Aqane Atreine Troa Ce Wai Mekun
1 Ame la “ce wai mekun,” ke, kola hape “troa ithahnata me ketre atr matre troa saze la aqane ujë me aqane mekuna i angeic.” Maine easë a ajane troa hetre thangane ka loi cainöje së, nyipi ewekë troa atreine ce wai mekune ngöne la easë a ithahnata me itre xaa atr. (Ite Huliwa 17:2-4) Ngo tune kaa la aqane troa eatrëne la aja celë?
2 Loi e Troa Pane Mekune La Itre Hne Së Hna Inin: Atreine hi tro së a kepe thangane hnyawa la nyipici, e hne së hna pane hane mekune hnyawa la itre aliene ej. Maine thaa nyipi trotrohnine kö së la itre xaa mekun, ke, loi e troa ami ijine matre troa thel, me mekune hnyawa la itre ithuemacanyi ka qeje pengöne itre ej. Loi e tro fe së a hane xome la itre xötre ne la Tusi Hmitrötre ka acatrene itre ej.
3 Nyipi Ewekë Catre La Aqane Hnëkë Së: Mekune ju la aqane tro së a qeje pengöne la nyipici. Hnëkëne jë la ketre hnyinge ka troa ahlëne la aja ne la itre atr. Xome jë la ketre xötre ne la Tusi Hmitrötr, ka ihmeku memine la hnyinge cili, nge ce ithahnatane jë ngön. Canga nyiqaane hnëkëne jë la aqane troa sa la itre mekune ka troa ajolëne la maca ka loi, me thele la aqane troa ce ithahnatane itre ej. Nyi hatrene ju la itre mekune hnine la itus hna troa tro fë ka ihmeku memine la mekune hna ithahnatan, nge ka sisitria troa xomi ini qa ngön.
4 Xötrethenge Jë La Tulu i Iesu: Hnei Iesu hna amë la ketre tulu ka sisitria catre göi troa ce wai mekune hnyawa jëne la Tusi Hmitrötr. Mekune hnyawa ju së lo aqane hamë ini nyidrë, jëne la ceitune ngöne Luka 10:25-37. Drei la aqane kuca i Iesu: (1) Amamane jë la mekune i Tusi Hmitrötre ngöne la kola sa la hnyinge ne la itre atr. (2) Nue angatre jë troa hane hamë mekun, nge hane ju fe kapa la itre mekune i angatr. (3) Loi e xecie koi së laka, trotrohnine hnyawa angatre la hnying memine la mekune i Tusi Hmitrötr. (4) Hamëne jë la ketre ceitune ka troa ketr la hni ne la itre atr, matre xecie koi së laka, hna trotrohnine hnyawa la enyipi ewekëne la mekune ka sa la hnying.—Wange ju La Tour de Garde ne 1 maac, 1986, götrane 27-8, paragarafe 8-10.
5 Huliwane Jë La Jia Ne Huliwa Hna Hamë Së: Thatraqane la huliwa ne cainöje la itus Comment raisonner à partir des Écritures. Eje a xatua së troa atreine ce wai mekune jëne la itre aqane nyiqaane ithahnata, me aqane troa sa kowe la itre atr, me jëne fe la itre mekune nyine ce wai mekune ngön. Nyipi ewekë tro pala hi së a tro xome la itus Comment raisonner ngöne la hna cainöj, ketre jia ne huliwa lai ka lolo, nge thaa tro kö së a luelue troa huliwane ej. Wange hmaca ju la itre götrane 7-8, me goeëne la aqane troa huliwane ej, matre tru la itre thangane ka loi hne së hna troa kapa qa ngön.
6 Maine tro së a catre troa atreine ce wai mekun, ke, tro së a maca troa cainöj, me inine hnyawa la itre atr. Troa hetre thangane ka loi hne së hna kapa, thaa easë hmekuj, ngo angatre mina fe, itre ka drei së.