KA QA NGÖNE ICETRÖN | DREI LA ITRE TEMOË I IEHOVA?
Nemene la pengöne la Itre Temoë i Iehova?
Ka hlemu la Itre Temoë i Iehova e cailo fen, ngo ka isapengöne kö angatr, ke pë fe kö ketre hmi hnei angatre hna ce memin. Ngacama ame la hnalapa ne xomi meköti ke, ej e Etazini, ngo tru catre kö hnei Temoë i Iehova ngöne la itre xa nöj. Kola e la eitr milio la etrune la Itre Temoë i Iehova, angatr a inine la itre atr la Tusi Hmitrötr ngöne la 230 lao nöj. Angatr a trongëne la hna qaja hnei Iesu, ka hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”—Mataio 24:14.
Thenge la itre nöj hnei eahuni hna mele ngön, eahuni a trongëne hnyawa la itre wathebo. Nge eahuni fe a catre thupën matre tha tro kö a lö hnine menune la kuci politik. Eahuni hi lai a xötrethenge hnyawa la hna amekötine hnei Iesu kowe la itre Keresiano, laka, “tha ite sine ne la fene [kö hun].” Celë hi matre tha eahuni kö a hane kuci politik me sine la itre huliwa ne ej maine sajuëne pena la itre isi. (Ioane 15:19; 17:16) Ame ngöne lo Hnaaluene Isi Ka Tru, hna akalabusine me axösisine la Itre Temoë i Iehova, uti fe hë la troa humuthi angatr pine laka, tha hnei angatre kö hna ce memine la itre ka isi. Hna cinyihane hnene la ketre hene ne hmi ne Alema, ka hape: “Mama hnyawa pi hi ka hape, angatr hmekuje hi la itre ka tha hane kei thenge la aja ne la musi Hitler.”
Ka lapa catre la “[Itre Temoë i Iehova] ngöne la itre hnei angatr hna inin matre tha kei kö angatr kowe la itupath. Maine ju tro hi a hane cilëne hnene la itre atr ka lolo cili ngöne la itre göhnë ka tru ne la politik, ngo nanyi catre la mekune cili koi angatr. . . . Tha angatre kö a wangacone la itre mus, ngo eje kö la mejiune ka catr thei angatr laka, Baselaia i Akötresie hmekuje hi la ka ijije troa nyinyine la itre jol ne la itre atr.” —Zonal ne République Tchèque, Nová Svoboda.
Tha ka isa mele kö eahun, maine mel ananyine pena la itre xan. Hnei Iesu hna thithi fë la itretre drei nyidrë me hape: “Tha sipo cilieti kö ni, mate tro cilieti a thei angate qa la fen.” (Ioane 17:15) Celë hi matre, maine jë tro epuni a hane öhnyi eahuni e huliwa, me itö, me hane tro kowe la itre uma ne ini ne la nöj.