Nemen La Mejiun Göi Itre Ka Meci Hë Hne Së Hna Hnim?

Hnei Iobu hna hnying ekö ka hape: “Maine meci hë la at, hape u, tro angeic’ a mele hmaca?” (Iobu 14:14) Maine, hnei nyipunieti jë fe hna hane hnyinge tune la. Nemen la mekune i nyipunie, e troa öhn hmaca elany e celë fen la itre atr hnei nyipunieti hna hnim, matre ce thawa me angatr la ketre mel ka loi?

Eje hi laka, hna cinyihan e hnin la Tusi Hmitrötr la hna thingehnaean celë, kola hape: “Tro ha mele hmaca la itre ka meci cilie, tro ha mejë hmaca la itre meci angat.” Nge kolo fe a qaja hnei Tusi Hmitrötr ka hape: “Tro ha la ange ka meköti a hetenyi la nöj, me lapa palua kö ngön’ ej.”​—Isaia 26:19; Salamo 37:29.

Maine easa ajan troa mejiun kowe la itre hna thingehnaean celë, nyipi ewekë troa sa cahu itre hnepe hnying ka tru alien, hna hape: Pine nemen matre kola mec la itre atr? Ekaa ha la itre ka mec? Nge pine nemen matre xecie koi së laka, tro angatr a mele hmaca?

Mec, Me Ewekë Ka Traqa Ngöne La Easë a Mec

Tusi Hmitrötr a qaja hnyawa ka hape, thaa aja i Akötresieti kö ngöne la qaan, tro la itre atr a mec. Hnei Nyidrëti hna xup la pane trefën Adamu me Eva, me ami nyidro ngöne la paradraiso hna hën ka hape Edena, nge hna upi nyidro troa hnaho me nyidrawan la fene hnengödrai asë, matre troa Paradraiso nge hnalapa i nyidro. Tro hi nyidroti a mec, e hnei nyidroti hna thaa drenge thenge la itre hnei Nyidrëti hna amekötin.​—Genese 1:28; 2:15-17.

Qa ngöne laka pëkö caa ole thei Adamu me Eva kowe la elolon la thiina i Akötresie, haawe, hnei nyidroti hna thaa drenge thenge Nyidrë, matre nyidroti pë hë a kapa lo pun hna ahnithe amë hë. Hnei Akötresieti hna qaja koi Adamu ka hape “[Tro] eö a hmaca kowe la hnadro; ke hna xomi ‘ö qa lai; ke xaxau eö, nge tro hmaca eö kowe la xaxau.” (Genese 3:19) Qëmeken troa hetre Adamu, xaxau angeic. Nge pine la hnei angeic hna thaa idrei me kuca la ngazo, haawe, angeic a kapa la pun hna ahnithe hë koi angeic; tro hmaca angeic a bëek kowe la xaxau, kola hape ene la pëkö, pë hmaca kö hna atrein troa kuca.

Matre ame la mec, tre, ene la kola paatr la hnamano; pë hë nyine amelen la ngönetrei. Tusi Hmitrötr a amaman hnyawa pe ka hape lue pengön: “Ame la thupene la ngazo, te, mec; ngo ame la ahnahna i Akötesie, te, mele ka tha ase palua kö göi Iesu Keriso Joxu shë.” (Roma 6:23) Tusi Hmitrötr a qeje pengön la atr ka mec, laka thatre hë koilo, nge pë hmaca kö hna atreine dreng, haawe öni Tus ka hape: “Ke ate hë la ite ka mele laka tro angat’ a mec; ngo tha ‘te kö la kete ewekë hnei ite ka meci hë.” (Ate Cainöj 9:5) Ngöne la kola meci la atr, ke, Tusi Hmitrötr a qeje pengön ka hape: “Kola löpi la [“ua,” MN] i angeic, ame hna hmacaju angeice kowe la dro i angeic; ngöne la drai cili patë hë la ite mekune i angeic.”​—Salamo 146:3, 4.

