Kovasio Ne Distrik 1997 “Lapaune Jë Kowe La Wesiula i Akötresie”
1 Hnei Paulo aposetolo hna amekunë Timoteo ka hape, “Qa thene la Ua i Akötesie la hna cinyihan’asë.” (2 Tim. 3:16) Pine laka, qa thei Akötresieti la wesi ula, haawe, nyipi ewekë catre tro së a lapaune kowe ej. Ame la taan la kovasio ne distrik ne la macatre celë, ke, hna hape, “Lapaune jë kowe la Wesi ula i Akötresie.” Ngacama nyimu macatre ne easë hë ngöne la nyipici, maine pena thaa ka hekö petre kö së ngöne la organizasio i Iehova, eje hi laka, tro asë hi së a kapa elanyi la itre mekune nyine troa acatrene la lapaune së kowe la Tusi Hmitrötr. Loi e tro asë hi së a hnëkë matre troa sine asë la porogarame ne Kovasio. Drei kö la eloine elanyi e hna hane sine fe la icasikeu hnene la itre ka xötrei kapa la nyipici, ene lo itre atr hne së hna etidi kow, ngöne laka, tro ha hane akökötrene hnyawa la lapaune i angatr!
2 Köni Drai Ne Kovasio: Ame ngöne la macatre celë, hna hnëkëne la köni drai ne Kovasio ne Distrik thatraqai së. Ame e Numea, ke, lue Kovasio qene Faras, nge troa kuca la ketre e 12 koi 14 Semitrepa nge ketre e 19 koi 21 semitrepa 1997; troa hnen la lue icasikeu cili ngöne la Uma Ne Asabele ne Normandie. Maine jë ase jë hë epuni hane nyiqane hnëkë matre atreine troa hane sine lai köni drai ne Kovasio. Hapeu, hane kö epuni sipo drai ne mano koi maseta? Maine hetre nekö i epuni ka ini, nge kola troa Kovasio ngöne lai drai ne ini, hane kö epuni thuemacane la itre ka ini angatre laka, thaa tro pë hë la itre nekö i epuni a hane ini e drai ka tru, ke, angatre a troa hane kapa la itre xaa ini ka tru jëne la hmi i angatr?—Deut. 31:12.
3 Kola amamane ngöne la La Tour de Garde ne 15 Febuare 1997, la itre Kovasio hna kuca ngöne la Pasifik Sud. Tune mina fe e Vanuatu, maine thaa hna saze kö la itre ijine mano, haawe, hna amekötine troa kovasio ngöne la Uma Ne Baselaia ne Lugavil e Saato, e 29-31 Ogas 1997. Ame pë hë koi itre xaa nöj, ke qanyine kö la filiale ka thupëne la itre götrane cili a hamë ithuemacanyi göi Kovasio ne Distrik.
4 Ame ngöne la nöjei drai troa nyiqaane la porogarame e 9:30 hmakany. Troa fe la itre qëhnelö e 8:00 hmakany. Ame hmekuje la itre ka troa lö qëmekene la hawa cili, ke, ene lo itre trene hnëqa, ngo thaa tro pe angatre a canga ami göhnë nge thaa ase pala kö nue atr troa lö hnine la uma.—Fil. 2:4.
5 Loi e Troa Drenge Hnyawa La Porogaram: Hna amekunëne hnei Paulo aposetolo la itre keresiano ne la hneijine i Iesu, ka hape, loi e tro angatre a mekune hnyawa kowe la wesi ula hna perofetan, kösë ketre lamepa kola thinaane la götrane gaa mit. (2 Pet. 1:19) Ceitune hi lai me easë, laka, easë a mele hnine la fene celë gaa jidr, ke eje ngöne la ihnatrapaime i Satana. Ngo easë a olene pe la hna thepe së qa hnine la melöhleme ne ua. (Kol. 1:13; 1 Pet. 2:9; 1 Ioane 5:19) Maine easë a ajane troa mele pala hi la laame së, haawe, nyipi ewekë tro së a acatrene la lapaune së, hnene la itre mekune hna hneatrepene qangöne la wesi ula i Iehova. Celë hi matre, troa ketre ixatua ka tru koi së la Kovasio ne Distrik.
