Loi e Wië La Itre Mekune Së Ke Easenyi Hë La Pun
1 Kola anyimua qejepengöne hnene la Wesi Ula i Akötresie la drai i Iehova laka, kola troa traqa “tune la ate kë ’nö”—ene laka, thatre una ju kö së, canga traqa nge nyimenyim. (1 Thes. 5:2; Mat. 24:43; 2 Pet. 3:10; Hna ama. 3:3; 16:15) Öni Iesu: “Qa ngöne lai lapa maca jë nyipunie, te, ngöne la ijine hnei nyipunie hna tha mekune kö, tre, tro ha traqa la Nekö i at.” (Mat. 24:44) Tune kaa la aqane tro sa hmek ngöne la götrane la ua, nge kola easenyi catre pala hi la pun? Hetre thangan ka loi hne së hna kapa qa ngöne la eamo celë, hna hape: “Loi e troa wië la itre mekune i nyipunie.”—1 Pet. 4:7, MN.
2 Ame la troa wië la itre mekun, tre, ene la troa goeën la aqane waiewekë i Iehova. (Efe. 5:17) Kola xatua së troa wangatrune hnyawa la pengö së, ene laka, “ite trenyiwa me itete hunuma trotro” ngöne la fene celë. (1 Pet. 2:11) Kola aijijë së troa atrehmekune la ka nyipi ewekë catr, matre tro sa eköthe hnyawa la itre nyine troa pane kuca, me xome hnyawa la itre mekune ka loi nyine troa axeciën.—Fil. 1:10.
3 Ami Trepene Jë La Itre Aja Ne La Ua: Maine tro sa ami trepen me eatrën la itre aja ngöne la ua, haawe, tro ha wië la itre mekune së. Hapeu, hetrenyi kö la itre aja ngöne la götrane la ua hnei epuni hna catre thele enehila troa eatrën? Hapeu, epuni kö a isin troa e ngöne la nöjei drai la Tusi Hmitrötr, me sin la itre icasikeu asë i Keresiano, me e lo nöjei zonale së ka traqa, La Tour de Garde me Réveillez-vous !, maine akökötrene pena la aqane tro epuni a hane xom la huliwa ne cainöj? Maine tro epuni a eköthe hnyawa la itre aja ka ihmeku memine la hnei epuni hna atreine troa kuca, catre pi troa eatrën itre ej, nge sipo Iehova jë troa amanathithin la trenge catr hnei epuni hna kuca, nge tro kö epuni elanyi a haine la itre thangan ka lolo hna troa kapa.
4 Hna hnyingën hnene la ketre qatre thup kowe la lue trefën ka xötrei faipoipo, maine hetre aja ngöne la götrane la ua hnei nyidroti hna hane thele troa eatrën. E cili hna hane wangatrehmekun hnene la lue trefën laka, maine tro nyidroti a ahmaloeën la mele i nyidro, me hane të la xaa gufa i nyidro ka tru, atreine hi tro nyidroti a hane pionie. Ene pe nyidroti a thele ju troa eatrën lai mekune cili. Hnei nyidroti hna të trongën la itre gufa i nyidro, me axalaithën la itre huliwa ka xome pala ha la traem me trenge catre i nyidro. Ame hë ngöne la macatre thupen, hnei nyidroti hna eatrën lo mekun hnei nyidroti hna thel troa eatrën. Matre nemene hë la thangane lai? Önine la trahmanyi ka hape: “Maine pë ju aja hnei nyiho hna thel troa hane eatrën, thatreine jë kö tro nyiho a hane mele tune la enehila. Atraqatr la madrine i nyiho. Lolo catr nge thaa gomegome menu kö la mele i nyiho. Nyipi mekune hi la, nge sipu aliene la mele së.”
5 Pine laka easë a treqen la drai i Iehova, epi tro pala hi së a hmek ngöne la götrane la ua me thele troa wië la itre mekune së ngöne la mele së, nge easë pala fe a thele troa catre kuca la aja i Akötresie.—Tito 2:11-13.