Meken 51
Ihumuthi Ngöne La Ketre Ijine Kola Atrune La Drai Ne Hnahon
THUPENE la hnei Iesu hna amamane kowe la itre aposetolo la nyine troa kuca, nyidrëti a upi angatre pi isa ala lue kowe la götrane hna troa cainöje ngön. Ma hnei Peteru hna ce tro me Anederea trejine me angeic, Iakobo me Ioane, Filipo me Bartelemaio, Toma me Mataio, Iakobo me thedaio, nge Simona me Iudra Isakariota. Ngöne la nöjei götrane angatre a tro ngön, kola tro fë la maca ka loi ne Baselaia hnene lai sikisi lao gurupe ne cainöj, nge angatre a kuca la itre iamamanyikeu.
Nge ngöne la ijine cili, hna akalabusi Ioane bapataiso pala kö, a lue macatre hë. Mekune hi epuni lo Ioane a qaja amamane la ngazo hna kuca hnei Heroda, laka, hnei nyidrëti hna xomi Herodia, ifëneköne la trejine me nyidrë, ene Filipo. Nge pine laka, kola qaja hnei Heroda Anetipa ka hape, nyidrë a xötrethenge la wathebo i Mose, haawe, ijije hi tro Ioane a jele ngazone la nyixetë i nyidrë me Herodia. Celë hi matre, hna akalabusi angeice hnei Heroda, maine jë hna iaöne hnei Herodia.
Kola wangatrehmekune hnyawa hnei Heroda Anetipa laka, ketre atr ka meköti Ioane, nge nyidrë a drei angeice hnyawa. Nyidrë a luelue ngöne la nyine troa kuca koi Ioane. Ngo ame pe Herodia, nyidro a methinë Ioane me thele lapaane la ketre jëne troa humuthi angeic. Ame hna traqa la ketre ijine ka ijij, hnei nyidro hna treqen.
Qëmekene la paseka ne la macatre 32, kola hnëkëne hnei Heroda la ketre pui ne xeni ka tru göi troa atrune la drai ne mala i nyidrë. Nyidrëti a könëne jë la itre hene ka tru ne la nöj, me itre tane isi, memine fe la itre atr ka hlemu ne Galilaia. Ngöne la jidri cili, kola lö jë hnene la ketre jajinyi troa fia qëmekene la itre atr hna hëne troa feet; Salome la ëje i nyën, nekö i Herodia me Filipo lo pane fö i nyidro. Kola haine hnene la itre trahmanyi la emingömingöne la aqane fia i nyidro.
Ketre kola piine nge atraqatre fe la madrine i Heroda koi Salome. Öni nyidrë koi nyëne ka hape: “Qajajë koi ni la aja i ’ö, nge tro ni a hamë eö.” Nyidrëti fe a sisinyi koi nyëne ka hape: “Tro ni a hamë eö la hnei ’ö hna troa qaja koi ni uti hë la kete götrane la baselaiang.”
Qëmekene troa sa la hnyinge cili, Salome a pane lö pi troa hane atre la mekune i thine i angeic. Öni nyëne ka hape: “Tro ni a qeje nemen?”
Drei lo la ijine hna treqene hnyawa hnei Herodia! Angeice a sa mekötine ka hape: “He i Ioane bapataiso.”
Qa ngöne lai, kola canga bëeke hmaca hnei Salome me sipone koi Heroda ka hape: “Ini a ajane tro cilieti a hamë ni enehila la he i Ioane bapataiso hnine la cei.”
Hace catre pi hë Heroda. Ngo pine laka hna drenge asë hi hnene la itre atr hna könëne lo nyidrë a sisiny, haawe, ngazo la hni nyidrë e thaa aejëne kö nyidrë la hna sisiny, ngacama tro ju hë a humuthe la ketre atr ka meköt. Ame hnei nyidrë hna upe ju fe kö la ketre hlue kowe la kalabus, matre troa kuca lai ewekë ka ngazo catr. Thaa hmitre ju kö nge kolo fe hë a traqa fë hnene la hlue la he i Ioane hnine la cei; nge angeice a hamëne eje koi Salome. Nge Salome a tro fë jë kowe la thine i angeic. Ame la kola atre lai hnene la itretre drei Ioane, angatre a tro pi troa xome la ngönetrei Ioane hnine la kalabus, matre troa keleme ej; thupene lai, angatre a hane tro fë jë fe la maca cili koi Iesu.
Ame hë thupen, ngöne la Heroda a drenge laka, Iesu a aloine la meci ne la itre atr, me helëne la itre dremoni, haawe, nyidrë a xou atraqatr, pine laka, kola mekune ka hape, maine jë Ioane la atr cili, a hna amelene hmaca qa hna mec. Thupene lai, nyidrë a ajane troa iöhnyi me Iesu, a thaa göi tro kö a drenge la ini hna hamën, ngo matre troa atre, maine nyipici maine thoi la ewekë hnei nyidrë hna mekune me xouen. Mataio 10:1-5; 11:1; 14:1-12; Mareko 6:14-29; Luka 9:7-9.
▪ Pine nemene matre, hna akalabusi Ioane, hnauëne matre thaa ajane kö Heroda troa humuthi angeic?
▪ Hna tune kaa matre, eatre ju kö la mekune i Herodia, ene la troa kuca matre troa humuthi Ioane?
▪ Thupene la meci Ioane, pine nemene matre Heroda a ajane troa iöhnyi me Iesu?