Aqane Troa Maca Ngöne La Hna Cainöj —Aqane Troa Ixatua

Enyipiewekën: Atre hi Iesu la enyipiewekëne la troa hetre sinatro. Celë hi kepine matre hnei nyidrëti hna up lo 70 lao itretre dreng troa isa tro ala lue ngöne la hna cainöj. (Luka 10:1) Ketre ixatua ka tru koi së la sinatro ngöne la ijine kola jole koi së troa sa kowe la ketre atr, me ngöne la ijine easa qëmekene kowe la itre xa jole kö. (Ate cai. 4:9, 10) Maine tro la sinetronge së a qaja la hnei angeic hna hane atrein, me hamëne la itre xa ixatua koi së, tro hë së lai a maca ngöne la hna cainöj. (Ite edomë 27:17) Tro fe angeice lai a hamë trenge catr koi së, jëne la itre porotrik ka iakeukawany.—Fil. 4:8.

Aqane Troa Kuca:

Drenge hnyawa ju la hna qaja hnene la sinetronge i nyipunie. (Iako. 1:19) Maine angeic a e koi ketre atr la ketre xötr, hane ju fe drenge la kola e Tus, matre atreine nyipunieti xatua angeic, e aja ixatua ha angeic.
Huliwane hnyawane jë la mekuna i nyipunie, matre wang atrehmekune hnei nyipunie la ijine troa hane qeje mekun. (Ite edomë 25:11) Maine nyipunieti a sine la kola ini Tusi kowe la ketre atr, tro la sinetronge i nyipunie a madrin, e tro nyipunieti a hane qeje mekun. Maine nyipunieti a cainöje trootro ngöne la itre hnalapa, pane treqene jë la kola ase qeje mekune hnene lai sinetronge i nyipunie, qëmekene troa hane qeje mekun. Maine ka xötrei cainöje la sinetronge i nyipunie, maine pena, nyipunieti a öhne laka, jole koi angeice troa sa kowe la atrene la ketre hnalapa, tro hë angeice lai a madrin, e tro nyipunie a hane ixatua. Cainöje trootro ju hë së ngöne la itre hnalapa, maine iwai hmaca, maine sine la ini Tus i ketre pena, ngo tro sa thupën matre tha tro kö sa thupatëne la porotrike ne la trejine me easë memine la atrene lai hnalapa, maine qeje ketre mekune pena, ka tha ihmeku kö memine la hna porotrikën.
Hane ju qaja la hnei nyipunie hna hane kuca. Maine nyipunieti a atrehmekune ka hape, tro ha xatuane la sinetronge i nyipunie troa maca ngöne la hna cainöj, e hetre mekune hnei nyipunie hna pi qaja koi angeic, qaja jë. (Ite edomë 3:27) Ame hë ngöne la ijine ka ijij, qaja ju koi angeic ka hape: “Tune kaa ha la eö a goeëne la aqane trongene lo lai porotrike i easë?,” maine pena, “Eni a hane pi qaja koi eö la ketre mekun,” maine pena, “Ame ni, ke hnenge hna tupathe troa kuca tune la.” Tro la sinetronge së a kapa madrine la eamo, e hne së hna hamën e itre xa ijine hi. Ngo maine hne së pala hi hna majemine hamë eamo ngöne la nöjei ijine easa ce cainöje trootro me angeic, tha tro hë angeice lai a madrine troa cainöj.

Tupathe Ju Ngöne La Treu Celë:

Ame la nyipunie a bëeke qa hna cainöj, qaja jë kowe la sinetronge i nyipunie la ewekë hnei angeice hna qaja maine kuca, nge ka xatua nyipunie.