6 Maine nyipici laka, kola sipo së troa drenge hnyawa la porogaram, ngo tro hë së a kepe thangane ka loi e hne së hna kuca tune lai. Loi e tro së a sine la Kovasio nge egöcatre hnyawa së, haawe, tro hë së a hlë ngöne la itre ijine icasikeu. Tupathe jë troa canga traqa pala hi ngöne la hnë Kovasio, me canga lapane la göhnë i epuni qëmekene troa nyiqaane la porogaram. Ketre, loi e troa hane ce thinge la nyima ne nyiqaan, me ce thithi memine la itre atrene la icasikeu, ngöne la kola nyiqaane la porogarame e nöjei drai. Loi e troa amamai tulu hnene la itre ka tru, nge ame koi itre keme me thin, loi e tro angatre a inine la itre nekö i angatr.—Efe. 6:4.
7 Maine tro së a canga goeëne la itre taan ne cainöje qëmekene la tro nyiqaane la porogaram, haawe, atreine hi troa canga hneheene la itre mekune hna troa ithahnatane ngöne la ijine icasikeu. Ketre, aqane tro fe së lai a nyigöhnene ekuhu hni së la topike hna troa cile fë. Ma loi e tro fe së a xome hnyawa la itre mekune ka troa xatua së troa qejepengöne koi itre xaa atr la kepine matre, easë a lapaune koi Akötresie, me kowe la enyipicine la hna thingehnaeane hnei Nyidrë, laka, tro ha amanathithine la itre atr ka thele Nyidrë cememmine la hni ka menyik. (Heb. 11:1, 6) Hna upi së fe troa xomi not matre nyine xatua së troa amekune së hmaca e thupen, la itre mekune ka tru ngöne la porogaram. Ngo thaa nyipi ewekë kö troa tru menu pala ha la itre not hna xom, wanga thaa drenge pi pena la itre mekune ka tru hnene laka, nyimu mekune hna cinyanyin.
8 Ame ngöne lo macatre hnapan, nyimutre la itre atr, itre ka tru me itre thöth, ka troagö ngöne la itre kuloar, me tro kano e tröne la hna icasikeu, me itrokeu troa porotrik, ngo thaa hane pe drenge la itre ixatua hna hamëne nyine loi koi së hnene la “hlue ka nyipici me ka inamacan.” Hnei Iesu hna thingehnaeane laka, tro nyidrë a hamëne koi së la xeni ne la ua, ngöne la ijine ka ijij. (Mat. 24:45-47) Ketre, nyipi ewekë tro së a hane sine la icasikeu matre tro sa hane kepe thangane ka loi qa ngöne la xeni cili, ngo thaa tro kö a amamane laka pëkö ole së. (2 Kor. 6:1) Kola mama laka, ame hë la itre nekönatre a thatreine lapa hnyawa, angatre a sipone troa tro sai angatre kowe la uma ne saze medreng, ngo kolo hi matre nyijë i angatre troa cile agö, me tro kano. Celë hi matre nyipi ewekë troa ini angatre ngöne la hnalapa, matre thaa tro kö a lapaa majemine troa tro menu koi uma ne mano. Kola öhne fe laka, nyimutre la itre nekönatre ka nango tru ka ce lapa ngöne la itre götrane gaa co, matre angatre a porotrik, me ihnyima, me ihamënekeune la itre mekune ngöne pepa i angatr. Pine laka, kola qëmeke enehila hnene la itre nekö së thöthi kowe la itre itupathi ne la fen, nyipi ewekë catre fe koi angatre troa drenge hnyawa la itre ixatua hna hamën, ngo thaa tro kö a kuci ketre ewekë pe kö ngöne la ijine kola icasikeu. Loi e troa xelene la itre aja ne la thöth, ka thaa ihmeku kö memine la itre trepene meköti ne la Tusi Hmitrötr. (Wange ju la 2 Timoteo 2:22.) Kola atrunyi Iehova me amadri Nyidrë, la nöjei atr asë, ka tru me ka co e kola drenge hnyawa la porogarame ne la Kovasio.
