Thaa Ka Gufa Kö La Paatre Së Thene La Itre Xan!
1 Ame ngöne la itre xaa hnepe ijin, ke, easë a mekune troa thaa hane sine la caasi maine nyimu icasikeu ne la ekalesia, nge easë a mekune laka, ‘thaa nyipi ewekë kö la paatre së kowe la itre xan; ketre, pëkö ka troa öhne laka, paatre fe kö ni troa hane sine la icasikeu.’ Eje hi laka, thaa aqane mekune ka loi kö lai! Ceitune hi lai memine la nöjei götrane ne la ngönetrei së, kola isa kuca hnyawa la itre hnëqa i angatr, thatraqane la mele ne la ekalesia. (1 Kor. 12:12) Maine tro së a paatre ngöne la ketre icasikeu ne la wiik, haawe, atreine hi troa hetre hnepe ethane pe kowe la mele ngöne la ua ne la itre atr ka sine lai icasikeu. Maine paatre kö epuni troa hane icasikeu, haawe, loi e tro epuni a atre hnyawa laka—thaa ka gufa kö la paatre së thene la itre xan!
2 Hnëqa Ka Tru Nyine Tro Epuni a Kuca: Hna thele pala hi hnei Paulo troa caasi memine la itre trejine me angeic. Kola qaja la kepine lai ngöne Roma 1:11, 12, hna hape: “mate tro ni a hamë nyipunie kete ihnimi ne [ua NW] . . . celë hi mate troa ce akeukawanyi ni me nyipunie, hnene la ce lapaune shë.” Ketre, troa hetre thangane catre fe koi itre xane la kola öhnyi së ngöne la hna icasikeu, memine fe la itre mekune hne së hna troa hane hamën; ixatua lai ka troa akökötrene la lapaune ne la ketre, matre hane fe angeice catre mele nyipici pala hi koi Iehova.—1 Thes. 5:11.
3 Hapeu, atraqatre kö la ajane i epuni troa iöhnyi memine la itre xaa atrene la ekalesia ngöne la itre ijine icasikeu? Epuni a hnangenyëne hnyawa la angatre a hane fe la itre mekune i angatr, me madrine la aqane amamane angatre la lapaune i angatr. Celë hi itre ahnahna lai ngöne la ua ka troa akökötrene la lapaune i epun. Canga drenge hi epuni laka, paatre kö la itre xaa trejine me epuni ngöne la ijine icasikeu. Ketre tune mina fe, maine thaa hane kö epuni sine la ketre icasikeu, haawe, canga drenge hi angatre laka, paatre kö epun.
4 Enyipiewekëne La Itre Icasikeu: Hna qaja hnene la zonale La Tour de Garde ngöne la enyipiewekëne la itre icasikeu, laka, jëne iamele koi së ngöne la ua; hna qaja ka hape: “Ngöne la fene celë ka tiqa hnei isi, nge hna haöthe hnene la nöjei ngazo, caasi hi la nyipi hnapo së ngöne la ua, ene la ekalesia i keresiano . . . , nge hetre tingetinge me ihnimi ngöne la hnë zae cili. Qa ngöne lai, catre pi troa hane sine pala hi la itre icasikeu ne la ekalesia.” (w93 15/8 11) Ame ngöne la nöjei drai, easë a qëmeke kowe la itre jole ka ananazijëne la mele së ngöne la götrane la ua. Maine thaa hmeke kö së, atreine hi troa xome la mele së hnene la itre ewekë hne së hna kukehnin, ene pe thaa öhne pi hi së la itre nyipi aja ngöne la ua ka sisitria catr. Thatreine kö troa qaja ka hape, thaa nyipi ewekë pe kö la ketre atr hnine la ekalesia; sisitria asë hi la nöjei atrene la ekalesia, pine laka, kola troa ithuecatre hnei ketre koi ketre, matre caasi me catre pala hi së ngöne la huliwa i Akötresie.—Heb. 10:24, 25.
5 Nyipi ewekë catre tro së a hane sine la itre icasikeu. Maine ngöne la itre xaa ijin, thaa ijiji pë hë tro së a hane icasikeu, pine laka easë a wezipo, maine pena hna traqa la ketre jole koi së, ngo loi tro pala hi së a hane caasi memine la itre atrene la ekalesia, matre tro asë hi së a ce atrunyi Iehova!—Sal. 26:12.