Ngo maine Adamu me Eva hmekuje hi la lue ka ena la wathebo i Iehova e Edena, hnauën pena ha la kola hane mec la nöjei atr asë? Pine laka hna hnaho së thupen la hna thaa idrei hnei Adamu, haawe, edrö së asë hi la ngazo, me mec. Celë hi mekun hna qeje pengön hnei Tusi Hmitrötr, kola hape: “Qa ngöne la traqa ha la ngazo kowe la fene hnengödrai hnene la ate ka cas [Adamu], nge meci fe pine la ngazo; tune lai hna traqa la meci kowe la nöjei at’ asë.”​—Roma 5:12; Iobu 14:4.

Ngo maine jë, tro la ketre atr a hnying ka hape: ‘Hapeue lo itre atr ka mec, kolo pe kö a troa mele palua la itre u i angatr?’ Ala nyimu catr la itre ka inin la mekune cili, me qaja fe ka hape ame la mec, tre, ketre jëne tro kowe la ketre mel. Ngo thaa mekune i Tusi Hmitrötr fe kö lai. Wesi Ula i Akötresieti pe a inin laka ame la u, tre, nyipunieti hi, me aqane ujë i nyipunie, ene la itre thiina, me pengöi nyipunie ngöne la ngönetrei. (Genese 2:7; Ieremia 2:34; Ite Edomë 2:10) Haawe, Tusi Hmitrötr a qaja fe ka hape: “Tro kö a meci la [“u, ka,” MN] kuca la ngazo.” (Ezekiela 18:4) Thaa hna qaja fe kö ngöne la Tusi Hmitrötr, ka hape, hetre u ne la atr, nge ka troa mele pe e thupen la hna meci la ngönetrei.

Tro La Itre Atr a Mele Hmaca Tune Kaa

Thupen la kola fetra la ngazo me mec e celë fen, tre, hnei Akötresieti hna fe amaman la aja i Nyidrë troa apaatren la mec, me amelen hmaca la itre atr ka meci hë. Haawe, kola qeje pengön hnei Tusi Hmitrötr ka hape: “Aberahama . . . a mekune, ka hape, ateinë hë Akötesie troa amele [nekö i nyidrë trahmany Isaka] hmaca qa hna mec.” (Heberu 11:17-19) Ka meköti la trepen la lapaune i Aberahama, ke, Tusi Hmitrötr a qaja la pengön la Kapucatin asë ka hape: “Tha Akötesieti ne nyidëti la ite ka meci, ngo ite ka mele pe; ke mele asë hë koi nyidë.”​—Luka 20:37, 38.

Nyipici laka, thaa eje hmekuje kö thei Akötresie Kapucatin asë, la men nyine troa amelen hmaca la itre atr hnei Nyidrëti hna iën, ngo hetrenyi fe thei Nyidrëti la ajan. Hnei Iesu hna ketre sipu qaja ka hape: “The sheshëköte kö ene lai, ke calemi hë la ijine tro la nöjei ate ngöne la ite hua [“nyine amekunën,” MN] a denge la aqane ewekë i angeic, me tropi.”​—Ioane 5:28, 29; Ite Huliwa 24:15.

Itre hnepe ijin thupen la hnei Iesu hna qaja la itre trenge ewekë celë, nyidrëti a ixelë me angetre xutu wezipo ka fetra qa ngöne la ketre traon, Naina la ëjen. Ame la ka mec, tre, ketre nekönatr trahmany, nekön ka caas ne la ketre sine föe. Ame la Iesu a öhn la hace ka tru ka eje thei eahlo, ke, kola traqa la ihnimi nyidrë koi eahlo. Haawe, nyidrëti a ulatine jë me wetë kowe la ka mec me hape: “Thupëtesiji fe, ini a qaja koi ‘ö, Cilejë.” Ame hna lapa jë lo ka mec, nge Iesu a hamë angeice jë kowe la thine i angeic.​—Luka 7:11-17.

Tune la hna melën hnene la sine föe celë, ketre atraqatre fe la madrin ngöne la Iesu a wang la lapa i Iairo, ketre tan la sunago ne la angetre Iudra. Meci hë la nekö i angeic jajiny, nge 12 petre hi lao macatre i nyën. Ngo ame la Iesu a traqa ngöne la hnalapa i Iairo, ke tro meköti nyidrëti kowe la nekönatr ka mec, me qaja ka hape: “Jajiny! cilejë.” Ame hna lapa jë angeic!​—Luka 8:40-56.