9 Maine kola hajine la ketre atr ka hane sine la kovasio ngöne la itre mekune celë, haawe, loi e troa kapa lai kösë ewekë hna amekötine hnei Iehova. (Gal. 6:1) Loi e tro asë hi së a mekune ka hape, ame la kepine la easë a thele troa sine la Kovasio, ke hnene laka, easë a ajane troa ‘deng me inin.’ (Deut. 31:12) Ketre, “Tro la ate ka inamacan’a denge me nyixane la inamacane i angeic.” (Ite Edo. 1:5) Qëmekene la troa tro kowe la hna Kovasio, ce ithahnatane jë hnene la fami la enyipiewekëne la troa ce lapa e hnine la uma, thaa tro kö a saze göhnë ngöne la ijine kola icasikeu, nge loi e troa drenge hnyawa la hna qaja, matre troa kepe thangane ka loi qa ngöne la porogaram.
10 Aqane Thaipe Hna Kapa Hnei Iehova: Hna celohmëne la nöje i Iehova nyine waduo kowe la fene hnengödrai. (1 Kor. 4:9) Hna canga wangatrehmekunyi së pala hi hnene la eloine la aqane heetre së, me aqane ele ihe së. Hnene laka, nyimutre la itre ka trongëne la itre trepene meköti ngöne 1 Timoteo 2:9, 10 me 1 Peteru 3:3, 4, haawe, hetre thangane catre kowe la mele i angatr, ngöne laka, saze hë angatr, thaa ceitune hmaca kö memine lo kola xötrei traqa kowe la ekalesia. Isapengöne catre memine la aqane heetre me aqane ele ihe ne la itre atr ne fen, laka, kolo pala hi a ngazo catr. Loi e tro pala hi së a hmek, wanga hane pi fe së tui angatr—maine ngöne la troa heetre qene hmo, maine troa pi mama fë la ketre aqane troa xötre ihe, maine troa heetre qene hmo. Loi e tro la aqane heetre së me aqane ele ihe së, a xatuane la itre atr ka xötrei hane sine la Kovasio, troa wangatrehmekune la aqane thupëne hnene la itre keresiano la aqane thaipine angatre la ngönetrei i angatr.
11 Maine nyipici laka, ka hlemu loi lo itre Kovasio ne lo macatre hnapane kowe la ka alanyim, ngo ame pe, ketre jole ka tru pala kö kowe la itre xaa trejine trahmanyi me föe, la troa thupëne la aqane heetre me aqane ele ihe i angatr, matre thaa tro kö a tune la itre atr ne fen; kola mama hnyawa lai, ngöne lo itre heji thupene la hna asabele. Loi e tro së a pane goeëne la hna heetre së me aqane iseji së, ngöne la easë a hnëkë troa tro kowe la hna kovasio. Qa i itre keme me thine troa goeëne la hna heetre ne la itre nekönatre me itre thöth. Loi e xecie hnyawa koi së laka, thaa tro kö la itre aqane ujë me aqane mele ne la itre atr ne fen, a adrone la thiina ne la keresiano.
12 Loi e Thiina Ka Loi Pala Hi: Ame la troa thiina ka loi, ke celë hi ketre hatrene la itre nyipi keresiano. (1 Pet. 2:12) Jëne la aqane ujë së ngöne la hna Kovasio, me ngöne la traon, maine ngöne la hnalapa ne la ketre atr, maine ngöne pena la nöjei jë së, ijije fe troa amamai thiina ka loi me xatuane la itre xaa atr troa hane öhne la aqane saze la itre xane hnene la hna lapaune koi Akötresie memine la Wesi ula i Nyidrë. Qa ngöne lai, ma tro fe hë a hane upe la itre xane troa thele troa atre Iehova. (Wange ju 1 Peteru 3:1, 2.) Ketre manathithi ka tru the së, la troa atrunyi Akötresie hnene la aqane ujë së. Hna qaja la pengöne la itre trejine hnene la ka cilëne la hotel e Alabama, ka hape, celë petre hi “ketre gurupe hnei angatre hna kapa, ka lolo nge ka thiina ka loi.” Öni angatre fe ka hape: “Ketre madrine ka tru elanyi koi huni e tro epuni a bëeke hmaca.” Hna cinyanyine hnene la biero ne kepe itre turis me hnëkë Kovasio, ngöne la ketre götrane e Eta zini, ka hape: “Hna treqene hnyawa pala hi hnene la nöje ngöne la nöjei macatre, la icasikeu ne la Watchtower Society. Nyipi madrine huni e troa cememine la itre atre i epun; lolo la thiina i angatr, nge hetre metrötre thei angatr. Kola wangatrehmekune fe lai hnene la itre xaa atrene la nöj, nge angatre a ajane troa könëne hmaca ngöne la nöjei macatre la gurupe cili.” Tuneka la madrine i epuni la kola e la itre rapore cili? Nyipi ewekë tro pala hi së a hmek, matre ijije troa hlemu loi pala hi la nöjei Iehova.
