Kuca Jë La Nöjei Ewekë Nyine Troa Atrunyi Akötresie
1 Drei la madrine ka tru troa itrohnyi memine la itre trejine me easë! (1 Kor. 16:17, 18) Easë lai a melën, e kola traqa itronyi ngöne la itre ijine icasikeu, me itre asabele, itre kovasio, me ngöne la huliwa ne cainöje trootro. Easë a amamane la ihnimi trejine së, ngöne la itre ijine ka ijij, ene la easë a ihamëne la hnalapa së. E easë a tro tuun, ke, easë lai a ihnimi trehnyiwa, me ithuecatrekeu. (Rom. 12:13; 1 Pet. 4:9) E kola hnëkëne la xeni ngöne la ijine faipoipo, ke, loi e troa lapa mekune la itre ihaji ka ijije ngöne La Tour de Garde ne 15 eiperem, 1984.
2 Loi e Troa Hnëkëne Hnyawa La Itre Nyine Madrine Kowe La Ka Alanyim: E maine easë a “xen, me ij, me kuca kete ewekë kö,” ke, loi e tro së a “kuca asë nyine atrunyi Akötresie.” (1 Kor. 10:31-33) Tha hna trongëne kö la eamo celë hnei itre xan, nge kola kökötre trootro la itre jole hnene laka, alanyimu catre hë la itre icasikeu i itre tremesinene matre tha ijije hë troa cilëmeken. Ame itre xaa ijin, itre hadredre lao atr hna könëne kowe la itre calapa i tremesinen, nge kola mama e cili la itre aqane kuci nyine madrine ne la fen. Ame itre xaa ijin, kola sipone la itre ka troa sine matre nyithupene la angatr’a lö, maine traqafë itre xaa ewekë pena. Ame la itre icasikeu cili, ceitune hnyawa hi memine la itre ewekë ne fen, nge ame la aqane mekune ka fetra qa ngön, ke, ka tha ihmeku kö memine la loi, memine la itre trepene meköti ne la Tusi Hmitrötr.—Rom. 13:13, 14; Efe. 5:15-20.
3 Hna e laka kola elë la etrune la itre temoë ka itrohnyi ngöne la itre götrane hna nyithupen, nge tha loi kö la itre nyine madrine ka eje thene la fen, nge pëkö ka atreine troa thupëne la aqane trongen’itr’ej. Ka hlemu fe la itre huliwa ka tuune hna kuca hnene la “Temoë i Iehova” ngöne la ketre mecixeni me sabath, hna traqa ngöne otel, maine ketre götrane hna ihamë. E troa elemekene la ka alanyimu, ke, tro fe a kökötre la itre jol. Kola öhne e cili la itre aqane ithahnata ka ngazo, me iji ka haitr’atrun, me kuci ngazo. (Efe. 5:3, 4) Ame la itre aqane ujë cili hna öhne ngöne la itre ijine itrohnyi hnene la itre sine ce elo, ke, tha kolo kö a atrunyi Iehova. Angatre pe a adrone la ëjene la ekalesia, matre nanazije hnei itre xan.—1 Kor. 10:23, 24, 29.
4 Hna thuecatre kowe la itre keresiano troa amamane la ihnimi trehnyiwa, ngo ame la ka sisitria, ke, troa ithawakeune la itre ewekë ne ua. (Rom. 1:11, 12) Ka loi la troa itrohny, ngo loi e tro hi a xalaith. Hna qaja hnene la itus Notre Ministère ngöne la itre götrane 135-6 ka hape: “Ame itre xaa ijin, hna könëne la itre xaa fami kowe la ketre hnalapa matre troa xen, me porotrike memine la itre trejine ngöne la ua. . . . Ame la itre ijine cili, ke, hna drenge hnene la itre ka könëne laka hnëqa i angatre troa elemeken’itr’ej. Hna lapa mekune hnei angatr, matre hnei angatre hna waipengöne me mekune laka, loi e troa tuluthe la etrune la itre hna troa könën, memine la eqeane la traeme ne ce xeni imadri.” Hnei Iesu hna amamane laka tha nyipiewekë kö troa hnëkën’atrune la ijine cili, pine laka ame la aja së, ke, ene la troa ithuecatre kowe la itre sine së ngöne la ua.—Luka 10:40-42.
5 Ketre ewekë ka loi la troa ihnimi trehnyiwa kowe la itre trejine ngöne la ua. Ngo, isa pengöne catre la troa itrohnyi ngöne la ketre hnalapa hi memine la troa hnëkëne la ketre icasikeu ngöne la ketre götrane hna nyithupen, nge drenge së laka hetrenyi la ua ne fen. Ame la epuni a könëne la itre xane troa traqa kowe la hnalapa i epun, ke, loi e troa pane xeci koi epuni laka atreine tro epuni a troa aeatrëne la hnëqa i epuni troa cilëmeken.—Goeëne ju La Tour de Garde ne 15 ogas, 1992, götrane 17-20.
6 Nyipici laka, hnei Iehova hna amanathithi së jëne la itre trejine me easë, nge easë a kapa la itre ixatua ka tru qa thei angatr, celëhi ka upi së troa trongëne palahi la itre huliwa ka loi. (Mata. 5:16; 1 Pet. 2:12) E ipië, me loi la aqane ujë së ngöne la itre nyine madrine me itre sine së, ke, tro palahi së a atrune la Akötresi së, me ithuecatre koi itre xan.—Rom. 15:2.