Troa Hnëkë Hnyawa—Jëne Troa Öhnyi Thangane Ka Loi
1 Maine tro së a canga hnëkë thatraqane la huliwa ne cainöj, ke, tro lai a xatua së troa trije la xou ngöne la kola troa cainöje trootro. Ame la epuni a easenyine traqa kowe la itre hnalapa, ke, loi e tro epuni a atre hnyawa la hnei epuni hna troa qaja kowe la itre atr. Tha tro kö epuni a canga xouene la itre jole hna troa ixelë memin. Ame la easë a bëeke qa hna cainöj, hetre egöcatre së qa ngöne la hne së hna catre troa cainöje trootro. Nyipici laka, maine easë a ajane troa atreine troa cainöje me inine la itre atr, ke, nyipi ewekë troa hnëkë hnyawa.
2 Hnei Paulo hna amamane hnyawa koi së la enyipiewekëne la troa hnëkë ngöne la nyidrë a ithuecatre koi së troa “sile la ite tengene hnatrapaca së ene la hna hnëkëne la maca ka loi ne tingeting.” (Efe. 6:15) Kola hape koi së, tro së a canga mekune la itre nyine troa qaja me amë itre eje ngöne itre hni së, nge loi e troa hetrenyi la hni ka ajane ngöne la aqane tro së a ujë. Ngöne la easë a hnëkë troa cainöjëne la nyipici kowe la itre xaa atr, ke, tro hë së a öhnyi loi ne la huliwa së ngöne laka hetre thangane kowe la Baselaia, nge celë hi ka amadrinë së lai.—Ite Huliwa 20:35.
3 Troa Hnëkë Tuneka Kowe La Huliwa Ne Cainöj: Tro së a iëne la ketre aqane tro fë cainöje hne së hna ajan, maine qa hnine la itus Comment raisonner, maine qa hnine la Huliwa ne Baselaia ngöne la götrane pun. Iëne hnyawane ju la ketre mekune qa hnine la Tusi Hmitrötre hnei epuni hna ajane troa ithahntan, nge mekune ju la itre hnepe hnaewekë maine itre hnëewekë hnei epuni hna troa qaja atrune matre troa amamane la mekune ka tru. Tha nyipi ewekë kö troa e gufane la itre trenge ithahnata ne tro fë cainöj; ngo loi pe, troa thele la mekune ka sisitria matre atreine epuni troa ithahnatan eje, nge kuca ju matre troa ketr la hni ne lai ka dreng.
4 Goeëne hnyawane ju la itus hnei epuni hna mekune troa tro fë, nge iëne ju la itre taane mekune ka tru. Iëne ju la ketre ewekë hnei epuni hna mekune ka troa ketr la itre atr ne la teritoare i epun. Thele jë la itre mekune ka ijije troa ketr la isa pengöne atr tro epuni a ithahnata kow—maine trahmany, maine föe, maine ketre qatr, maine ketre thöth.
5 Hapeu, hnei epuni kö hna tupathe troa amacane la itre aqane tro fë cainöj? Ce ithahnatane jë memine la itre atrene la fami, maine itre xaa ka cainöje pena la itre aqane tro fë cainöje ka loi matre hetre thangane ka loi qa ngön, nge thupene lai amacane jë itre ej, nge loi e troa qaja catrëne matre tro la itre ka drenge a hane xölehuje me hneheene hnyawa itre ej. Tupathe jë ngöne la kola cainöje trootro, troa amejëne la aja ne la itre atr jëne la itre ewekë ka traqa enehila, me jëne la itre mekune ka ajolëne la maca ka loi. Tro la aqane amacane celë a hamë së la atreine troa ithahnata, me troa maca trootro ngöne la aqane troa cainöj, matre troa acatrene la mejiune së.
6 Nyipici, nyipi ewekë catre la troa hnëkëne hnyawa maine amacane la aqane tro fë cainöje i epun, ngo sisitria catre e tro fe epuni a isa wange hnyawa ka hape, ‘Ka loi kö la ihetrenge hnenge hna mekune troa amë la eni a troa cainöje trootro? Hetrenyi asë kö theng la itre ewekë hnenge hna ajane hnine la watrengenge memine la itusi hnenge hna mekune troa amamane trongën? Hapeu tha ka zezenyi kö itre ej? Hetrenyi kö thenge la itus Comment raisonner, me itre tarak, me itre pepa ne xomi not, me peen?’ Tro lai a öhnyi thangane ka loi ngöne la hna cainöje trootro, e maine hna canga hnëkëne la nöjei ewekë celë.
7 Thupene la hne së hna ketre isa catre hnëkë hnyawa, ke, loi e tro së a sipone jëne la thithi la uati hmitrötre i Iehova matre troa xatua së troa öhnyi manathith. (1 Ioane 5:14, 15) Maine tro së a wangatrune me nyipiine la aqane tro së a hnëkë, ke, tro hë së a hetrenyi la ketre madrine ka tru ngöne la huliwa së, nge easë pala hi a ‘kuca asë la qa së.’—2 Tim. 4:5.