13 Nyimutre la itre ixatua nyine amekunë së pala hi troa thupëne la itre nekö së, ene laka, thaa tro kö a nue angatre troa nyenyape kanothe la Uma Ne Asabele nge easë hi a goeën, wanga maine tro pena a ajolëne la itre xaa atr troa drenge la porogarame ne Kovasio. Thaa ngöne hmekuje kö la iuma ne Asabele, ngo e tröne fe la hnë Kovasio. Kola kapa ngöne la nöjei macatre hnei Sasaiatri la itre rapor, kola qaja laka, hetrenyi pala hi la itre nekö së hna thaa thupëne hnyawa ngöne la kola fenesi la porogaram. Hna qaja hnene la ketre ka cilë hotele ka hape, hna alua ahlë nyidrë e hnenyipajidr, thupene 11:00 e jidr, hnene la ihanekö së, angatre a fenafena trongëne la itre qëhnelö matre troa thele la itre xaa trejin. Maine nyipici laka, hna kuca la itre Kovasio matre tro fe së a hane iöhnyi me ce troagö memine la itre trejine me easë, ngo loi e tro pala hi la itre keme me thine a mekune hnyawa la hnëqa i angatr, ene la tro thupëne la itre nekö i angatre ngöne la nöjei hawa. Celë hi hnëqa lai hna amekötine hnei Iehova kowe la nöjei keme me thine asë. (Ite Edo. 1:8; Efe. 6:4) Atreine hi tro la itre aqane ujë ne la itre nekönatre thaa hna thupëne kö me heheen, a nyiengazone la itre atr ka catre troa thele troa eëne la thiina ka loi matre hlemu loi angatr.—Ite Edo. 29:15.
14 Nyine Troa Hnëkëne Göi Uma Me Gojeny: Maine epuni a troa lapa thene la itre trejine föe me trahmanyi e Numea, haawe, loi e tro epuni a olene la aqane kepe epuni hnei angatr. Thaa loi kö e tro së a porofite la itre trejine me easë. Qa ngöne lai, loi e tro së a metrötrëne la aqane ketre mele i angatre ngöne la hnalapa, me hane ixatua xomi xen. Celë hi itre aqane ole lai ka lolo. Maine hetre aqane ujë ka ngazo hna öhne thene la itre xaa trejine me easë, haawe, ka lolo catre e troa amekunë angatre hnyawa hmaca la nyine troa kuca.
15 Kola öhne hnene la itre fami ka lapa ngöne la itre götrane gaa nanyi qa ngöne la hnë Kovasio, laka, nyipi ewekë catre troa canga ami manie ngöne la itre treu qëmekene Asabele. Nyimutre la itre trejine ka traqa qa ngöne la itre hnapet, maine qa Walisi me Futuna, angatre a ti he maine ti avio pena. Ame itre xane ke, angatre a traqa qa mëëk hune kar, maine memine la itre sipu loto i angatr. Caasi hi, loi e troa canga xecie hnyawa koi së laka, ka tro fe së a hane sine la Kovasio. Ketre nyipi ewekë mina fe troa metrötrëne la hna isapui memine la ka troa ikep, matre, maine hetre hnepe jol, maine kolo pena a troa saze la hnë isa pui, haawe, loi e tro epuni a canga telefone koi angatr, nge maine pëkö telefone i angatr, hëne jë pena la serevisi ne hamë hnalapa i sasaiatri.
