Loi e Tro Së a Amamane Laka Easë a Nyipi Ewekëne La Thupene Mel
1 Ame la kola nyipi ewekëne la ketre trejine maine ketre atr ka meci hë, ke hna dreng’atrune hnei nöjei atr asë. Nge troa ketr catrëne la itre hni angatr, hnene laka kola utipine la ketre atr hna hnime ngöne laka, angeic’a meci troa amelene pe la itre xan. Celë hi matre tro la nöjei atr ka ajane troa hetrenyi la mele ka tha ase palua kö, a nyipi ewekëne la thupene mel, ene la troa wang’atrune la drai ne amekunëne lo meci Keriso e treu Eipereme drai 6. — 2 Kor. 5:14; 1 Ioane 2:2.
2 Loi e tro së a Nyipi ewekëne la ihnimi Iehova: Nemene la aqane tro së a amamane me olen’atrune koi Iehova, la hnei Nyidrëti hna hamëne la thupene mel (1 Ioane 4:9, 10)! Kola mama la sipu ihnimi Iehova hnene laka, hnei Nyidrëti hna upe la neköi Nyidrëti ka cas, matre nyine thupene mel kowe la nöjei atr asë; tha hnei Nyidrëti kö hna iëne la ketre angela hnine la nöjei milio ka nyi hlue i Nyidrëti hnyawa, ngo hnei Nyidrëti hna upe pe la sipu nekön, lo hnimina i Nyidrë (Ite Edomë 8:22, 30). Celë hi matre hnei Iesu Keriso, lo ka atre Iehovati hnyawa hna amekunë së me qaja ka hape: “Ke hnei Akötresieti hna hnime la fene hnengödrai, matre Nyidrëti a hamëne la neköi Nyidrëti ka cas, matre tha tro kö a meci la ketre e angetre lapaune koi Nyidrë, ngo troa hetrenyi la mele ka tha ase palua kö.” — Ioane 3:16.
3 Loi e Anyipi ewekëne hne së la ihnimi Iesu Keriso: Eje hi laka, loi e ketre tro fe së a hane amamane la ihnimi së koi Iesu Keriso, lo atre hamëne la mele i Nyidrë nyine thupene mele kowe la nöjei atr ka kösau (Mat. 20:28). Kola mama lai ihnimi Nyidrë ngöne laka hnei Nyidrëti hna ipië ju koi Iehova me ajane pe troa nyine thupene mel. Ngacama lolo me madrine troa ce mele me Iehova memine mina fe la itre angela e koho hnengödrai, hna nue pe la göhnë cili, troa nyine thupene mel kowe la nojei atr e celë fen; celë hi matre loi e tro së a mekune hnyawa lai aqane ujë i Nyidrë. Ketre tha haceene pena kö Nyidrëti troa nue la hnengödrai, maine troa ipië pena kowe la nöjei atr, memine fe laka tro Nyidrëti a meci matre nyine thupene mel, pëkö ka acilëne lai aja i Nyidrë troa nyi hlue i Iehova. Ngo hnei Nyidrëti pe hna, “aipië Nyidrëti kö me xome la pengöi hlu, nge hna longëtine matre atr; nge mama ha laka,. . . hnei Nyidrëti hna aipië Nyidrëti kö, me drenge thenge utihë la mec, ene la meci ne iaxösisi”. — Fil. 2:5-8.
4 Nemene la aqane tro së a amamane laka easë a nyipi ewekëne la thupene mel?: Eje hi laka, loi e tro së a wang’atrune me olen’atraqatre la thupene mel. Nyipi ewekë tro së a atre la hnei Akötresie hna kuca matre mele së hna jëne Iesu Keriso (Ioane 17:3). Qangöne lai, loi e tro së a lapaune ju kowe lai thupene mel (Ite Hu. 3:19). Ketre, kola upi së pe troa nyi hlue i Iehova Akötresie, hnene la troa nue la mele koi Nyidrëti me xomi bapataiso (Mat. 16:24). Nge hnene laka easë a troa mele thenge lai mekune ka eje the së, loi e anyipi ewekëne palahi hne së la nöjei ijine troa qaja koi itre xane lai ithuemacanyi ne mel, ene lo lai thupene mele ka sisitria. — Rom. 10:10.
5 Ketre, tha ka jole kö koi së isa ala casi troa xötrethenge la itre hna amekötine cili. Mika 6:8 a jele nyipicine me hape: “Nge nemene la ewekë Iehova a ajane thei eö? Ue kö troa kuca la meköt, me hniine la ihnim, me ce trootro me Akötresi’ö memine la hni ka ipië?” Hnei Davita mina fe hna qaja koi Iehova ka hape: “Nge qa thei Cilieti la nöjei ewekë asë, nge ketre qa ngöne ihnatrapaime i Cilieti la eahuni a hamën.” — 1 A. l. itre jo. 29:14.
6 Matre troa kökötre palahi la lapaune së kowe lai hna hnëkëne me kuca ka sisitria hnei Iehova, hnauëne laka tha e pe me ithahnataane memine la fami la itre mekene qa ngöne 112 utihë 126 ngöne lo lai itus, “Le Plus Grand Homme de tous les temps”, qëmekene la ijine troa amekunën? Celë hi aqane troa hnëkëne la itre hni së, matre tro së a mekune hnyawa me atreine troa nyipi ewekëne atrune la thupene mel, ngöne la ijine kola troa atrune la Drai ne Amekunën, e treu Eipereme drai 6, 1993.