MELE NE KERISIANO

Götrane Ka Hnyipixe Ne La Icasikeu e Nyipine La Wiik

Qane la treu Januare 2018, kola troa hetrenyi e hnine la porogarame ne icasikeu, la itre ithuemacanyi me iatr, hna xom qa hnine la Tusi Hmitrötr nyine inine ngöne ëternet, ngacama pë pala kö ngöne la sipu qene hlapa së. Xecie koi së laka, tro la götran cili a xatua së troa catre sin ajuin ngöne la easa hnëkë icasikeu, me acatrene fe la ihnimi së koi Iehova, Tretretro së!

ITHUEMACANY

Kola hamë itre xa ithuemacanyi göne la itre xötr ne la Tusi Hmitrötr, tune la nöj, me qenenöj, me qene hlapa.

Mataio 12:20

Eunyine kola enuk: Ame la laam ekö, tre, ketre trengen hna nyialien hnei oel, nge hna amë e hnine la ketre hnepe lino matre tro palahi a mel la ukahlokin. Ame la qene Heleni ne la hna hape, “eunyine kola enuk,” tre, kola qaja la eunyine ka so pine laka, hetre wanalep ka idreuth ngo pi hë la eë. Ame la hna perofetane ngöne Isaia 42:3 tre, kola qaja la aqane utipine Iesu; tha tro kö nyidrëti a apine la mejiun ka ej thene la itre atr ka hni ka ipië me ka akötr.

Mataio 26:13

Nyipici: Ame la aliene la qene Heleni hna hape, a·menʹ, hna ujëne qene Heberu ka hape, ʼa·menʹ, tre, “eje hi lai,” maine “loi e troa ej.” Hnei Iesu hna qaja la hnaewekë cili ngöne la nyidrëti a thingehnaean maine perofetane la ketre ewekë, matre amamane laka, ka nyipici la itre hnei nyidrëti hna qaja. Iesu hmekuje hi la ka huliwan tune lai la lue hnaewekë “nyipici” me amen. Ame la kola alua mama la hnaewekë cili (a·menʹ a·menʹ), tune lo hna qaja ngöne la Evangelia i Ioane, ke, hna ujën ka hape, “nyipici, nyipici.”—Ine 1:51.

MEDIA

Hetre itre iatr me itre hnepe video ka hamë ithuemacanyi göne la itre ewekë ka traqa e hnine la Tusi Hmitrötr.

Bethefage, Wetre Elaio Me Ierusalema

Kola amamane hnene la hnepe video celë, la ketre gojenyi ka easenyi qa Ierusalema, ka tro qa ngöne la traon e et-Tour, hna hën ekö ka hape, Bethefage, uti hë la götrane gaa draië catr ne la Wetr Elaio. Ame la traon e Bethania tre, eje ngöne la götrane kohië ne Bethefage, nge tha nanyi kö qa la Wetre Elaio. Ame ekö e Ierusalema, majemine Iesu me itretre drei nyidrë troa meköl e Bethania, traon hna hën enehila ka hape, el-ʽAzariyé (El ʽEizariya), ketre ëje qene Arabe hna hape, “Le Lieu de Lazare.” Maine jë hnei Iesu hna lapa thei Maretha, me Maria, me Lazaro. (Ma 21:17; Mrk 11:11; Lu 21:37; Ine 11:1) Ame la Iesu a tro qa cili a tro Ierusalema, maine jë casi hi la gojenyi hnei nyidrëti hna xom memine lo itre hna amamane ngöne la video. Ame lo 9 Nisan 33 M.K., hnei Iesu hna të hune la ketre asina me uti qa ngöne la Wetre Elaio uti hë Ierusalema. Maine jë hnei nyidrëti hna xome la gojenyi ne Bethefage.

Gojenyi Qa Bethania a Tro Bethefage
Bethefage
Wetre Elaio
Hneopegejë Kederon
Wetr Hna Acile Lo Ēnē

June Waca Hna Jaqa Hnei Fao

Kola amamane hnene la iatr la june waca ne la ketre atr ekö hna jaqa hnei fao ka 11,5 cm. Hna öhne la june cili ngöne lo macatre 1968, lo kola ithel me sine la dro e Ierusalema, nge ka he lo hneijine la angetre Roma. Nyine amamane hnyawa ka hape, hna majemine huliwan ekö la itre fao, matre troa athip la ketre atr ka kuca la ngazo hune isinöe. Maine jë ceitu hi la fao cili memine lo itre fao hna xom hnene lo itre sooce i Roma ngöne lo kola humuthi Iesu. Hna öhne la june cili ngöne la ketre götrane hnë amë la itre june la atr ka meci hë. Kola amamane ka hape, ijije hi troa kelem la atr hna humuth hune isinöe.—Ma 27:35.