Meken 54

“Nyipi Areto Qa Hnengödrai”

AME eidr, hnei Iesu hna huliwa ngöne la drai ka pexej. Hnei nyidrëti hna ithuane la itre atr, itre thauzane la etrun, nge hnei nyidrëti fe hna kötrene la ka ala nyim, pine laka, angatre a ajane troa acili nyidrë troa joxu. Nge, ngöne la jidri cili kola catre la gejë, hnei nyidrëti hna tro hune la hnagejë e Galilaia; hnei nyidrëti fe hna huli Peteru ngöne la angeice a troa nunucil, nge kola kaca la gejë ngöne la ijine cili; ketre, hnei nyidrëti hna aupune la eny, me amelene la itretre drei nyidrë, ke, kolo hë a troa lö la he i angatr.

Ame lo itre atr hna ithuane hnei Iesu ngöne la götrane ahuë ne Galilaia, angatre hë enehila ezine e Kaperenauma, nge angatre a hnyingë nyidrëti ka hape: “Hlepëti hë cilieti e celë eu?” Iesu a haji angatre me qaja ka hape, angatre a thele nyidrë, ke, ngöne hmekuje hi matre tro nyidrëti a ithuane gufa angatr, a pëkö thupen. Qa ngöne lai, nyidrëti a upi angatre troa huliwa, thaa thatraqane kö la xeni ka troa ethitr, ngo thatraqane la xeni ka troa hamëne la mele ka epine palua. Ame hna hnyingë nyidrë hnene la ka ala nyimu ka hape: “Nemene la qâ hune, mate tro huni a kuca la ite huliwa i Akötesie?”

Iesu a qaja hmekuje hi la caa huliwa, ene la huliwa ka sisitria catr. Öni nyidrëti ka hape: “Dei lola huliwa i Akötesie, tro nyipunie a lapaune koi angeice la hnei nyidëti hna up.”

Ngacama nyimutre catre la itre iamamanyikeu hnei Iesu hna kuca, ngo thaa lapaune pi kö la ka ala nyimu koi nyidrë. Nyipi jole e troa trotrohnine laka, nyimutre la itre ewekë ka ketre pengöne kö hna kuca hnei Iesu, ngo kolo hmaca kö a hnyingë nyidrëti hnene la itre atr, ka hape: “Nemene la hatene hnei cilieti hna troa kuca, mate öhnejë hun, me lapaune koi cilie? Nemene la huliwa i cilie? Hna xeni mana ngöne la hnapapa hnene la ite xötrapane hun; tune la hna cinyihane ka hape, ‘Hnei nyidëti hna hamë angate la areto qa hnengödrai nune xen.’ ”

Pine laka, angatre a aja iamamanyikeu, Iesu a amamane jë koi angatre la qaane matre traqa pi la xeni hnei angatre hna kapa ha, öni nyidrë ka hape: “Tha hna hamë nyipunieti kö hnei Mose la qa hnengödrai; ngo angakakati pe a hamë nyipunie la nyipi areto qa hnengödrai. Ke areto i Akötesie la ka uti qa hnengödrai, me hamëne la mele kowe la fene hnengödrai.”

Kola qaja hnene la ka ala nyimu ka hape: “Joxu, hamë huni pala hi la areto cili.”

Öni Iesu koi angatre ka hape: “Ini hi la areto ne mel; nge ame la ate lapaune koi ni, te, tha tro hmaca kö angeic’ a pi ij. Ngo hnenge hna qaja koi nyipunie ka hape, Öhnyi ni hi hnei nyipunie ngo tha lapaune pe. Tro ha tro koi ni angat’ asë lo hnei Tetetroti hna hamë ni, nge ame ate tro koi ni, te, tha tro jë kö ni a helën; Qa ngöne laka, tha uti kö ni troa kuca la ajang, ngo loi pe la aja i nyidëti ate upi ni. Nge dei lola ajane la ate upi ni, laka, tha tro kö ni a nue la kete e angate hnei nyidëti hna hamë ni, ngo tro ni a acilëne ngöne la drai hnapin. Nge dei lola aja i Angakaka, laka, tro nöjei ate asë angete goeëne la nekön, me lapaune koi angeic’ a hetenyi la mele ka tha ase palua kö.”

Kola nyiulili hnei angetre Iudra, pine la trenge ewekë hna qaja hnei Iesu, hna hape, “Ini la areto hna uti qa hnengödrai.” Angatre a goeë Iesu hmekuj, a ketre neköi atr, celë hi matre, angatre a qaja tui angetre Nazareta ka hape: “Hape u, tha Iesu kö lai lo nekö i Iosefa, lo keme me thine i angeice hne së hna ate? Hna tune ka laka, qaja hnei angeic, ka hape, Hnenge hna uti qa hnengödrai?”

Iesu a sa koi angatre ka hape: “The nyi ulili kö nyipunie. Pëkö ate ateine tro koi ni, e tha hna e angeice kö hnei Tetetro ate upi ni; nge tro ni a acilë angeice jë ngöne la drai hnapin. Hna cinyihane ngöne la ite tusi ange perofeta ka hape, ‘Troa ini angate asë hnei Iehova.’ Nge kola tro asë koi ni la nöjei ate denge qa thei Tetetro, me hna inin. Pëkö ate goeë Tetetro, ngo loi pe angeice qa thei Akötesie, hnei angeice hna goeëne la Tetetro; Nyipici, nyipici ini a qaja koi nyipunie ka hape, ame la ate lapaune koi ni, te, hetenyi angeice la mele ka tha ase palua kö.”

Öni Iesu fe ka hape: “Ini hi la areto ne mel. Hna xeni mana ngöne la hnapapa hnene la xötapane i nyipunie nge meci kö angat. Dei la areto hna uti qa hnengödrai, laka, e xeni hë hnei ate, te, tha tro kö angeic’ a mec. Ini hi la areto ka mele hna uti qa hnengödrai; maine xeni jë hnei kete ate la areto celë, tro ha angeic’ a mele epine palua.” Nyipici laka, maine tro la itre atr a lapaune koi Iesu, qene qaja i Akötresie, atreine hi tro angatre a hetrenyi la mele ka thaa ase palua kö. Mele hna thatreine kö troa kapa, jëne la mana, me ketre falawa pena!

Kola mama laka, itre ewekë la hna ithahnatane hë, thupene la hna öhnyi Iesu hnene la ka ala nyim, ezine e Kaperenauma. Ngo tro pala kö a atraqatre la porotrike celë, ngöne la kola troa sisedrëne ej, me inine la itre atr hnei Iesu, hnine la sunago e Kaperenauma. Ioane 6:25-51, 59; Salamo 78:24; Isaia 54:13; Mataio 13:55-57.

▪ Nemene la ewekë ka traqa, qëmekene tro Iesu a qaja la areto ne hnengödrai?

▪ Ngacama kolo hi a ase kuca la itre iamamanyikeu, pine nemene matre ngazo la aqane ujë ne la itre atr, ngöne laka, angatre hmaca kö a aja iamamanyikeu?

▪ Ame ngöne la Iesu a qaja ka hape, nyidrëti la areto ne hnengödrai, pine nemene matre kola qaja angazo nyidrë hnei angetre Iudra?

▪ Hna nyiqaane ekaa, la ithahnata göi areto ne hnengödrai?