Xatuane Jë La Itre Ka Ini Tusi Hmitrötre Troa Hnëkëne La Etid
1 Ame la itre hnainine ka hnëkëne la itre etid e nöjei wiik, ke, angatre lai a amamane la trenge aja i angatre kowe la ini, nge kola canga tru ngöne la ua hune lo itre ka tha hane kö hnëkë. Ame la itre xaa ijin, ke, tha ase kö la hnainine hnëkën, pine laka thatreine kö la aqane troa kuca. Hawe ma loi e troa ini angeice la aqane troa hnëkën. Tuneka la aqane troa kuca?
2 Ngöne la qaane, ke, loi e troa pane atrotrohninë angeice laka, ame la troa hnëkë, ke, kösë lo easë isa alacasi a ini. Alanyimu catre la itre atr, laka ngacama atreine angatre e, ngo tha ase kö amamai angatre la aqane troa inin. Ame ngöne la itus “Manuel pour l’Ecole du ministère théocratique” götrane 33-42, ke, alanyimu la aqane kuca ka ijije nyine tro së a huliwaane matre xatuane la itre hnainin.
3 Amamane ju kowe lai hnainine la enyipiewekëne la etid: Ijije tro epuni a amamane kowe la hnainine la itusi ne ini epuni lo hnei epuni hna nyihatrene e kuhu hnine me sija la itre mekune ka nyipiewekë. Amamai angeice jë, laka e troa goëene la itre hna nyihatrene, ke, kola amekunë angeice la itre mekune, qangöne lai, ijiji angeice troa qaja ngöne la sipu trenge ithahnata i angeic. Qangöne lai, tha tro kö a majemine elanyi e apexejene la itre mekune qa hnine lai itusi la kola sa la itre hnying. Ame la trenge catre hnei angeice hna kuca enehila, ke, troa xatua angeice epine ngöne la angeic’a sa ngöne itre icasikeu ne la ekalesia. Troa mama ka hape angeice a kapa madrine la itre itusi hnene la aqane sa i angeic, nge tro fe a mama la ejuine la trotrohnine i angeic.
4 Ini angeice jë troa huliwaane la Tusi Hmitrötr: Ame la ajane la hnainin, ke, troa wangatrehmekune la ketre xötre e kuhu hnine la Tusi Hmitrötre hna cinyihane hnine la itusi ne ini. E atreine hnyawa ha angeic, ke, tro ha tru la madrine i angeic, nge ejehi laka ketre atr lai ka ini Tusi Hmitrötr. Ejehi laka, loi e tro angeic’a pane inine lo itre ëjene tusi hna cinyihane xötrëne ngöne la qaane la Tusi Hmitrötre, ke, aqane tro angeice lai a majemi kowe lo 66 lao ëjene Tusi Hmitrötr. Ngöne la angeic’a thele me e la ketre mekene Tus, ke, kola xatua angeice troa wangatrehmekune la hnepe ithahnata ka ihmeku memine la mekune ne la paragaraf, nge tha tro kö a amenu angeice hnene la itre xaa mekune ka tha ihmeku kö memine la paragaraf.
5 E maine kola tru trootro ngöne la ua, xatua angeice jë troa e la Tusi Hmitrötre qane la qaane utihë la pun. Amamane ju koi angeice ka hape ame la hna cinyihan’asë e kuhu hnine la Tusi Hmitrötr, ke, qa thene la Ua i Akötresie, nge tro la itre keresiano ka nyipici a xeni la xeni ne la ua, ene la trenge ewekë i Akötresie. — Mat. 4:4; 2 Tim. 3:16, 17.
6 Qaja jë la itre xaa tusi nyine qejepengöne la Tusi Hmitrötr: E öhne së laka kola tru trootro la wangatrehmekune i angeic, ke, ijiji angeice troa nyiqaane huliwaane la itre xaa tusi nyine qejepengöne la Tusi Hmitrötr. E trotrohninë së la pengö i angeic, ke, xatua angeice jë troa thele la itre xaa mekune ngöne la itre xaa itusi Sasaiatri, ke, tro angeice elanyi a canga trotrohnine la kola qaja ngöne la itre icasikeu ne la ekalesia. Ini angeice jë la aqane huliwaane la itre hna cinyihane hnine lo Traduction du monde nouveau, tuune lo “Index des mots bibliques les plus importants.” E maine angeic’a nyiqaane acile la hnë ami tusi Sasaiatri, ke, amamai angeice jë la aqane huliwaane lo itus Comment raisonner à partir des Ecritures, lo Index, me Auxiliaire pour une meilleure intelligence de la Bible.
7 E hne së hna amamane kowe la itre ka ini Tusi Hmitrötre la aqane hnëkëne la etid, ke, easë lai a hnëkë angatre matre tro angatr’a tru trootro hnine la nyipici, kösë itre hnainine ka atreine pë hë melëne la nyipici thupene lo lue itusi hna ce inine memine lo atr ka etid koi angatr.