16 Itre Ewekë Nyine Nyithupene thatraqai Kovasio: Nyimutre catre la itre depense hne së hna troa kuca matre troa hane sine la Kovasio. Ngo hetrenyi kö la ketre, nyine tro së a wangatrune hnyawa. Tru catre la thupene la itre ewekë hna xome göi itre ejolene la Kovasio. Hetrenyi mina fe la itre xaa “depense” ju kö nyine troa kuca. Qa ngöne lai, tro ha atraqatre la madrine me ole i sasaiatri troa kapa la itre ahnahna hne së hna troa hamëne hnene la hni ka pexej.—Ite Huliwa 20:35; 2 Kor. 9:7, 11, 13.
17 Göhnë: Kola amexeje hmaca la itre hna amekötine göi itre icea laka, TRO HMEKUJE HI A AMI GÖHNENE LA ITRE ATR NE LA FAMI I EPUNI ME ITRE XAA ATR KA CE TRO ME EPUNI HUNE LA LOTO I EPUN. Atraqatre la madrine ngöne la kola öhne laka, alanyimu catre pala hi ngöne la itre macatre ka ase hë, lo itre atr ka xötrethenge la itre hna amekötine celë, celë hi matre tro loi hnyawa la itre ijine Kovasio. Ngöne la itre xaa hnë asabele, thaa jole menu kö e troa lapane la itre xaa icea. Celë hi matre, loi e metrötre së me nue la itre göhnë cili kowe la itre atr hna amekötine kow.
18 Kamera Me Itre Ikaho Nyine Arezistere: Ijije hi troa hane traqa fë la itre Kamera me itre ikaho ngöne la hna Kovasio. Ngo thaa tro pe a ajolëne la itre xaa atrene la icasikeu, troa drenge hnyawa la porogarame ne Asabele, maine hnene la troa xomi iatr trootro ngöne la itre ijine icasikeu. Thaa tro kö a saane la nöjei aparei asë, ngöne la itre pirize ne tirisite me göi kaho, ketre tune mina fe la itre koona me itre kuloare hnë tro, maine qëmekene la itre atr, troa thupëne matre thaa tro kö a ithung.
19 Pane Ixatua: Hna hnëkëne la göhnë cili ngöne la hna Kovasio, thatraqane hmekuje hi la itre “urgences,” ngo thaa kowe fe kö lo itre sipu meci ka eje the së kö. Celë hi matre, loi e tro epuni a isa canga wange la itre drosinöe thatraqane la meci epun, me fami i epun, qëmekene troa tro kowe la Kovasio. Kola sipone matre troa isa hnëkë wene kas, me baade thatraqai eatr, me itre xane ju kö, tune lo itre xaa drösinöe ka pëkö ngöne la hna Kovasio. Nyimutre la itre atr hne së hna atre ka trene mec, maine kolo itre ka ön, maine “hypoglycémie”, me itre ka meci fë wenethëhmi, haawe, loi e tro angatre a isa hmekëne pala hi la itre drösinöe thatraqane la meci angatr. Loi e troa hetrenyi pala hi thei angatre la ka ijij, nge nyipi ewekë fe tro la ketre atrene la fami, maine ekalesia pena ka atrepengöne la meci angatr, a lapa ezi angatre ngöne la nöjei ijine asabele matre troa hamë ixatua e traqa ju la itre xaa hnepe jol. Hna traqa la itre xaa jole kowe la itre trene meci ngöne la itre ijine asabele, pine laka, hna nue angatre caas, matre pëkö ka canga ixatua ngöne la kola traqa la mec. Hnene pë hë la biero ka elemekene la Kovasio hna hë “ambulance” matre troa nyiape sai angatre a tro pital. Maine pëkö atrene la fami ngöne la nyipici, haawe, loi e tro la itre trene hnepe meci ka hetre ejolen, a canga thuemacane la itre qatre thupe la pengöi angatr, matre tro pëhë a thele la aqane troa hamë ixatua. Pëkö hnahage hna hnëkëne thatraqane la itre ka “ithëhehe.”
