Ketre Hnëqa Ka Tru Ka Ijije Kowe La Itre Thöth
1 Ala nyimu la itre keme me thine enehila ka mekune hmaca la hnëqa ka eje thei angatr, ngöne lo angatre a nekönatre me tru ngöne la nyipici—ene la Drai ne tro fë zonale trootro. Hna amekötine la huliwa cili ngöne la nöjei ekalesia lo macatre 1949. Hna catre tro fë caa drai ngöne la wiik hnene la nöjei ka cainöje ekö la zonal, La Tour de Garde me Réveillez-vous ! kola tro fë trongëne maine e cahu gojeny, maine ngöne la itre hnalapa, maine ngöne itre magazë, maine itre xaa aqane ju kö. Hnene la itre thöthi ka cainöje hna thele troa xome la huliwa cili, pine laka, hna aijijë angatre troa hane kuca la huliwa ne cainöje hna xome hnene la itre ka tru hnine la ekalesia. Hapeu, hnei nyipunieti kö hna hane kuca tune lai, ngöne lo epuni a nekönatr?
2 Ce Huliwa Jë Me Itre Nekö i Nyipunie: Ame kowe lo itre nekönatre ka co ka thatreine petre kö troa porotrikë Tusi Hmitrötre ngöne itre hnalapa trootro, ke, ijiji angatre fe troa hane tro fë zonal. Loi e troa inine la ketre aqane nyiqaane ithahnata ka thaa jole kö, nge ka thaa qea kö. Tro hi a qeje pengöne la icetröne la zonal, thaa tro pe a aqean. Ala nyimu la itre atr ka kapa la itre zonale hna hamëne hnene la itre nekönatr, nge ame itre xaa ijin, angatre a qaja aloinyi nyudren, pine la thiina ka menyik, me aqane ujë ka lolo. Maine troa xatuane la itre nekönatr, ijije hi tro nyudreni a kuca hnyawa la huliwa cili, me hane kökötr ngöne la huliwa. Ngöne la kola tru trootro la itre nekönatr, nyipi ewekë troa xatua angatre hnene la itre keme me thin, matre troa maca la aqane troa ithahnata me inine la itre atr.
3 Hnei Manuel hna nyiqaane cainöje ngöne la itre hnalapa trootro, nge köni macatre i angeice petre hi. Hna ini angeice hnene la keme me thine i angeic, troa lapa mekune la ketre aqane nyiqaane ithahnata ka thaa qea kö. Hna ce tro pala hi me nyidro, troa tro fë zonal, me boroshür, me itre tarak. Angeice fe a cainöje e nöjei ijine ka ijij. Ngöne la ketre ijine angatre ngöne la ketre park, hnei angeice hna ketre sipu tro troa tro fë la itre tarake kowe la itre xaa atr. Ngacama co catre petre kö Manuel, ngo hnene la aqane catre me madrine i angeice troa cainöj, hna ithuecatre fe kowe la keme me thin, me kowe la ekalesia asë.—Ite edomë 22:6.
4 Hna amekötine hë hnine la Calendrier des Témoins de Jéhovah 2000, laka, ame ngöne la nöjei mecixen, ke “Drai ne tro fë zonal.” Itre keme me thine fe, eahuni a madrine koi nyipunie, pine laka, epuni a akökötrene la aja i epuni kowe la huliwa cili, me xatuane la itre nekö i nyipunie troa catre cainöj.