Thupene lai, kola meci la enehmu i Iesu, ene Lazaro. Ame la Iesu a traqa ngöne la hnalapa i Lazaro, tre, meci hë angeic, foa hë lao drai. Ngacama kola hleuhleu la xa i Lazaro, ene Maretha, ngo nyiidro a qaja amaman la mejiune i nyiidro ka hape: “Ate hë ni laka tro angeic’ a mele hmaca ngöne la ijine mele hmaca, ngöne la drai hnapin.” Ngo ame la Iesu a tro kowe la hua, ke, nyidrëti a iupi jë troa xom la etë, me hë catr ka hape: “Lazaro fe! löpi.” Ame hna lö pi angeic!​—Ioane 11:11-44.

Pane hane jë mekun la ewekë celë: Nemen la pengö i Lazaro ngöne la foa lao drai ne angeic e hnine la hue? Thaa hnei Lazaro kö hna qeje paradraiso e hnengödrai, maine ketre götran gaa iakötrë pena, ke, maine qa i angeice ju ngöne la itre götran cili, haawe tro angeic a qejepengöne lai koi angatr. Ngo thaa ijiji Lazaro kö troa mekun la ketre ewekë ngöne la kola mec, nge maine thaa amele angeice hmaca ju hnei Iesu, ke, aqane lapa i angeice hë lai uti hë “la ijine mele hmaca, ngöne la drai hnapin.”

Nyipici laka, itre iamamanyikeu lai hnei Iesu hna kuca, a hna kepe thangane hi ngöne la itre ijine cili, ke, hna meci hmaca lo lai itre hna amelen ekö. Ngo, hnei nyidrëti hna anyipicin, a 1 900 hë lao macatre enehila, laka ijij tro la itre ka mec a mele hmaca jën la mene i Akötresie! Haawe, jëne la itre nyine haine hna kuca hnei Iesu ngöne la hnepe götran ka co hi, tre, hnei nyidrë hna amaman la itre ewekë hna troa eatrën ngöne la fene hnengödrai asë, fen la Baselaia i Akötresie.

E Meci Hë La Ketre Sinee

Ngöne la kola ketr la hnepe lapa i nyipunie hnene la ithupëjia, ene la mec, troa atraqatr la hleuhleu thei nyipunie, ngacama nyipunie a mejiun kowe la mele hmaca. Aberahama a mejiun laka tro hmaca la föe i angeic a mele hmaca elany, ngo easa e laka “traqa ha Aberahama troa teije latesi pi Sara.” (Genese 23:2) Nge tune kaa Iesu ngöne la götrane cili? Ngöne la kola meci hnei Lazaro, hnei nyidrë hna “simano e kuhu hnin, me manomano cat,” nge thaa qea kö thupen, nge, nyidëti a “sheitë.” (Ioane 11:33, 35) Haawe, e meci hë la ketre atr hnei nyipunieti hna hnim, ke, thaa nyine hmahmane kö la troa treij.

E kola mec la ketre nekönatr, ke, ketre akötre ka tru lai kowe la thin. Celë hi matre Tusi Hmitrötr a fe amaman la ejuin la hleuhleu ka eje thene la thin. (2 Ite Joxu 4:27) Eje hi laka, ketre akötr ka tru mina fe kowe la kem. Hnei Davita hna ketre treije pin la nekö i angeic trahmany ka mec, Abasaloma la ëjen, me hape, “Ekölö ma meci pe ni hna i ‘ö.”​—2 Samuela 18:33.

Ngo, ame pe, tre, pine laka nyipunieti a mejiun kowe la mele hmaca, haawe, tro kö a hetre pun la hleuhleu i nyipunie. Tune la hna qaja hnene la Tusi Hmitrötr, ka hape, “tha tro kö nyipunie a teije pin, tui ite xane ka tha mejiune kö.” (1 Thesalonika 4:13) Ngo, tro pe nyipunieti a qal koi Akötresie ngöne la thith, nge Tusi Hmitrötr a thingehnaean ka hape, “tro nyidëti a sajuë [nyipunie].”​—Salamo 55:22.

Maine pëkö hna qaja, ke, troa xome la itre mekene tusi ngöne hi lo Lifu Bible​—The Bible Society in the South Pacific.