Loi e “Olene Pala Hi Nyipunie”
1 Ame ngöne lo Iesu a aloine la ala treen lao lepera, tre, caasi hmekuje hi la ka bëeke hmaca troa olene koi nyidrë. Öni Iesu e hnying, ka hape: “Hape u, tha ala luepi kö la ite hna aloin? Nge e ka pe kö la ala ekengemen?” (Luka 17:11-19) Drei la enyipi ewekëne koi së troa kapa madrin, me amamane fe la hni ne ole së kowe la nöjei ahnahna ka loi asë; tune mina fe kowe la itre hna hamëne gufane ka lolo asë qaathei Iehova Akötresie, ene la Tretretro së e koho hnengödrai, Atre ihnim nge ka ham!—Kol. 3:15; Iako. 1:17.
2 Nemene la itre xaa ewekë nyine tro sa olen? Easa olene koi Akötresie, la ahnahna ka tru hnei Nyidrëti hna hamëne kowe la nöjei atr, ene la thupene mel. (Ioane 3:16) Easë fe a olene la hnei Iehova hna ee së koi Nyidrë. (Ioane 6:44) Ketre, ame la aqane caasi ne la itre keresiano e hnine la itre ekalesia asë, tre, celë hi ketre kepine matre tro sa amamane la ole së. (Sal. 133:1-3) Thaa sihngödri kö koi së laka, nyimutre kö la itre xaa ahnahna hne së hna kapa qaathei Iehova. Loi e thaa tro pi kö sa ceitu memine lo itre ka pë hni ne ole, ene lo angetre Isaraela ka thëthëhmine la itre hnei Iehova hna kuca koi angatr!—Sal. 106:12, 13.
3 Amamane Jë La Hni Ne Ole Së: Ngacama hnene asë hi lo lai ala treen lao lepera hna madrine la hnei Iesu hna kuca koi angatr, ngo caasi hmekuje hi la ka amamane la hni ne ole i angeic. (Luka 17:15) Ketre tu së mina fe, easa amamane la hni ne ole së jëne la easa catre cainöjëne la maca ka loi. Maine ka nyipici la hni ne ole së kowe la nöjei ewekë hna kuca hnene la Tretretro së Atre ihnim e koho hnengödrai, eje hi laka tro hë sa thele troa nyitipune la ihnim memine la aqane hame i Nyidrë, hnene la hne së hna hane qeje Nyidrë kowe la itre xan. (Luka 6:45) Qa ngöne lai, ame la easa qaja kowe la itre xan la ‘nöjei huliwa i Nyidrë nyine haine hnei Nyidrëti hna kuca, me itre mekuna i Nyidrë koi së,’ tre, celë hi ka troa akökötrene la ihnim memine la hni ne ole së koi Iehova.—Sal. 40:5.
4 Upe Jë La Itre Xan Troa Amamane La Hni Ne Ole i Angatr: Loi e tro sa thele la itre aqane troa xatuane la itre nekö së memine la itre ka inine la Tusi Hmitrötr me easë, matre troa akökötrene la hni ne ole i angatr. Tro la itre keme me thine a thele la itre ijine troa kuca lai, tune la troa ce ithanatane memine la itre nekö i angatre la itre hnei Iehova hna xup. (Rom. 1:20) Ame la easa hamë ini kowe la ketre atr, maine jë troa hnyingëne koi angeic, ka hape, “Kola qeje nemene la ewekë celë, göne la pengöi Iehova?” Ame la kola kökötre la hni ne ole ne la hnainin, ketre kolo mina fe a kökötre la ihnim i angeic koi Akötresie, memine la aja ka eje thei angeic troa amadrinë Nyidrë.
5 Ngöne la itre drai tixenuë enehila, nyimutre la itre atr ka nononyi me pë hni ne ole. (2 Tim. 3:1, 2) Drei la madrine i Iehova ngöne la Nyidrëti a goeëne la itre hlue i Nyidrë a amamane la hni ne ole i angatr, jëne la hnei angatre hna catre cainöjëne la maca ka loi!—Iako. 1:22-25.