Tro Palahi a Sine La Nöjei Icasikeu—Ka Sisitria Koi Së Matre Troa Cile Catr
1 Hnei Paulo aposetolo hna xatua së troa lapa “cate kowe la lapaun.” (Tito 1:9, 13) Ngöne la nöjei icasikeu ne la ekalesia, ke, easë a wangatrune la nöjei mekune hna hamën, nge kolo fe a ini së la aqane troa thupëne la ixetre ne isi ngöne la ua, matre atreine së troa “thipe tije la ite nyinyithina i diabolo.”—Efe. 6:11; Fil. 4:8.
2 Hna Hamëne Hnene La Itre Icasikeu La Itre Hne Së Hna Ajan: Nyipiewekë catre koi së troa sine la itre icasikeu ne la ekalesia matre troa cile catr. (1 Kor. 16:13) Ame la kola thithi ngöne la itre icasikeu, ke, nyine ole, me atrunyi Akötresie, me sipo Nyidrë troa amanathithine la ekalesia, me sipone la itre nyipiewekë thatraqan’ej. (Fil. 4:6, 7) Kola akökötrenyi së ngöne la ua qa ngöne la hne së hna ce thinge la itre nyima ne Baselaia, jëne tro së lai a hane qaja amamane la itre mekune së, memine la itre aliene la hni së ngöne la easë a atrunyi Iehova. (Efe. 5:19, 20) E tro së a ithahnata memine la itre trejine me easë ngöne la Uma ne Baselaia, qëmekene la itre icasikeu, me thupen, ke, tro lai a xatua së, me acatrenyi së ngöne la ua, me ithuecatre koi së.—1 Thes. 5:11.
3 Ame la taane la cainöje ka ketre pengöne hna cilefë ngöne la treu eipereme ne la macatre celë, ke, hna hape “Easenyi catre hë la pune kowe la hmi ka thoi” hna ketr la itre ka hnime la nyipici, me amamane koi angatre laka xoxopatrepehi la itre drai, hawe, nyipiewekë koi angatre troa canga lö trije la Babulona atraqatr. (Hna Ama. 18:4) Ngöne lo treu Juune me Julai, ke, atraqatre la madrine troa kapa la ketre ithuecatre ka tru jëne la köni hna cinyihane qa hnine La Tour de Garde, kola hamëne la itre mekune ka thinane la gojenyi ne la meköt! (Ite Edo. 4:18) Pane mekune ju së la itre ewekë ka tru tro së a trian, e hne së hna wangacone la itre icasikeu.
4 Ngöne lo kovasio ne distrik lo hna hape “Itre aqane atrunyi Akötresie ngöne la madrin,” ke, hna amamane hnyawa la eloine la troa ini, matre troa hetre thangane la aqane tro së a cainöj. Tune la hna qaja hnyawaane ngöne la itus Organisés pour bien remplir notre ministère ngöne la götrane 73 laka, ame la Ini Ne Cainöje Trootro Qa Thei Akötresie, ke, jëne tro lai a inin, me akökötrene la ekalesia asë. Ame euehilo, hna xatua së hnene la ketre cainöje troa atre la aqane trongene la organizasio ngöne la hneijine së, nge easë mina fe a atrepengöne hnyawa jëne la itus Prédicateurs. Zö së pe hi e tro së a triane la ini hna troa kapa qa ngön.
5 Kola xatua së hnene la icasikeu ne huliwa ne cainöj, matre maca hnyawa së troa cainöje trootro. Kola mama lai jëne la icasikeu, lo easë a kapa la itre ini thatraqane la huliwa ne cainöje göi troa trofë trongëne lo Itre Ithuemacanyi ne la Baselaia No. 34. Hnene la itre thangane ka loi ne la itre huliwa hna kuca ngöne la fene hnengödrai hna anyipicine ka hape Iehova la ka amanathithin. (Ce wange ju la 2 Korinito 9:6, 7.) Ejehi laka, ketre ithuecatre lai kowe lo itre atr ka hane sine palahi la itre icasikeu, celëhi matre angatra hamëne fe la ixatua i angatr, me catrefë fe la huliwa cili.
6 Qa ngöne la Ini Tusi ne la Ekalesia, maca trootro koi së troa waihatrene la hneijine së enehila, hnene la itre ewekë hne së hna inine qa hnine la Wesiula i Akötresie memine la trotrohnine hne së hna kapa qa hnine la itus Révélation: dénouement. Ame la easë a goeëne la itre ewekë ka traqa enehila e celë fen, ke, nyipiewekë koi së troa trotrohnine la ejuine la itre hna perofetane hnine la tusi Hna Amamane, a kola eatre enehila ngöne la hneijine së.
7 Nyipiewekë Tro Palahi a Amë Panëne La Itre Icasikeu Ngöne La Mele Së: Kola wangatrehmekune hnene la itre trejine ka mele ngöne la itre nöje gaa iakötrë, la emelene la troa icasikeu palahi e nöjei wiik. Hanawange la ketre ceitun, e Burundi, me Rwanada, me Liberia, me Bosni Herzegovina, ke, alanyimu catre la itre ka xötrei sine la itre icasikeu, celëhi matre ame itre xaa ijin, ke, kola e maine alu maine aköni la etrune la itretre cainöj. Qa ngöne lai, Iehova a xatuane la itre trejine troa cile huti ngöne la ua ka caas.—Fil. 1:27; Heb. 10:23-25.
8 Tro la itre ka wangacone la itre icasikeu a canga wange matre amekötiine hmaca la itre aqane waiewekë i angatr. (Ate Cai. 4:9-12) E ajane së troa cile hut, ke, nyipiewekë koi së troa easenyine la itre ka nyipi atr ngöne la ua, nge hna aijijëne lai hnene la hna sine lapaane la itre icasikeu.—Rom. 1:11.