Meken 5

Eu Nge Ekaa La Götrane Hna Mala Iesu Ngön?

HNA amekötine hnene la hene ka tru ne Roma, Kaisara Auguso, laka, troa isa bëeke hnene la itre atr asë kowe la itre götrane hna hnaho angatre ngön, matre troa cinyihane la itre ëje i angatr. Celë hi matre, kola tro pi hnei Iosefa a tro Betheleema, nöje hna hnaho nyidrëti ngön.

Pine laka, nyimu atr ka traqa troa hane cinyihane la itre ëje i angatre e Betheleema, pë hë göhnë ne meköle ngöne la itre uma, caasi hi la uma hnei Iosefa me Maria hna öhn, a ketre uma i öni. E cili hi la hna hnaho Iesu, ketre uma hna umëne lo itre asina me itre xaa öni ju kö. Maria a atuthi nyëne hnei mano, me ameköle nyidrëti ju ngöne la trepene a i öni.

Eje hi laka, Akötresieti la atrekë mekunene troa upi Kaisara Auguso troa e la etrune la itre atr. Qa ngöne lai, hnei Iesu hna mala e Betheleema, traone hna thingehnaeane hë ekö hnei Tusi Hmitrötr, laka, troa hnahone e cili la joxu.

Drei la ketre jidri ka nyipi ewekë catr! E kuhu ngöne la itre hlapa, kola mele xötreithe la itretre thupë mamoe. Celë hi lolo i Iehova! Nge kola qaja hnene la angela i Iehova koi angatre ka hape: “The qou kö, ke hana wang, ini a qaja koi nyipunie la maca ka loi, nyine madine atraqate thatraqane la nöjei ate asëjëihë; ke hna hnahone thatraqai nyipunie ngöne la drai celë ngöne la lapa i Davita la Ate iamele, ene Keriso Joxu. Nge dei la hatene koi nyipunie; Tro nyipunieti a öhne la medenge hna atuthe hnei mano kola meköle ngöne la tepene a i öni.” Nge kola mama pi fe la itre xaa angela ka ala nyim, me thinge la ketre nyima, kola hape: “Atrunyi Akötesieti jë e koho qa, nge tingetinge hë e celë fen, thene la nöjei ate hna hnim.”

Ame la kola elë hmaca hnengödrai eë la itre angela, kola ithahnatakeu la itretre thupë mamoe, me hape: “Tro shë enehila Betheleema eë troa wange la ewekë celë hna kuca, hnei Joxu hna amamane koi shë.” Angatre a canga tro pi me öhnyi Iesu ngöne lo göhnë hna ahnithe koi angatre hnene la angela. Ame ngöne la kola qaja hnene la itretre thupë mamoe la ewekë hna qaja koi angatre hnene la angela, kola hai asë la itre atr ka drenge lai. Ame Maria, ke, nyidroti a drenge lo nöjei trenge ewekë asë cili, me lapa fë madrine jëne itre ej.

Nyimutre la itre atr enehila ka mekune laka, hna mala Iesu ngöne la 25 Diseba. Ngo ame e Betheleema ngöne treu Diseba, ke, ijine mani lapaa, me hnötr. Haawe, ngöne la itre drai ne hnötre cili, thatreine kö troa tro fë e jidr hnene la angetre thupë mamoe, la itre öni i angatre kowe la itre hne hlapa. Ketre, thatreine kö tro Kaisara a upe la nöje ka canga saqe hi troa mejë matre icilekeu memine la itre hna amekötin, troa xöje la hnötre atraqatr, matre cinyihane la itre ëje i angatre ngöne la itre nöje i angatr. Haawe, nyine tro hi lai a amamane hnyawane ka hape, hna hnaho Iesu ngöne lo hmekune lo hneijine li xaji. Luka 2:1-20; Mika 5:2.

▪ Pine nemene matre kola tro Betheleema hnei Iosefa me Maria?

▪ Nemene la ewekë ka ketre pengöne kö ka traqa ngöne la jidri ne mala Iesu?

▪ Tune kaa la aqane atre së laka, thaa hna hnaho Iesu kö ngöne la 25 Diseba?