11 Huliwa Catr

ALIEN

Ame la atre catre huliwa tre, tha ka kötre huliwa kö. Ngacama tha ka hlemu kö la huliwa i angeic, ngo tru la madrine i angeice troa huliwa catr göne la itre sipu aja i angeic, me xatua itre xan.

ENYIPIEWEKËN

Nyipici laka, isa hetre hnëqa së asë hi ngöne la mele celë. Ame la itre atr enehila, tha aja i angatre kö troa huliwa catr. Ngo, e tro sa catre huliwa, tro hë së lai a kepe thangan.—Ate Cainöj 3:13.

“Hnenge hna öhne laka, ame la eni a catre huliwa tre, hetre madrineng, nge lolo la meleng. Nge celë hi ka upi ni tro palahi a huliwa catr. Maine hna atre eö ka hape, ka huliwa catr eö, tro hë eö a hlemu loi.”—Reyon.

TREPENE MEKÖT NE LA TUSI HMITRÖTR: “Hete thangane ngöne la nöjei huliwa asë.”—Ite Edomë 14:23.

NYINE TRO EPUNI A KUCA

Thele jë troa goeëne aloine la huliwa. Trongëne jë cahu itre eamo.

Madrine jë eö troa kuca hnyawa la itre huliwa. Ame la eö a kuca la ketre jol, maine kuci qa, maine huliwa i maseta, the huliwa sixetë kö. Kuca hnyawane jë la huliwa! E atre pengöne hnyawa ha eö la huliwa, thele jë troa maca, me kuca nyimenyimën. E maca hnyawa ha eö ngöne la hnei eö hna kuca, tro hë eö lai a madrin.

TREPENE MEKÖT NE LA TUSI HMITRÖTR: “Öhnë hë eö la ate kuca nyimenyimëne la huliwa i angeic ? tro angeic’ a cile qëmeke ne la ite joxu ; nge tha tro kö a cile qëmeke ne la ite [atr ka pë pengön].”—Ite Edomë 22:29.

Troa meku itre xan, ngo tha eö casi kö. Ame la eö a eatrëne hnyawa la hnëqa i eö tre, tro fe hi lai a hetre thangane koi itre xan. Ame la eö a eatrëne hnyawa la hnëqa i eö e hnine la hnalapa tre, tro ha tha jol kowe la itre xa atrene la fami tro angatr a isa kuci jolen.

TREPENE MEKÖT NE LA TUSI HMITRÖTR: “Sisitia la manathithi e troa hame hune la troa kapa.”—Ite Huliwa 20:35.

Kuca jë la itre xa jol. The tro kö a kuca hmekuje hi la huliwa hna upi eö troa kuca, kuca jë fe la itre xa jol. Ame la eö a ujë tune lai tre, hnene kö la sipu aja i eö, ngo tha hna upi eö kö. Eö hi lai a amamane laka, atreine eö ketre axecië mekun.—Mataio 5:41.

TREPENE MEKÖT NE LA TUSI HMITRÖTR: “Cia xane kö la loi ’ö, nge tha thenge kö la hna musinën.”—Filemona 14.

Troa atreine tulu ewekë. Ame la atr ka catr huliwa tre, tha ka genyi kö, maine sasaithi tulu menu palaha la aqane huliwa. Angeice pe a tuluth la aqane tro angeic a huliwa. Tru la madrine i angeic troa huliwa catr, me mano mina fe.

TREPENE MEKÖT NE LA TUSI HMITRÖTR: “Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.”—Ate Cainöj 4:6.