catre jë troa mele thenge la atrehmekune i Akötreise. Amamane jë la ihnimi epuni koi Iehova. Atrune jë la atresiwa i Nyidrë ka hmitrötre nge anyipicine jë laka Satana la atre thoi. Nge tro hë Iehova Akötresie, qaane la nyipi inamacane memine la atrehmekune a amanathithi epun, ke, atraqatre nge hetrenyi Nyidrë la hni ka ihnim. (Ieremia 31:3; Zefania 3:17) Nge tro hë Nyidrëti a hnimi epuni epine palua!
HAPEUE LA HNEI EPUNI HNA ININ
Nemene la “nyipi mel”?
Troa tuneka la fen, thupene Amagedo?
Drei la itre hna troa amelene hmaca ngöne la fen?
Tuneka la aqane tro la itre atr elanyi a pexeje nge nemene la aqane troa tupathi angatre ngöne la pun?
Nemene la mejiune i epuni göne la Paradraiso?
[Iatr ne la götran 188]
Hapeu, mejiune kö epuni troa mele ngöne la Paradraiso elanyi e celë fene hnengödrai, gaa troa tiqa hnene la atrehmekune i Akötresie?