Lapaun a Upi Së Troa Kuca La Itre Huliwa Ka Loi
1 Hnene laka, hetrenyi la lapaun thei Noa me Mose me Rahaba, haawe, hnei angatr hna kuca la itre huliwa ka loi. Hnei Noa hna can la aka. Hnei Mose hna nue la itre lolo ka thaa cile huti kö kowe la mel, ngöne lo angeic thei Farao. Hnei Rahaba hna juetrën la itretre alamekën la nöj, nge hnei nyidroti hna drengethenge la itre hnei angatr hna amekötin matre troa jëne mel kowe la lapa i nyidro. (Heb. 11:7, 24-26, 31) Nemen la itre huliwa ka loi hna upi së troa kuca enehila, hnene la lapaune së?
2 Troa Anyipicin: Kola upi së hnene la lapaun troa qaja la Akötresi së ka lolo, memine la itre hnei Nyidrëti hna hnëkën matre tro sa mele madrin epine palua. (2 Kor. 4:13) Ame ngöne la itre xaa ijin, tre, maine jë tro sa luelue troa cainöj. Ngo maine hne së hna ‘ami Iehova pala hi qëmeke së,’ tro ha acatren la lapaune së, nge thaa tro kö a hetrenyi the së la xou. (Sal. 16:8) Ketre, kolo mina fe a upi së hnene la lapaune së troa ce thawa ngöne la itre ijine ka ijij, la maca ka loi memine la itre sinee së, me itre ka lapa ezi së, me itre sine huliwa së, me itre sine ini së, me itre xane ju kö.—Rom. 1:14-16.
3 Troa Ce Icasikeu: Ame la ketre huliwa ka loi, wen ne la lapaune së, tre, ene la troa sine pala hi la itre icasikeu. Hna tune kaa? Kolo hi lai a amaman la mejiune së, ene laka, ce easë me Iesu hna jën la Uati Hmitrötre i Akötresie, ngöne la easë a ce traqa ngöne la itre icasikeu i Keresiano. (Mat. 18:20) Kola mama mina fe la aja së troa “drenge la hna ulatine hnei ua kowe la itre ekalesia.” (Hna ama. 3:6) Easë a wangatrune hnyawa la ini hne së hna kapa, pine laka, easë a atrehmekun hnene la itre lue meke ne lapaune së, laka, ame la atre ini së, tre, Iehova lo Atre Ini Ka Sisitria.—Is. 30:20.
4 Itre Mekun Hne Së Hna Axeciën: Hetrenyi la itre ewekë ka troa eatr elany, hne së hna catre mejiune hnyawa kow, kola upi së hnene itre ej, troa amë panën ngöne la mele së la itre ewekë ngöne la götrane la ua. (Heb. 11:1) Thaa ewekë ka hmaloi kö troa kuca. Hanawang la ketre ceitun, hna thipën hnene la ketre qatre thup troa cilën la ketre götrane qa ka tru hna nyithupene hnyawa, pine laka, kola troa trian la itre icasikeu, me ananyin la itre atren la hnepe lapa, nge thaa ijije hmaca kö troa xom la huliwa ne pionie. Epi tro pala hi së a amë la lapaune së ka pexej kowe la hna qaja hnei Tusi Hmitrötr, ene laka, tro Iehova a hamën la ixatua i Nyidrë kowe la itre ka “pane thel la baselaia me thina ka meköti anganyidrë.”—Mat. 6:33.
5 Thaa ka sihngödre kö kowe la itre xan, la emenen la lapaun me thangane ej ngöne la mele së. Eje hi laka, ka hlemu e cailo fen la lapaune së. (Rom. 1:8) Qa ngöne lai, epi tro asë hi së a amaman hnene la itre huliwa ka loi, laka ka catr la lapaun the së.—Iako. 2:26.