20 Xeni Ngöne Ijine Kovasio: Hetre thangane catre la kola pë kuci xeni ngöne la itre ijine Asabele, pine laka, kolo ha hane sine asë la nöjei ijine Kovasio, me xome lo xeni ka sisitria, ene la xeni ne la ua. Qaane lo kola amekötine lai hnei Sasaiatri, alanyimu catre la itre trejine ka madrine me olene la mekune cili. Loi e tro asë hi së a xome la ka ijije nge xeni ka hmaloi koi midi, thenge lo itre ixatua hna hamëne ngöne lo sine trongene Huliwa ne Baselaia ne treu juun 1995, paragarafe 26. Thaa tro kö a xomi trengene timi ver, me ka haitre kowe la hna Kovasio. Loi e troa ijije troa amë fene la icea i epun, la nekö i galasier. Hna öhne la itre xaa atr e xeni me iji ngöne la ijine kola icasikeu. Thaa loi ko la aqane ujë cili, kola amamane laka, pëkö metrötr.
21 Nyipici laka, tro së a madrine la xeni ne la ua hne së hna kapa, memine la hnepe hawa ka lolo hne së hna troa porotrike memine la itre trejine me esaë, ngöne la ijine kola xeni e hnaipajö. Maine tro së a mekune hnyawa la kepine matre kola amekötine tune lai, haawe tro hë së a ce traqa ngöne la hna Kovasio memine la xeni hna hnëkëne hë, ngo thaa tro kö a tro ngöne la ijine mano troa xomi xen. Qa ngöne lai, tro ha hetre traeme ne troa porotrike memine la itre trejine trahmanyi me föe.
22 Drei la madrine së elanyi e nyiqaane jë la Kovasio ne Distrik, “Lapaune ju kowe la wesi ula i Akötresie”! Loi e troa xecie koi së laka, pëkö ewekë pe hna thëthëhmin, ijije fe hi tro së a hane sine la porogarame ka pexeje ne la Kovasio. Qangöne lai, atreine hi tro së a hane madrine me kapa asë la xeni ne la ua hnei Iehova hna hnëkën koi së jëne la organizasio i Nyidrë. Maine hne së hna kuca tune lai, haawe, tro hë së a “hnëkë thatraqane la nöjei huliwa ka loi asëjëihë” ngöne la itre drai ka troa xulu.—2 Tim. 3:17.
[Hna eköhagen götran 6]
Nyine Amekunë Së Göi Kovasio Ne Distrik
Bapataiso: Tro la itretre thele bapataiso a lapa ngöne la itre göhnë hna hnëkëne thatraqai angatr, qëmekene la kola nyiqaane la icasikeu e hmakanyi ne mecixen. Loi e tro angatre a xome la itre iheetre ka ijije kowe la drai cili, me hnëkë itrawel. Hna öhne ngöne la itre macatre ka ase hë laka, hetrenyi la itre ka traqa fë hnaheetre thaa hmekune kö la Bapataiso, matre kola apuingazone la huliwa ka hmitrötre cili. Loi e tro la itre qatre thupe a ce wange hmaca memine la itre ka ajane troa bapataiso, lo itre hnyinge ngöne la itus, Notre ministère matre troa xecie hnyawa laka, trotrohnine fe angatre la itre mekune cili. Thupene la hna cainöje ne bapataiso, me thith, ke, tro la perezida ne la sisio a könë së troa ce nyima. Nge ngöne la xötre hna tixenuën, ke, tro la itre ka thupëne la icasikeu a trofë la itre ka thele bapataiso kowe la hnë bapataiso angatr. Ame la bapataiso, celë hi hatrene la mele hne së hna isa hamën, isa easë caasi kö me Iehova, celë hi matre tha meköti kö troa itrohmaeë me ie i wanakoimë hnei itre ka xomi bapataiso e kuhu hnine la tim.
Baj: Kola sipone matre troa isa athipe ngöne iheetre la itre baji hna hnëkëne koi macatre 1997, ngöne la ijine kovasio, me ngöne la easë a tro maine kola bëek. Celë hi ka troa nyijë së e itre xaa ijine troa qaja la maca ka loi e cahu gojeny. Ijije troa xome la itre karte cili me itre nyine athip, ngöne la ekalesia i epun. Loi e troa canga sipo nyi epuni me fami i epun, qëmekene la wiike ne Kovasio. The thëthëhmine kö troa tro xome fe lo karte hna hape, “Instructions médicales.”
