Amamane Jë Ka Hape Epuni a Nyipiine La Itre Xaa Atr—Götrane 2
1 Ejehi laka atraqatre la aja së troa iloi memine la itre atr ka mele ngöne la götrane së. Kola hape koi së troa mekun, me metrötrëne la itre emekötin, memine la itre mekune i angatr.
2 Nyipi hlemu laka ame la itretre temoë i Iehova, ke, itre atr ka loi angatr. Nyipi ewekë tro së a amamai tulu ka loi ngöne la götrane së, maine ngöne uma ne ini, maine ngöne hna huliwa, maine ngöne itre asabele, pine laka celëhi ketre taane ne mekune ne la itre ka qaja aloinyi së.—Goeëne ju la La Tour de Garde ne 15 Juun, 1989, götrane 20.
3 Matre hapeue la troa hetrenyi la thina ka loi, ene la troa meköt, troa akötrehnine la hnëqa së, me loi la aqane ujë së. Tro fe a metrötrëne la itre ka lapa ezine la uma ne Baselaia. Tha tro kö a nyipiewekëne la thina ka meköti së, e hne së hna wangacone la itre ka lapa ezi së. Hnei Paulo hna upi së matre loi e troa “ijije la thina së memine la maca ka loi.”—Fil. 1:27.
4 Hetre itre ijine mina fe kola nyiulile hnene la itre ka lapa ezine la uma ne Baselaia, pine laka pëkö imekunekeune thene la itre ka sine la itre icasikeu. Tha loi kö tro la itre trejin’a icacaxenyi ngöne la palagojenyi qëmekene la uma ne Baselaia, me porotrik’aqeany, maine nyimejen maine u catr, ene pe drenge hnene la itre ka lapa easeny. Tha tro kö a nue la itre nekönatre troa nyinyape e hnin, me e tröne la uma ne Baselaia. Loi e tro fe së a hmekëne la aqane troa thinge la itre qëhnelö ne loto, the hna catrëne kö, ke, keciqa jë, ketre the auliline catrëne kö, ke, celë hi itre jëne matre kola elëhni la itre ka lapa ezin. Jëne la itre ewekë celë, ke, tro la itre atr a jelengazone la ekalesia asë. Eje mina fe laka, nyipiewekë catre tro së a metrötrëne la itre hna amekötine ngöne la gojeny, ngöne la easë a xomi loto kowe la ketre götran.—Rom. 13:1, 2, 5.
5 Tha loi kö troa ami loto ngöne la ifekë götranen, maine tro pena a thingijëne la hnë nyapei loto, maine ketre menyi gojeny. Ame la itre hnë ami loto, ezine la itre uma ne huliwa, ke, thatraqane la itre ka huliwa, hawe, tro hmekujehi a amë la loto së e cili e hna nue së. Nyipi-ewekë tro la itre kolezi ne la itre qatre thupe a ce huliwa hnyawa ngöne la ketre götrane hna troa icasikeu e nöjei wiike hnene la köni ekalesia maine foa.—Goeëne ju La Tour de Garde ne 1 Okotropa, 1988, götrane 17, paragarafe 13.
6 Tusi Hmitrötr’a upi së troa “kuca asë nyine atrunyi Akötesie,” nge kola amamane fe koi së troa nyipiine la itre atr ka tha hmi kö. (1 Kor. 10:31-33) E maine easë a ‘isa wange la ite ewekë i ite xan,’ ke, tha tro kö së a lö hnine la itre götrane i angatr, nge tro së a hetre iwangatruny. (Fil. 2:4) Tro fe së a hmekëne matre tha tro kö së a itö, maine saleme ngöne la ijine easë a huliwai Iehova.
7 Troa mama la aliene la hni së—e hnin, me e tröne la ekalesia—e hne së hna nyipiine la itre xan. Easë a amamane laka easë a ‘hnime la ate lapa eashenyi së tui së hi’ e hne së hna hmekëne palahi la itre hne së hna kuca memine la itre hne së hna qaja—Mata. 7:12; 22:39.