Huliwa Ne Cainöje Trootro—Ketre Hnëqa Ka Tru
1 Ame la huliwa ne la maca ka loi, ke, ketre hnëqa ka tru hnei Iehova hna hamë së. (Rom. 15:16; 1 Tim. 1:12) Ma epuni jë fe hi a hane mekune tune lai? Tha tro kö la itre traeme ne huliwa së, maine itre ka ihnyimasai pena a apujene la aqane tro së a nyipiewekëne la huliwa celë. Ame la troa atrune la atresiwa i Akötresie, ke, ketre götrane qa hna hamëne kowe la ala xalaith. Hawe, tro së a amamane tuneka la madrine së?
2 Tha hna wang’atrunyi së kö hnene la fen, la easë a cainöjëne la maca ne la Baselaia. Hna xele ma wai së hnene la ka alanyim, me tha nyipiewekëne la huliwa së. Hnei itre xane hna hnyimasai së me icilekeu me easë. Maine jë, kola traqa la itre iangazo qa thene la itre sine huliwa së, maine itre ka lapa ezi së, maine pena qa thene la itre atrene la fami së. Ame koi angatr, ke, hmo hë së, nge easë a aluzi traem. (Ioane 15:19; 1 Kor. 1:18, 21; 2 Tim. 3:12) Hnei angatre hna hnëkëne la itre trenge ithahnata i angatre nyine troa ananazijë së matre tro së a kucakuca, me tro së a nuetrije la hnëqa së ka tru. Hna hamëne hnei Satana la itre mekune ka ngazo matre troa “atimekëne la ite hni angete tha lapaune kö, wanga wië koi angate la lai ne la maca ka loi.” (2 Kor. 4:4) Tro epuni a hmekëne tuneka?
3 Nyipiewekë catre troa lapa mekune ka hape ame la huliwa ne cainöjëne la Baselaia, ka sisitria koi së angetre trongëne enehila. Drei lai maca ne iamele ka sisitria catre kö hune la itre xaa aja së. (Rom. 10:13-15) Ame la pane ewekë ka sisitria koi së, ke, ene la troa kepe së hnei Akötresie. Tha tro kö la itre mekune ka iamenu ne la fene ka ngazo a acilë së e troa catre qaja trongëne la maca ka loi.—Ite Huliwa 4:29.
4 Hnei Iesu hna wangatrune la hnëqa i nyidrë troa kuca la aja ne la Tretretro i nyidrë. (Ioane 4:34) Hnei nyidrëti hna nue apexejenyi nyidrë kowe la huliwa ne cainöj, nge tha hnei nyidrëti kö hna nue la itre iajolë, maine itre ka icilekeu pena troa ananazijë nyidrë. Ngo, ame la götrane huliwa ka tru ngöne la mele i nyidrë, ke, ene la troa cainöjëne palahi la Baselaia. (Luka 4:43) Tulu lai hnei nyidrëti hna upe troa hane tui nyidrë. (1 Pet. 2:21) Qa ngöne lai, easë a amamane laka easë a nyihlue, ceitu me easë a “ce huliwa me Akötresie.” (1 Kor. 3:9) Hapeue la hnëqa celë, ka tru kö eje koi së? Easë kö a thele la itre ijine troa cainöjëne la maca ka loi koi itre xan, maine ngöne la itre drai hna hnëkëne thatraqane lai, maine ngöne la nöjei ijine ka ijij? Tune la itre temoë i Iehova, tro palahi së a hnëkë matre troa hetre “wene la ite ukeineqe shë kola olene kowe la atesiwa i nyidë.”—Heb. 13:15.
5 Tro la aqane ujë së a amamane la aqane eatrëne hne së la huliwa ngöne la hna cainöje trootro. Hapeu, madrin’atraqatre kö së kowe la nöjei ewekë hnei Iehova hna kuca koi së? Kökötre kö e kuhu hni së la ihnime koi Iehova, ka aijijë së troa kuca la hne së hna atreine ngöne la huliwa i nyidrë? E tro së a mekune la itre manathithi hne së hna melëne enehila, memine la itre hnei Iehova hna thingehnaeane kowe la itre dai ka calemi, ke, kola xatua së troa atrune la ihnime kowe la Atre xupi së. Ihnimi ka tune lai la ka troa upi së troa huliwa catr—ene la troa cile huti catre troa cainöjëne lapaane la maca ne la Baselaia kowe la ka alanyim. Tro la aqane catre së a anyipicine la ihnimi së koi Iehova, me kowe la itretre hnaiji së.—Mareko 12:30, 31.
6 Easë a amamane ka hape ka tru koi së la ewekë hne së hna kuca, maine hna ithahnataane pena. Hapeue la hnëqa së, ene la troa cainöjëne la Baselaia, ka tru palahi eje koi së? Nyipiine palahi së la huliwa ne cainöj? Eje palahi ngöne la mekune së troa cile huti ngöne la huliwa ne iamele, ngacama tru la itre ka icilekeu? E hne së hna wangatrune la hnëqa ka sheminge celë, ka xeci hnyawa koi së tro së a catr, me pexeje la hni së.—2 Kor. 4:1, 7.