Hnalapa: Eahuni a sipone matre tro asë hi la nöjei atr a kapa la itre hna amekötine thatraqane la Kovasio, göi troa sipo hnalapa. Loi e troa wange la atrekë hnëqane la troa hamë hnalapa, maine ase hë epuni öhnyi hnalapa ngo thaa tro kö a canga fedreuthane pena ha la ketre, wanga troa traqa elanyi la itre jol. MAINE HETRE HNEPE JOLE KA EJE THEI EPUN, canga wange ju la serevisi ne hamë hnalapa ngöne la ijine Kovasio, matre tro angatre a xatua epuni troa thele nyin la jole i epun. Tro la itre seketere ne la itre ekalesia a akötrehnine troa canga iupifë lo itre pepa ne sipo hnalapa, me thue hnalapa, ngöne lai aderesi ne lai kovasio e Numea. E maine epuni a mekune troa nue la hnalapa, loi e tro epuni a canga thuemacane lai atr ka ikep, maine hotel me biero ne hamë uma, matre troa nue pena la hnalapa koi itre xan.
Itre Nyine Uku Medreng, Me Itre Icea Nyine Sa: Hna wathebone troa traqafë la itre nyine uku medrenge ngöne la itre hnë icasikeu ka tru. Hnene la angetrekë hnëqane la sekirite hna wathebone troa amë itre eje nyipine la itre kuloar, itre cane uma trootro, maine akawane la hnënge icea. Eje hi laka, e troa ipepetrenyi la ka alanyim, tro hë lai a eatre hnene la itre nyine uku medreng, thaa koi itre medrenge casi kö, ngo kowe fe la itre atr ka troa kei hnen. Haawe, kola sipo epuni matre thaa tro kö a traqafë itre eje ngöne la hnë kovasio. Ngo, thaa hna wathebone kö lo nekö i cea i nekönatr, pine laka ijije tro la itre keme me thine a ati nyëne hune icea ezi angatr. Kolo fe a sipo epuni laka, thaa tro kö a traqafë lo itre icea nyine sa. Troa eatre hnene ej, nge troa ipepetrenyi la itre atr. Kola olene la hnei epuni hna ixatuanekeun.
Serevis Voloter: Hetre hnepe ijine i epuni kö troa ixatua ngöne la ketre serevis, e ijine kovasio? E hne së hna huliwa kowe la itre trejin, ngacama itre hnepe hawa ka co hi la hne së hna atreine hamën, ke, ijije troa hetre madrine së qa ngön. E maine epuni a ajane troa ixatua, ke, kola sipo epuni troa thuemacane la serevis voloter, ngöne hna kovasio. Ijije tro fe la itre nekönatre ka tha 16 petrekö lao macatre a hane ixatua, ngo tro pe nyudreni a ce huliwa me ketre atrene kö la fami, maine keme me thin, maine ketre ka nyipi atr hë. Ame ngöne la macatre celë, tro la itre atre thupe ne la itre serevis, a xome asë la nöjei ka ajane troa voloter. Thaa tro hmaca kö a nyialiene la pepa ne sipone troa voloter tune lo hna majemin, ngo tro pë hë la atre thupe a isa wai epun, troa hane ce huliwa ngöne la gurupe i nyidrë. Thupene lai, tro pë hë la atre thupe a isa iupi fë mekötine la itre lisi ne voloter kowe la serevisi voloter ne la itre ekalesia.
Itre Nyine Troa Hmekën: Maine tro së a hmekëne la itre jole qëmekene tro itre eje a traqa, ke, easë hi lai a neëne itre ej. Ame itre xaa ijin, hna atrekënö la itre ewekë ne lo itre atr ka thaa majemine kö mele ngöne la itre götrane hna jilapaane hnei itre ka wanakoime menu. Celë hi matre kola thuemacanyi nyipunie göi itre loto; tro pala hi a kiine la itre qëhnelö ne loto, nge thaa tro pi kö a amë amamane la ketre ewekë hna piine hnei atr. Ame ngöne la nöjei icasikeu ka tru, ke, kolo hi lo ijine hnene lo itre ka iwanakoime menu hna iëne troa kuca la itre mekune i angatr. Ketre, thaa loi kö troa amë amamane la itre mo ka tru thupene hune la itre icea. Pine laka, ame la itre ka lapa ezi së, ke, thaa itre hne së kö hna atre, ame itre xan, thaa itre keresiano kö angatr. Pine nemene matre troa itupath?