Tro Fe Kö Nyipunieti a Hane Huliwa Thenge La Aqane Trongene La Fen?
1. Pine nemene matre loi e tro sa saze?
1 Ame ngöne la 1 Korinito 7:31, kola qaja hnei Tusi Hmitrötr ka hape, kola saze la pengöne la fen. Celë hi kepine matre loi e tro fe sa hane saze la itre aqane tro fë hne së la maca, memine la porogarame së, memine la aqane waiewekë së. Ngo hapeu, pi tro fe kö sa hane saze thenge la aqane mele ne la itre atr?
2. Pine nemene matre loi e tro sa nyenyape thenge la aqane nyenyape ne la organizasio i Iehova?
2 Aqane Cainöj: Hnene pala hi la ekalesia i Keresiano hna thele troa saze thenge la aqane mele ne la itre atr. Ame lo Iesu a xötrei upe la itretre drei nyidrë, öni nyidrëti ka hape, tha nyipi ewekë kö troa xome trongë mani, maine xeni pena. (Mat. 10:9, 10) Ngo ame hë e thupen, hnei nyidrëti hna saze hmaca la itre hna amekötin, wanga hetre itre ka icilekeu ju memine la itretre dreng. Ketre, nanyi pena la itre götrane hnë troa cainöje ngön. (Luka 22:36) Hnene pala hi la organizasio i Iehova hna saze jia ne huliwa, thenge la aqane saze la pengöne la mele ne la itre atr. Hna huliwane lo itre cartes de témoignage, me radio, me ikaho hna atë hune iloto. Ame enehila, xalaithe hi la itre ijine easa traqa a öhnyi itre atr ngöne la itre hnalapa i angatr. Qa ngöne lai, kola ithuecatre koi së troa catre cainöje ngöne itre hnalapa trootro, me cahu hne së hna tro. Hna upi së fe troa cainöje ngöne itre hnalapa trootro e hejilapa. Maine tro la ikatre i Iehova a amekötine la jë ne ej, hapeu, tro fe kö sa nyenyape thenge la aqane nyenyape ne ej?—Eze. 1:20, 21.
3. Nemene la eloine la troa atreine ithanatane la nöjei pengöne mekune memine la itre atr?
3 Nyine Troa Porotrikën: Nemene la hna pi porotrikëne hnene la itre atrene la götrane hnei nyipunieti hna cainöje ngön? Mani? Mele ne la hnepe lapa? Itre isi? Nyipi ewekë tro sa atre la itre jole me itre ewekë hna melëne hnene la itre atrene la nöje së, matre tro sa atre la hne së hna troa ce ithanatane me angatr. (1 Kor. 9:20-23) Maine kola qeje mekune hnene la ketre atr, epi the tro kö sa hune fë troa ithanatane me angeice la mekune hne së hna hnëkën, ngo epi tro pe sa ce ithanatane me angeice la mekune hnei angeice hna pi ithanatan.
4. Pine nemene matre loi e tro sa atreine huliwa thenge la aqane trongene la fen?
4 Easenyi hë troa patre la “pengöne” la fene celë, me nyiqaane la akötr atraqatr. “Xoxopate pe hi la ijin.” (1 Kor. 7:29) Haawe, catre pi së troa atreine huliwa thenge la aqane trongene la fen, nge epi the tro kö sa hunyinyi matre atreine së troa umuthe la huliwa ngöne la traeme hna sa!