Loi e Tro Sa Wanga Atrune La Itre Atr—Ene La Troa Ithanata Hmekune La Aja i Angatr
1 Hnei Paulo aposetolo hna amë la ketre tulu ka lolo ngöne la nyidrëti a cainöj. Hnei nyidrëti hna majemine troa eköthe la aqane nyiqaane ithanata i nyidrë hmekune la aqane mel me mekune ne la itre ka drei nyidrë. (1 Kor. 9:19-23) Loi e tro fe sa hane tune lai. Ame ngöne la easa hnëkë e itre xaa ijin, ka loi tro sa xome la itre aqane nyiqaane ithanata qa hnine la Huliwa Ne Baselaia, nge troa eköthe itre ej hmekune la itre hna ajan hnene itre atr ne la teritoare së. Ame ngöne la easë a easenyine la uma, tre easë a öhne la itre ewekë ka amamane la itre hna ajan hnene la atr, haawe, easë a hane xome ju fe itre ej ngöne la easa nyiqaane ithanata. Ame la easë a troa fenafena la qëhnelö, maine jë tro sa wanga atrehmekune la itre ewekë hna nyipine hnene la atr, ene pe easa hane xome fe itre ej nyine nyiqaane la porotrike së. Ngo hetrenyi kö la ketre jëne tro sa atreine itrotrohni ngöne la huliwa ne cainöj.
2 Eköthe Jë Hune La Hna Qaja Hnene La Itre Atr: Ame la easë a tro fë la maca ka loi, easë a hnying me thele tro la itre atr a sa koi së. Haawe, maine sa jë angeic koi së nge thaa ihmeku kö memine lo itre mekun hne së hna hnëkën, tune kaa, tro hi së a hamën nyimenyimën la itre xaa mekun me sisedrën hnene lo itre aqane nyiqaane ithanata hna eköthe hë? Maine tro pe së a hane wanga atrun la itre mekuna ne lai atr? Maine tro sa wanga atrun la itre hna qaja hnene la itre xan, tre, troa hmaloi koi së troa xome la itre xaa hnying ka lolo matre troa thele la hna nyipi mekune hnei angatr. (Ite edomë 20:5) Qa ngöne lai, atreine tro sa wange hnyawa la itre götrane ne la maca ne Baselaia ka troa ketr mekötine la itre aja ne la itre atr ka drei së.
3 Kösë kolo hi lai a amamane laka loi e tro sa atreine canga ithanatan la itre xaa mekune pena ha e tröne lo itre hne së hna hnëkëne hë. Maine tro sa nyiqaane troa ithanatan la ketre jol hna qaja ngöne la itre nuvel nge kola amexej hnene la atr la ketre ewekë ka traqa kowe la nöj maine koi angeice pena, haawe, maine easa wanga atrune lai atr, tro hë së a ithanatane xötreithe la ka nyipi ewekë koi angeic.—Fil. 2:4.
4 Eköthe Hnyawa Jë La Aqane Ithanata Së: Ame ngöne la kola hnyinge hnene la atr, ma ka loi e tro sa sisedrën la porotrik ngöne la ketre ijine pena ha, thupene la hne së hna pane thele itre xaa ithuemacanyi hmekune lai mekune i angeic. Ijije mina fe tro sa tro fë la itre itus ka troa qejepengöne hnyawa lai mekun. Itre ewekë asë hi lai ka amamane la aja ka eje e kuhu hni së, ene la troa xatuan la itre xaa atr troa hane atre Iehova.—2 Kor. 2:17.