Meken 47

Madrine Thupene La Hna Treije Hleuhleu

LAPAUNE hnyawa ha Iairo kowe la mene i Iesu troa kuca la itre iamamanyikeu, pine laka, angeice a hane öhne la nyidrëti a amelene la föe ka neni madran. Ngo qëmeke tro Iesu a aloine la meci ne la föe, hnei Iairo lo hna sipo nyidrë troa wange la neköne hnimina i angeice jajiny, ka 12 lao macatre, a kolo ha troa mec. Ngo enehila, traqa ha la ngazo. Iesu petre kö a ithahnata kowe la föe, nge kola traqa hnene la itre atr me qaja juetrëne koi Iairo ka hape: “Meci hë la nekö i nyipëti jajiny, nyine ue troa une ielene kö la Ate ini?”

Drei la ketre maca ka akötr! Atre hë së la aqane hlemu ne la atr celë hna metrötrëne catrën, ngo enehila atraqatre la hleuhleu ngöne la angeice a atre ka hape meci hë la nekö i angeice jajiny. Ame pe drenge hi Iesu lai maca; ame hnei nyidrëti hna ujë koi Iairo me ithuecatre koi angeice ka hape: “The qou kö, ngo lapaune ju.”

Iesu a ce tro ju memine la atr ka hleuhleu kowe la hnalapa i angeic. Nge traqa ha angatr, me öhne la itre atrene la uma kola iluilu; kola itreijenyi me latresi atraqatr. Kola caa lapa la itre atr, nge angatre a lepelepe la itre imano i angatre ke atraqatre catre la hleuhleu. Iesu a lö jë me hnyingëne ka hape: “Hna uë nyipunieti laka, iluilu, me iteijeny? Tha meci kö la nekönat, ngo nyën’ a meköl.”

Nge drengë hë la itre atr, angatre a hnyima sai nyidrë, me methinë nyidrë; atre hnyawa hi angatre laka, meci hë la nekö jajiny. Ngo öni Iesu ka hape, nyëne hi a meköl. Qa ngöne lai, jëne la mene hna hamëne koi nyidrëti hnei Akötresie, nyidrëti a troa amamane ka hape, atreine hi troa amelene hmaca la itre atr qa hna mec, tune la kola ahlë angatre qa hna meköl.

Iesu a upe jë la itre atr qa hnine la uma, nge nyidrëti a ce lö hmekuje me Peteru, me Iakobo, me Ioane, Iairo me föe i angeic; angatre a easenyine la hna meköle hnene la nekö jajiny. Ame hnei nyidrëti hna xome la iwanakoime ne la nekönatr, me hape koi nyën: “Talitha kumi; pengön, jajinyi fe ini a qaja koi ’ö, cile jë!” Ame hna canga mejë jë la nekönatre me tro! Nge kola hai hnei Iairo me föe i angeic, thaa ase kö nyidro mekune lai; thatreine kö nyidroti lapa fë la trenge madrine i nyidro.

Thupene la hna iupi troa ithuane la nekönatr, Iesu a ahnithe xönexönëne koi Iairo me föe i angeice matre thaa tro kö a atre la ewekë celë hnei ketre atr. Ngo thaa hna drenge kö la hna ahnithe hnei Iesu, matre hlemu asë hë ngöne la nöj, lo ewekë hna kuca hnei nyidrë. Hnaaluene atr hë lai hnei nyidrëti hna amelen. Mataio 9:18-26; Mareko 5:35-43; Luka 8:41-56.

▪ Nemene la maca hna kapa hnei Iairo, nge tune kaa la aqane xatua angeice hnei Iesu?

▪ Nemene la aqane lapa ne la itre atrene la hnalapa i Iairo ngöne la angatre a traqa?

▪ Ngacama meci hë la nekönatr, pine nemene matre Iesu kö a qaja ka hape, nyëne a meköl?

▪ Ala faifi lao ka öhne la iamele celë qa hna mec, itre drei angatr?