“Cainöjëne Jë La Wesi Ula . . . Nyimenyime Jë”
1 Maine epuni a kapa la ketre ewekë hna cinyihane ngön ka hape “KA NYIMENYIM,” tune kaa la aqane troa trotrohnine lai? Ame la hnaewekë hna hape “ka nyimenyim,” ke, kola hape ketre ewekë lai nyine troa “canga wangatrun.” Celë hi matre hnei Paulo aposetolo hna ithuecatre koi itre Keresiano troa “cainöjëne la wesi ula . . . [“nyimenyime jë,” MN].” (2 Tim. 4:2) Hapeu, epuni kö a hane wangatrune la huliwa cili?
2 Maine jë hna qaja koi Paulo ka hape meije la itre xaa trejine ngöne la huliwa i keresiano, ke, “witi angatr ngöne la huliwa.” (Rom. 12:11) Co hi la thangane ka loi hna kapa qa ngöne la itre huliwa i angatr, tune la madrine ka xulu qa ngöne la hna xatuane la itre xan.
3 Mekuna i Iesu Göi Huliwa Ne Cainöj: Drei la madrine i Iesu troa xome la huliwa ne cainöj! Öni nyidrë: “Ange la tro ni a kuca la ajane la ate upi ni, me umuthe la huliwa i nyidë.” Hna xatuane la itretre drenge hnene la tulu i Iesu, nge hnei nyidrë hna thuecatre koi angatre ka hape ‘öhnejë la hna eënyi, elehmedrë hë e troa menu.’ (Ioane 4:34, 35) Kola mama hnyawa la enyipi ewekëne la huliwa ne cainöje ngöne la nyidrëti a qaja koi angetre drei nyidrë troa “xëwe kowe la Joxu ne la meledrai, mate upepi la angete troa menue kowe la meledrai i anganyidë.” (Mat. 9:38) Atre hi Iesu laka, hnëqa ka tru la troa cainöj, nge xecie koi nyidrë laka, pëkö xaa ewekë ka troa sewe nyidrë troa eatrëne lai.
4 Tune Kaa Fe Së? Sisitria catre kö enehila la huliwa ne cainöje hune lo itre drai ka ase hë. Ngöne la itre nöje ka nyimutre, macaje hë la itre hlapa troa menue kowe la meledrai. Ngöne fe la itre nöj, kola mama ka hape hna cainöje hnyawa hë ngön, ke, itre thauzane lao ka xome la bapataiso e nöjei macatre. Pine laka easenyi catre hë la pune la fene celë, haawe, “catejë troa huliwa i Joxu.” (1 Kor. 15:58) Nyipi ewekë catre hë enehila troa isa catre tro fë la maca ne Baselaia kowe la itre xan.
5 Catre pi troa cainöjëne la maca ka loi koi itre xan, ngöne itre hnalapa trootro, me ngöne la nöjei götrane easë a öhnyi angatr. Maine easë a catre kuca la hne së hna atreine troa cainöj, ke, easë lai a amamane laka, easë a amë panëne la Baselaia ngöne la mele së. (Mat. 6:33) Troa atraqatre la madrine hne së hna kapa, e hne së hna catre tro fë nyimenyimëne pala hi la Wesi Ula i Akötresie.