Itre Nyine Troa Kuca Hnene La Itre Ka Hnyipixe Maine Itre Ka Hekö Hë Ngöne La Nyipici

¹ Kola hnyinge hnei Davita ka hape: “Iehova fe, drei la atre troa hunuma hnine la uma ne heta i cilie? Drei la atre troa lapa hune la wetre ka hmitrötre i cilie?” Nyidrëti hmaca kö a sa hnyawa ka hape: “Loi la atre tro meköt, me kuca la meköt, me qaja la nyipici qa kuhu hni angeic.” (Sal. 15:​1, 2) Tha saaze kö la itre hna amekötine cili. Ame la nöjei atr ka ajane troa hane hmi ngöne la Ekalesia i keresiano, ke, tro angatr’a hmaca troa kuca la ngazo, me tha iji menu la ka haitr. Pëkö göhnë hnine la nöje i Iehova, kowe la itre atr ka iwatratra, ka iwesitrë me isi, maine ka sili trengathoi pena. Qa ngöne lai, ngacama itre ka xötrei, maine ka he cili pena ha së ngöne la nyipici, loi e tro asë hi së a lapaune me trongëne hnyawa la itre wathebo qa hnine la wesi ula i Akötresie. — Gal. 5:​19-21.

² Alanyimu la itre ka xötrei lö kowe la Organizasio i Iehova. Itre thöthi me itre qatr’a ujëne la itre mekuana i angatr, matre ihmeku la aqane mele i angatr memine la aja i Akötresie. Ngöne la ketre nöje ailojë ne Amerika, ke, kola porotrikëne la ketre nekönatre trahmany ka ngazo catre la thina, tha hna mele kö thei keme me thin. Angeic’a traqa ngöne la 18 lao macatre, nge ka ufi dorog hë, ketre, celë hi jëne tro lapa angeice koi kalabus. Ngo hnei angeice hna nyiqaane ini tusi, matre hmaca ju hi troa ce tro memine la itre sine ce elo hnapan, nge qale jë pena kowe la itretre anyipici Iehova, uti hë la angeic’a nue la mele i angeice koi Akötresie.

³ Ketre, loi e tro së a amadri Akötresie ngöne la nöjei aqane ujë së, “thina ka hmitrötre me nyipici.” (Efe. 4:24) Qa ngöne lai, tro së a “trije pi la atre ka hekö memine la itre thina i nyën” nge “xetrëne jë së la atre ka hnyipixe, hna ahmadradrane ngöne la inamacane thenge la hnaijine atre xupi së” e easë a ajane troa hane mele hnine la organizasio i Iehova hna aceitunëne memine la wetr. — Kol. 3:​9, 10.

⁴ Ka mene la wesi ula i Akötresie: Jëne la Tusi Hmitrötr, Iehova a qaja la pengö i Nyidrë koi së, nge troa hetre thangan’ej ka loi kowe la itre mekune së, me itre aqane ujë së (Rom. 12:⁠2). Hetre emenene la treng’ewekë i Nyidrë, kola ujëne la itre mekun, me thele la aliene la itre hni ne la itre atr (Heb. 4:12). Tusi Hmitrötre a qaja la aja i Iehova the së, ene laka, tro së a hetrenyi la aqane ujë ka loi, troa catre cainöj, nge tha tro kö a wangacone la itre icasikeu i Keresiano.

⁵ Enehila easë a melëne la ketre ijine akötr, nge nyipi ewekë tro la keresiano a hmek, pine laka catre hnine la itre ethanyine la fen, nge canga hmaloi hi troa nuetrije la itre wathebo i Akötresie. Eje hi laka, maine tro la keresiano a wangacon, ngöne la ca ijin, la ini tusi angeic, ini tusi fami, itre icasikeu ne la Ekalesia, maine wangacone pena la huliwa ne cainöje trootro, ke, eje hi laka ngacama keresiano ka catr, tro ha uthithi trootro qa ngöne la lapaun, nge thupene lai tro ha kei kowe la thina ka ngazo. Celë hi la kepine matre, Paulo a cinyanyi ju koi Timoteo ka hape: “wai’ö kö memine la aqane ini” nge, “cile huti ju kowe lai; ke maine eö a kuca lai, tro eö a amele eö kö me angatre fe hna drei’ö.” — 1 Tim. 4:16; 2 Tim. 2:⁠7.

⁶ Ngacama ka xötrei së maine ka hekö pena së ngöne la nyipici, ngo nyipi ewekë tro së a thupëne hnyawa palahi la itre ewekë hnei Akötresieti hna ajane the së, nge tro hë së a tuluthe la trenge catre së ngöne la huliwa ne cainöje trootro, me catre melëne lo hna thingehnaean, maine ajane së troa traqa kow (1 Pet. 1:​13-16). Qa ngöne lai, Nyipi ewekë catre tro së a trongëne e nöjei drai la itre ewekë ka meköti hnei Iehova hna ajane the së.

⁷ Loi e troa eje thei epuni la mekune celë, ene la troa catre cainöje ngöne la treu tixenuë ne la macatre ne huliwa. Tro fe së a catre xatuane la itre xane troa kökötre ngöne la lapaun, me huliwa atrunyi ngöne la troa cainöje trootro (Rom. 1:12). Loi e tro pala hi së a thele me hnime la itre mekune ka lolo jëne la hna isa ini tus, hna ini tusi hnine la fami, memine la hna hane sine la itre icasikeu (Fil. 4:⁠8). Eje hi laka, tha tro jë kö Iehova a wangacone la trengecatre hnei epuni hna hamën, matre amadri Akötresie hnene la hna trongëne la aja i Nyidrë. — Kol. 3:​23, 24.