“Hna Qaja Amekötine La Inamacane Hnene La Nöjei Huliwa Ne Ej”
1. Tune kaa la aqane goeëne la huliwa së hnene la itre xaa atr?
1 Ame e itre xaa ijin, maine jë kola xele ma drei së hnene la itre atr, pine laka, thatre pengö hnyawa së kö hnei angatr, maine pena hnei angatre hna drenge la itre trengathoi hna sil matre troa qaja angazo së Itretre Anyipicine i Iehova. Maine jë hna ajojezine la aqane waiewekë i angatr hnene la itre mekune hna qaja jëne televizio me itre xaa ewekë ju kö. Ketre, ame ngöne la itre xaa götran, kola goeë së hnene la itre atr ceitu me ketre “wapicine hmi ka ngazo.” Haawe, tune kaa la aqane tro sa ujë ngöne la kola xöjetriji së tune lai?
2. Maine thaa ajane kö së troa kucakuca ngöne la kola xöjetriji së, haawe, nemene la ka troa xatua së?
2 Loi e Tro Pala Hi a Lolo La Aqane Ujë Së: Ame ngöne lo hneijine i Iesu, hetrenyi la itre atr ka thaa trotrohni nyidrëti kö memine la itre xaa hlue i Iehova, nge kola xöjetriji angatr. (Ite hu. 28:22) Ngo thaa hnei angatre kö hna nue la itre ixöjetriji cili troa hmahma troa eatrëne la huliwa ne cainöje i angatr. Öni Iesu, ka hape: “Hna qaja amekötine la inamacane hnene la nöjei huliwa ne ej.” (Mat. 11:18, 19) Hnei nyidrëti hna catre kuca la aja ne la Tretretro i nyidrë, me mejiune laka tro ha mama hnyawa la enyipiewekëne la maca ka loi kowe la itre atr ka thele la nyipici. Haawe, maine thaa ajane kö së troa kucakuca, loi e tro sa lapa mekune laka, hnene la Hupuna i Akötresie hna hane melëne fe la itre jole cili.
3. Pine nemene matre thaa sesëkötre kö së la kola xöjetriji së me icilekeu me easë?
3 Ase hë Iesu qaja, ka hape, tune la hna methinë nyidrë hnene la fen, haawe, tro mina fe ej a hane methinëne la itretre drei nyidrë. (Ioane 15:18-20) Qa ngöne lai, thaa tro pi kö sa sesëkötr troa goeëne la itre atr a xöjetriji së me icilekeu me easë. Eje hi, atre hnyawa hi së laka troa ngazo catre elanyi la itre ewekë, pine laka easa melëne la itre drai tixenuë, nge kola elëhni catre hnei Satana. (Hna ama. 12:12) Ngo atraqatre la madrine së, ke, kola mama jëne la itre ewekë cili, laka, calemi hë la pun kowe la fene i Satana.
4. Maine kola thipëne la maca ka loi hnene la ketre atr, tune kaa la aqane tro sa ujë?
4 Loi e Troa Ujë Cememine La Thiina Ka Lolo: Ame ngöne la kola xele ma drei së hnene la ketre atr, tre, loi e tro pala hi sa ujë cememine la thiina ka lolo me hni ka menyik. (Ite edomë 15:1; Kol. 4:5, 6) Maine ijij, loi e tro sa qaja hnyawa kowe la ketre atr ka hetre hni ne ajan, ka hape, nyimutre la itre mekune ka thoi hna qaja göne la Itretre Anyipicine i Iehova, maine pena ijije tro sa hnyingëne la kepin matre angeic a mekune tune lai. Maine jë hnene laka lolo la aqane ujë së, ene pe kolo ha huliwa la hni angeic, me mekune hmaca la itre ewekë hnei angeice hna dreng göne la Itretre Anyipicine i Iehova, nge maine jë ame e ketre ijin, tro hë angeic a drenge la ketre Atre Anyipicin ka traqa troa wai angeic. Ngo maine kola elëhni la atr, haawe, loi e tro sa nue angeic cememine la thiina ka menyik. Ngacama ngazo la aqane goeë së hnene la itre xaa atr, ngo loi e troa xecie hnyawa e kuhu hni së, laka, Iehova a wanga atrune hnyawa la huliwa ne cainöje së.—Is. 52:7.