Ihumuth Ngöne Aniverser

Isapengöi Iesu kö memine lo ka hnëkë gojenyi koi nyidrë. Eje hi, Iesu pala hi me itretre dreng a cainöj e Galilaia nge lue macatre hë ne akalabusi Ioane Bapataiso.

Hnei Ioane hna qaja amamane la ngazo hna kuca hnei Joxu Herodra Anetipa, lo hna atrekënö Herodia, föi Filipo trejine me angeic. Hnei angeice hna sei hna cil, me xomi Herodia matre föi angeic. Nge thenge la Trenge Wathebo i Mose, lo wathebo hnei angeic hna catre fë, tha ka meköti kö la faipoipo celë, ke kola nyixetë. Nge pine la hnei Ioane hna qaja, hnei angeic hna kuië Ioane hnine kalabus, nge ma Herodia jë la ka sipon.

Thatre kö Herodra la nyine tro angeic a kuca koi Ioane, ke ‘ame Ioane koi itre atr, tre ceitu me perofeta.’ (Mataio 14:5) Ngo tha mekuna i Herodia kö. Herodia a “lapa fë trenge hni,” nge angeice pala hi a thele jëne troa humuthi Ioane. (Mareko 6:19) Ngazo pe, hna traqa la ketre ewekë ka eatrëne la aja i angeic.

Tha qea ju kö thupene la Paseka 32 M.K., hnei Herodra hna hnëkëne la ketre feet ka tru göne la aniverser i angeic. Hnei Herodra hna hën la itre atr ka tru, itre he ne nöj, me itre tane isi, me itre atre ka hlemu e Galilaia, me itre he ne politik. Ngöne la feet, hna upi Salome troa fia, ene lo nekö i Herodia me Filipo. Nge hna ahmone la itre trahmany hnene la aqane fia i nyën.

Atraqatre la trenge madrine i Herodra koi nyën, matre öni angeic: “Qaja jë koi ni la nöjei ewekë hnei hmunë hna ajan, nge tro ni a hamë hmunë.” Nge goi sisinyi fe Herodra ka hape: “Ame asë hi la hnei hmunë hna sipone koi ni, tro ni a hamë hmunë, nge uti fe hë la sine la baselaiang.” Ngo qëmekene troa sa, hnei Salome hna hnyingë thine ka hape: “Nemene la nyine tro ni a sipon?”—Mareko 6:22-24.

Ijin hnei Herodia hna lapa treqen! Matre canga öni angeic: “He i Ioane Bapataiso.” Ame hnei Salome hna canga bëeke koi Herodra me sipone ka hape: “Eni a ajane tro nyipëti a hamë ni, enehila hi, la he i Ioane Bapataiso hune la ketre ipala.”—Mareko 6:24, 25.

Ewekë lai ka ahleuhleunyi Herodra, ngo pine laka, drenge hë itre hna hën lo hnei angeic hna sisiny, thatreine hë angeic thipëne la sipo, ngacama kola troa humuth la atr ka meköt. Matre angeic a upe pi la ketre sooc troa eatrëne la hna qaja. Tha qea kö e thupen, nge kola ha bëeke fë hune ipala la he i Ioane hnene lai sooc, nge angeic a hamë Salome pi, nge Salome a line pi koi thin.

Ame la kola drenge lai hnei itretre drei Ioane, angatr a traqa pi troa xome la ngönetrei angeic me kelem. Thupene lai, angatr a tro ju troa thuemacanyi Iesu.

Ngo ame hë la Herodra a drei mejene la Iesu a aloine la itre atr me helë dremoni, xou ju hi angeic. Herodra a mekune ka hape, ame lo lae Iesu ka kuci iamamanyikeu, tre Ioane hna amelene “hmaca . . . qa hna mec.” (Luka 9:7) Matre atraqatre la trenge aja i Herodra Anetipa troa iöhnyi me Iesu. Ngo tha göi tro kö a drenge la maca i Iesu, ngo göi troa atre ka hape, Ioane kö lai?